YEREMIYAS 52

VATTA VI LAWTA

Ŋuyta hiɗi slita vi Yerusalem

2 Mul 25; 2 Lml 36; Yer 39

1Sedekiyas ka hiɗi busat dok-ma' yam kep hay li ma nam muɗ mulu. Nam ti mulda ir busat doogo yam kep hay Yerusalem. Sulum ya' Hamutal, goota vi Yeremiyas ma hay Libna. 2Nam li slen ma joo'o vok ir Ma-Vatɗina, ŋray ca ki Yoyakim li nala. 3Van kayni co'o kuɗ ɦiyda vi Ma-Vatɗina kat Yerusalem hiɗi Yuda, sa nam min noysi goyo vok iramu. Sedekiyas fok kulo'o kat mulla vi Babilon.

4Co hay buurta doogota vi til ma doogona vi busata zleeŋeta vi mulda vi Sedekiyas kayni, Nebukadnesar mul ma Babilon co hiɗi sojena valam kafe kay dur Yerusalem, nisi vi kaŋŋa visi goy voro, nisi ŋuy zlaɓn tam Yerusalem. 5Nisi ŋuy hoyok-ziyna ta-ta hay busata doogo yam kepta vi mulla Sedekiyas. 6Co hay buurta zleeŋeta vi til ma fiɗin kayni, mayt li dono'o hay hoyok-ziyna, fun ma sum sa hay nagat tumna muɗ may loɗi. 7Ki kayn nala nisi co ir gulmunna vi hoyok-ziyna, sum sa wi duur kaf pir jaŋi, nisi cuk goy hay hoyok-ziyn henjeta, jik hay hagata vi vun-galana jar gulmun ma ma'na goboy hiɗi jardeŋŋa vi mulla, kayni hay li ma hoyok-ziyn ka ŋuyi kay sa Kaldeena. Nisi sli hagata ta hay beɗna. 8May sojena vi sa Kaldeena jaŋ kuɗ mulla Sedekiyas, nisi fum hay liy ma beɗna vi Yeriko; sojena valam sa kuɗumna mun goy talam jaŋi. 9Nisi vi Sedekiyas, tuɗum kulo kat mulla vi Babilon hay Ribla, hay nagata vi Hamat, ɗawni nisi ka kitat kalamu. 10Mulla vi Babilon ŋat gurona vi Sedekiyas goyo hay li ma nam ka wisi hiɗi iramu; sa ŋulona vi Yuda kaf kaw nam ŋatsi goyo hay Ribla. 11Bugolda nam vul hagata, nisi co ir Ezekiyas goyo, nisi junum hiɗi jaɓ ma kawayna, mulla vi Babilon kalam hay babilon, gum daŋgaya ta-ta hay buur ma mitta valamu.

12Hay buurta doogota vi til ma vaslna, kayni hay busata doogo yam zleeŋeta vi mulda vi Nebukadnesar mulla vi Babilon, Nebuzaradan ma ŋolla vi sa ŋomda, ma ka sun mulla hay Babilon, nam co kulo hay Yerusalem. 13Nam ŋal ziyda vi Ma-Vatɗin goyo, nam ŋal ziyda vi mulla goyo, nam ŋal ziy ma hay Yerusalem kaf goyo, ziy ma ir ŋaan kaf nam ŋalam goy hiɗi kuta. 14Sojena vi sa Kaldeen kaf sa ay hiɗi ma ŋolla vi sa ŋomda, nisi ɦo gulmun ma ŋuyi tam Yerusalemna gaa kafe.

