JOWEL 2
2
Fatta vi Ma-Vatɗina
1Buwgi togolomna hay Siyon,
buwgit kulo ŋolo kay hiɗiyta van ta peldetta,
a sum sa hay nagatna tuwsi ma visi bat-bat'.
Kay buura vi Ma-Vatɗina ka ma'a,
kay nam ka goboyo,
2buur ma jufun nil';
buura vi ɗugulla hiɗi liyn ma duk gaana,
nam ka co'o,
ki liyn ma tun caw cal goy grawtna
vul haraŋa valami jew tam hiɗiyn nala.
Ɗuwgi jaf-sumun ŋolo,
dono'o kaw natige.
Nay bay wi sum sa kisi nisi nala tuwa,
vok ɗaw kaw nay as a wi sum sara kisi nisi naɗi lay.
3Voksiya kut ka ŋala,
bugolsiya sin-kuta ka tileka.
Nagat ay jew ki sinen eden nala,
may hay buur namna nagat muɗi mi ful ma wiŋŋa,
kay va ne' kaw hin kuɗ kut noŋɗi.
4Naŋ ɗuwsi kayn nisi ŋray ca
ki kulumayn ma sumun ɓe kalamu kay jaŋamu nala.
5Naŋ jak humaŋ tisi kayni,
suwana visi ki suwana keke-ma-duura,
ma ka jaŋ kulo kay yam hiɗiyt nala,
ki suwana vi kuta,
hay li ma na' ka ŋal hosona hay fulda nala.
Ki soje sa donona ka kot tuwsi kay tuɗ vun duura nala.
6Sumun tuwsi visi kisi bat-bat'.
Ir sumun ka zoɓ gaa'a.
7Nisi tuɗ voksiya ki sum sa tuɗ vun duura nala,
nisi pir kay gulmunna ki sum sa tuɗ li duura nala;
gigekaw iram cuki vokom hay hagata valam ŋiresl,
cal hagata valam goyɗi.
8Nisi may tupa tam tuwsi noŋɗi,
gigekaw wum mi liyn ma nam coli hayamna,
nisi tuɗ tam liyn ma voksina,
va ma telsi a ɦur voksiɗin mayɗi.
9Nisi mer goy hay hoyok-ziyna,
jaŋ kulo kay gulmunna,
jik kulo kay ziyna,
cuk hay ir-ziyna ki sa ma kulla nala.
10Nagat ka wir voksiya,
dukalawn geɗiya,
fatta hiɗi tilla muɗi jufunu,
mislekŋa vul haraŋa valam loɗi.
11Ma-Vatɗin di delem goy kir vok-ma-duura valamu;
kay vokŋa valam ka ŋolo,
sa nam cuksina nisi dono ŋolo;
kay buura vi Ma-Vatɗin nam ŋolo,
ɦuyumda kuɗum ŋolo kaw.
Col digam ɗawn gige?
Yita kay hamda
12Ma-Vatɗin di'e:
Wulin lo hotgiyay tanu hiɗi dikgi kafe,
hiɗi laata, hiɗi tiyna, hiɗi yorta.
13Wulin kayn jetgi dikgi goyo,
may mi sligar ɦawaɗi,
hotgiyay tam Ma-Vatɗina Lawna vigiya,
kay nam sa ma slugo'o, wi kir-hawta kaw.
Nam may muɗ ɦiy gosoyɗi,
ŋaata valam may vatɗi kaw.
Nam hot muɗ varta valamu kay joota,
ta nam ga' kay sumuna.
14Sa ma as wi'e mi gige la nam min hot bugolomu,
la nam min muɗ varta valamu kaw,
la nam min hin boldis gaa bugolom klasige?
Nam ma vi vulda hiɗi niyna
ma yamam goy vok iramna klasige.
15Buwgi togolomna hay Siyon,
ligi laata,
yit kayni ka tigi kafe.
16Tokgi sumuna,
ligi dakka ta peldetta.
Tokgi sum sa maariyana,
tokgi gurosgurayna,
guro sa dig sumaysi ci miir kaw.
jufay-boyn kaw cukgiyay goy hay ziyna vigi pa,
boyn kay tuwgi kaw cukgiyay goyo.
17Nigi muliyan-sa-ɗifinna,
lakgi jar vun-ziyda hiɗi giwin-ma-ɗifinna,
tiygiya,
digi ala Ma-Vatɗina,
suɗaŋ sumuna vaŋ goy suɗge,
hin vocota vaŋ goy hay bam zulotɗige,
hinsi goy a sumun cen kuɗsiɗige.
A sumun ma di ala:
Lawna visi namna ka arige kayn ŋaa'a su?
Deŋga
18Ma-Vatɗin hunayt hobawa hay dikamu,
kay nagata valamu,
nam min hulot sumuna valam goyo.
19Ma-Vatɗin hot dita,
nam di tam sumuna valamu:
Ɗuwgiya nan min gi alkamaren tigiya,
gulda-guldana hiɗi mula,
nigi ma hoba,
nan min hingi goy hay zulota hay ɓam sumun loɗi.
20Sa ma gaw kigina ma hay gal ma gaana,
nan min gum iram goy tigi gine'e,
nan min gun iram hay nagat ta goy soyta,
hiɗi ta goy ful ɦawa.
Sojena visi sa tuni voksina,
nan min gisi irsi hay niy-lumna ma ŋolla,
ma gal kuɗuwna,
sa tuni bugolsina hay niy-lumna ma ŋolla,
ma gal vulatina may.
hista visi ma mer goyo,
buwta visi ma kal ta-ta kulo dukalawna,
kay nisi li slen ma ŋulon ŋolo.
21Nagata tuwag li narɗi, firiyagu,
siwelag kulo ŋolo,
kay Ma-Vatɗina li sle ma ŋulonawa kagu.
22Muuriya ma hay fulda,
ligi narɗi,
kay liyn ma soy goyna hay fulda ma hot goɗa,
kay guna ma hot vuɗ lo,
gu-gumna hiɗi gulda-guldana ma hot vuɗ lo.
23Nigiya, gurona vi Siyon,
ligi firiya,
ciriygi ŋolo hay Ma-Vatɗina Lawna vigiya.
Kay nam min vulgi niyna hay liyamu.
Nam ma vulgi niy ma cuk jafn hay liyamu,
niy ma cawna hay liyam kaw ki ay jew ɓa-ɓa nala.
24Muɗakŋa vigi ma hob hiɗi wana,
Dutay-baara vigiya ma hob hiɗi vin ma jibetna hiɗi mula.
25Busa ma ɓok-ɓokona hiɗi baar-jerena,
hiɗi baar-girim-girimna hiɗi baar-bobona
ma ti wan goyna nan min wurakgita.
Kay nam can mi sojena vanu sa nan cuksis kay durgina.
26Nigi ma ti'e hob kaw,
nigi ma yi sem Ma-Vatɗina Lawna vigiya,
kay nam li slen ma ɦuyumna ŋolo kigiya.
Sumuna vanu ma lak hay zulot loɗi.
27Nala nigi ma wi ala nan ka jar sa Israyella,
nanu mi Ma-Vatɗina Lawna vigiya,
Lawn mara ma ŋiray hiɗi nan mayɗi,
Sumuna vanu ma lak hay zulot loɗi.
Ŋusta Peldetta ma ɓuraw goy kay sumuna.
Currently Selected:
JOWEL 2: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001