YEREMIYAS 42
42
Yeremiyas min tel sa Yudiyana sa min kal Egipte
1Sum sa ŋulona vi sojen kaf, Yohanan goora vi Kareyak, Yezaniya goora vi Hoseya, hiɗi sumun kaf, tun caw tam sa gurayn pa ta-ta tam sa ŋulona co vok Yeremiyas, 2nisi di tam Yeremiyas ma jobta ala: Siɗawta vuma kayni naŋ ma huma' humge. Siɗawaŋ kuma'a vok Ma-Vatɗina Lawna vaŋu, siɗawaŋ kay caw sumun ma hinin kaf, kay numa ay ŋolo, wulini numa hini kiɗaya, ki iraŋ ka wi nala; 3a Ma-Vatɗina Lawna vaŋu ma ɗekma kay haga ta numa sli haya'ta, hiɗi va ma numa as a lumna. 4Yeremiyas ma jobta hotsi dita: nan humiya, wulini nan min siɗaw Ma-Vatɗina Lawna vigiya, kuɗ jobta vigiya; nan min ɗekgi goyo kay hot dita vi Ma-Vatɗin tigi kafe, nan as ŋay va kigi noŋɗi. 5Nisi hot di tam Yeremiyas: Hin Ma-Vatɗina li di-goyta ta gasita hiɗi ta ɗigerta kuma'a, la slen ma Ma-Vatɗin Lawna vaŋu vulaŋ hagatawa kay dum tuma'ana numa li kuɗum kafɗi. 6Ma-Vatɗina Lawna vuma'a numa gaŋ talam kayni, la nam dum mi sle ma ŋaa'a, va ma joo kaw numa as hum kuɗ della valamu, kay a numa ma lak hay sle'ta, la numa hum kuɗ della vi Ma-Vatɗina Lawna vuma'a.
7Buur doogo bugolda, Ma-Vatɗina di yoboyna valam tam Yeremiyas. 8Nala Yeremiyas yi Yohanan goora vi Kareyak, sum sa ŋulona vi vokŋa kafe sa ay hiɗi namu hiɗi sumun kafe, tun caw tam sa gurayn pa ta-ta tam sa ŋulona. 9Nam di tisiya: Humgi dita vi Ma-Vatɗina Lawna vi Israyel, nam ma nigi gan talamu kay nan naram siɗawta vigiya: 10La nigi lak hay nagat tani, nan ma lakgi gaa haya'a, nan ma ɓulakgi goyɗi, nan ma pigi gaa'a nan ma patgi kuloɗi; kay nan gi hama mi tuwanu kay joota ta nan la' tigita. 11Nigi ma li nar kay mulla vi Babilonɗi; nigi ma li nar kalam noŋɗi, Din mi Ma-Vatɗina, kay nan ka hiɗi nigiya kay suɗgi goyo, kay butgi goyo hay ɓalamu; 12nan ma kal slugot hayamu, nam ma wigi hawgiya, nam ma hingi lak hay nagata vigiya. 13May la nigi hum kuɗ della vi Ma-Vatɗina Lawna vigiɗi, la nigi di ala numa lak hay nagat tanɗi, 14numa min tuɗ hay nagat Egipte, lebo numa as wi duur loɗi, numa as hum del togolomna loɗi, tin as kiɗa goy kuma loɗi, numa ma lak ziy ɗawni, (la nigi di nala), 15humgi yoboyna vi Ma-Vatɗin yo, caw jafna vi Yuda ma hinna, Ma-Vatɗina vi vok-ma-duura Lawna vi Israyel ka di ala: La nigi muɗ irgiya kay kal hay Egipte, la nigi min tuɗ lak ɗawni, 16kew-gaferaŋa ma nigi li nar kalamna ma calgiya hay nagat Egipte, mayta ta nigi li nar ka'ta ma jun kuɗgi ɗawni hay Egipte, nigi ma mit ɗawni. 17Nisi kaf sa muɗ irsiyawa kay kal hay Egipte kay li ziy ɗawni, kew-gaferaŋa ma calsiya, mayta hiɗi moyna ma vatsiya, sa kep kaw as hulot goy vok joota ta nan min mara' kigitaɗi, sa kep kaw as pir goyɗi. 18Kay Ma-Vatɗina vi vok-ma-duura Lawna vi Israyel ka di ala: Ki ɦiyda hiɗi purcakka vanu yamay goyo kay sum sa hay Yerusalem nala, ɦiyda van ma yam goy kigi nala kaw, la nigi tuɗ hay Egipte, nigi ma fi ŋulda, fi ɦuyumda, fi be'da hiɗi zulota, liyn tani nigi ma hot wum loɗi. 19Caw jafna vi Yuda ma hinina, tuɗgi hay Egipteɗi, wigi ala nan telgi vaydi, Ma-Vatɗina digiyawa. 20Nigi ka ɗut tuwgiya, kay nigi gan kat Ma-Vatɗina Lawna vigiya; nigi di tan ala: siɗawaŋ kuma'a tam Ma-Vatɗina Lawna vuma'a, ɗekma kay slen kaf ma Ma-Vatɗina Lawna vuma'a duma kay lumna, numa ma lumu may. 21Nan digiyawa goy vaydi; may nigi min hum del Ma-Vatɗina Lawna vigiɗi, slen kaf ma nam di tanu kay nan dum tigiya kaw nigi min vumɗi. 22Wulini nigi ma wi ala kew-gaferaŋa, mayta hiɗi moyna ma vatgi goyo hay liyn ma nigi min tuɗ lak hayamna ɗawni.
Currently Selected:
YEREMIYAS 42: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