15Nebuzaradan, ma ŋolla vi sa ŋomda, kal galla vi sum sa hawna goy gorvo'o, caw sum sa hin kulo hay hoyok-ziyna, sum sa vul tuwsi mi mulla vi Babilon, hiɗi dir sumuna sa hin dak-dakŋa kaw. 16Hiɗi kayni kaf nam hin sum sa haw co'-co'na hay nagata, Nebuzaradan hin sa hawna kulo hay hoyok-ziyna kay nisi ma pi gulda-guldana, zumumu kaw. 17Dolla ma kawayna ma ka hay ziyda vi Ma-Vatɗina sum sa Kaldeena kusum gaa'a, diram ma yori gaan nisi tom goyo, ŋarak ma kawayna ma ka hay ziyda vi Ma-Vatɗina nisi tom goyo, wayna kaf nisi kalam kulo hay Babilon. 18Nisi yaw ŋarakŋa, pella, kewna, ŋalina, tasana, jak ma kawayna ma li lop hiɗi namna kaf. 19Ma ŋolla vi sa ŋomda hot yaw tasa ŋulona, ganuna, sle ma tun fitilla, tasana hiɗi ŋalina, sle ma koti hiɗi ora hiɗi ma doorona. 20Dolla ma ma'na, ŋarak ma muzna, luway-kawayna doogo yam ma' ma yoray gaa kuɗumna, ma mulla Salomon kotomis kay ziyda vi Ma-Vatɗina. Jak namna ma koti hiɗi kawayn kaf kayni nekka valamu sa as kay ŋaɓa'ɗi. 21Dol kep kayni, fiyokka valam ta kulota ir goldoŋ doogo yam glafandi, zigew ma ir goldoŋ doogo yam ma'na ŋuyi talamu, hayam gaa beɗe, be'da valamu ir cita-ɓamta fiɗi; 22yalam ma dilari kulona mi wayna, yalam ma dilari kulo kepna fiyokka valamu ir goldoŋ vasl; kat yalam ma dilarina silik ma ciliyna ka talamu, hiɗi sle ma kolo-kolona, kaf koti hiɗi wayna; dol ma ma'na koti hiɗi sle ma kolo-kolon ki kayn nala kaw. 23Sle ma kolo-kolon ka dok-zleeŋe yam karkiya hay galam pete, sle ma kolo-kolona ma ŋuyi tam kaway-ciliyna co noŋ pet kis.

24Ma ŋolla vi sa ŋomda vi Seraya, mul ŋol ma-ɗifinna, Sofoniya mul-ma-ɗifinna ma mul ma'na, hiɗi sum sa ŋom vun-ziyna sa ɦidina. 25Kulo hay hoyok-ziyna nam vi sa ma patayn kepe ma sum sa duura ka gaa kuɗ gaŋeraŋa valamu, sum sara siɗiya jar sum sa vul gatta mi mulla sa nisi fisi kulo hay hoyok-ziyna, sa ma ɗo slena vi ma ŋolla vi sojena ma lopna vuli hay ɓalamu kay yaw sumun vun duura, hiɗi sum sa hay nagat dok-karkiya sa nisi fisi kulo hay hoyok-ziyna. 26Nebuzaradan, ma ŋolla vi sa ŋomda yawsiya, nam tuɗsi kat mulla vi Babilon hay Ribla. 27Mulla vi Babilon calsiya, nam cisi goyo hay Ribla, hay nagata vi Hamat. Ki kayn nala jafna vi Yuda kalay goy gorvo gine hiɗi nagata visiya.

28Kayni si sum sa Nebukadnesar yawsi gorvona; hay busata siɗiyata nam yaw sumun sa Yudiyana birim ɦidi hiɗi diram dok-ma' yam ɦidi; 29hay busata doogo yam glafandita vi Nebukadnesar, nam yaw sumun kis-glafandi kalam dok-ɦidi yam ma' hay Yerusalem. 30Hay busata dok-ma' yam ɦidita vi Nebukadnesar, Nebuzaradan ma ŋolla vi sa ŋomda, yaw sa Yudiyan kis-siɗiya kalam dok-fiɗi yam vasl; nisi tapay noŋ pet sumun birim fiɗi kalam kis-karkiya.

31Hay busata dok-ɦidi yam siɗiyata vi vita-gorvota vi Yoyakim mula vi Yuda, hay buurta doogo yam vaslta vi til ma doogo yam ma'na, Evil-Merodak mulla vi Babilon, hay busata jewta vi mulda valamu, nam kot sli yam Yoyakim mulla vi Yuda kulo'o, nam kalamay goy hay daŋgayn pa. 32Nam lawam hiɗi ŋaa'a, nam tun zlamda-mulda valamu kulo kay muliyana sa ay hiɗi namu hay Babilon. 33Nam muɗum sligara valamu ma daŋgayna, Yoyakim ti fun dok-doko hiɗi mulla hay buura vi irita valam kaf, 34mulla vi Babilon kotom tuwam dok-doko hay buura kaf ma nam ka iriya, ta-ta tam mitta valam goŋ'.

Currently Selected:

YEREMIYAS 52: Massana

Highlight

Copy

Compare