YEREMIYAS 2
2
DI VUN-JOBTA KAY YUDA HIƊI YERUSALEM
Bay-ɗigerta vi sum sa Israyella
1Ma-Vatɗin ka di yoboyn tan ala:
2Tuɗaŋu, lawaŋ hay hum Yerusalem ala:
Ma-Vatɗina ka di ala:
Human ganu kay minda vagu,
hay li ma nak ay goy daray tuwa,
hay li ma nak ay tapi kuɗan hay fulda,
hay liyn ma karaŋŋa.
3Sum sa Israyella tuwsi ay vuli mi Ma-Vatɗina,
nisi mi vun-jaf ma jewna vi slen ma nam fumna;
nisi kaf sa mutumu fi lawta joota,
joot nig gaa kisiya,
din mi Ma-Vatɗina.
4Humgi yoboyna vi Ma-Vatɗina,
nigi jafna vi Yakub,
nigi sa hay jafna vi Israyel kafe.
5Ma-Vatɗin ka di ala:
Jiw-zlata ta sumaygi fa' hayanta ti tarige,
kay a nisi ja jarsi goy hiɗi nanu?
Kay tap kuɗ slen ma waana,
a muɗ tuwsi goy waa'a kaw?
6Nisi di ala Ma-Vatɗina
ma yaway ay goy hay Egipte pan ka arige ɗisu?
Ma-Vatɗina ma tun vokay hay fulda,
hay nagata ta goy soy kaŋ-karaŋ',
ta muni kirna'a,
hay nagata ta koɓoron ka haya,
ŋus-mitta ka ti mul haya kaw,
hay nagata ta sa as jik haya'ɗi,
sa as li ziy hayɗi kaw,
nisi may di naɗi su?
7Nan margi hay nagata ta goɗiya,
kay nigi ma ti vuɗ-guna ma ŋaana ma hayna.
may nigi maawa,
nigi muɗ nagata vanawa liwisi.
Vocota vanu nigi muɗa' goy liwis suwa.
8Muliyan-sa-ɗifinna di ala:
Ma-Vatɗina ka arige ɗisu?
Sa ŋom vun-ma-gatna may wanɗi,
sum sa ŋomda may vi kuɗanɗi,
sa jobta law hay sem Baal,
nisi kalay kuɗ sle ma as gutsiɗina.
9Kay na'ta nan min ci wayt hiɗi nigi lo,
Din mi Ma-Vatɗina,
nan min ci wayt hiɗi gurona vi gurona vigiya.
10Tuɗgi tam jokona vi Kittim sargi tige,
cukgi sumun hay Kedar peɗgit goy ŋaa'a tige,
ɗuwgiya la slen ma ki kayn nala may liɗi su?
11Jaf-sum sa muɗ lawayna visi ka su?
La nisi may laway ma gasiɗi kaw?
Sumuna vanu muɗ gajijita visi goy hiɗi va ma gutɗina.
12Dukalawna, muɗgi ɦuyum' kuɗ kayni,
tuwgi muɗ vigi bat-bat',
tuwgi muɗ wirgi kaw kuɗ kayni,
din mi Ma-Vatɗina.
13Kay sumuna vanu li sulukawa sem ma':
nisi noyanawa goyo,
nanu kaara ma law niyn ma irina,
nisi kalay jugoɗ kaar mara'a,
kaar ma baŋ-baŋŋa ma vi niyɗina.
14Israyel mi gorvo ma gusum gusiya lebo vuɗ vo hay ziyn su?
Nala sumun ka vurumsiya kay mige?
15Guro zlo-joriyona ka ci gum katsiya,
ka pat ciriyna, nisi ka ti nagata visi ɓuraŋi,
hoyok-ziyna visi ŋalay goyo,
sa may hini hay ziyn loɗi,
16gurona vi Nof hiɗi gurona vi Takpanes kaw ma welgi yigi goyo.#2:16 Nof hiɗi Takpenes kayni hay Egipte.
17Van kayni ma co kigi ɗawni kuɗ ta ala
nigi noy Ma-Vatɗina Lawna vigi goyo,
hay li ma nam ay tuni vokgi hay hagata ŋaata ɗisu?
18Wulin kayni,
ŋaata mige kay nigi tuɗ hay Egipte kay ci kuɗ niy-lumna Nil?
Ŋaata mige kay nigi tuɗ hay Asiriya kay ci kuɗ niy-lumna va'a?
19Joota vigiya ma watgiya,
bay-ɗigerta vigiya ma ka kitat kigiya,
nigi ma wi ala a noyan nan Ma-Vatɗina Lawna vigi goyo,
a li nar kuɗanɗi kaw,
kayni mi va ma joo'o ma galak ŋolo.
Din mi Bum-Sumuna,
Ma-Vatɗina vi vok-ma-duura.
20Jew ɓa-ɓa nan kus juk ma tuni pelgin goyo,
ja zigewn goyo.
Nigi di ala: Numa min lak hay gorvot loɗi.
May kulo kay liy ma ɗiŋiriŋ kaf,
gaa kuɗ gu ma ŋulomna kaf,
nigi girif gaa'a ki cata viyuwta nala.
21Nan pigi gaa kayni ki gulda-guldana ma ŋaana nala,
ki jaf-gu ma ŋaana nala; may nigi muɗawa,
jok jafgi ki gulda-gulda ma joon nala lo kay mige?
22La nigi muz tuwgi goy hiɗi zekŋa,
la nigi mus tuwgi goy hiɗi sabun ir ŋolo kaw,
sulukŋa vigi ma hin vok iran waŋ,
din mi Bum-Sumuna Ma-Vatɗina.
23hiɗi yal mige nigi as di ala:
Numa may li tuwma liwisɗi,
numa may tuɗ kuɗ Baalɗi?
Ɗuwgi (baŋal) segi hay lokŋa,
wigi va ma nigi lumna,
lamgana ma jaŋŋa valam hefteŋe ma poy waana!
24Kuro ma fulla,
ma hatay hiɗi fulda,
ma darta valamu his simeɗna,
sa ma as telemu kay hob darta valamɗi mi gige?
Nisi kaf sa garamu may mak kay gartaɗi,
nisi fumu hay tilla valamu.
25Li ŋali kay segi ma hin goy bay tuguruɗi,
so goslgi goyɗi.
May nigi di'e: Kayni ɦawa'a, a'a,
numa minsi si laway sa pulla,
numa min tuɗ kuɗsiya.
26Ki sa ma kulla zulot bowomu
hay li ma sumun vumawa nala,
sum sa hay jafna vi Israyel kaw zulot ma bowsiya,
nisiya, muliyana visiya, sa ŋulona visiya,
muliyan-sa-ɗifinna hiɗi sa jobta visiya.
27Nisi di tam guna: naŋu mi bunu,
nisi di tam hiɗiyna:
naŋu mi ma vulan irita.
Nisi muɗan ŋorsiyawa, nisi may ɗuwanɗi.
Hay li ma nisi ka hay vun-zlata, nisi di'e:
Fokaŋ kulo'o, suɗma'a.
28Lawayna vigiya ma nigi kotomna ka arige?
Hinim fok kulo'o,
la nam as suɗgi goyo hay buura ma joona?
Kay lawayna vigiya hiɗi hoyok-ziyna vigi ka ŋolo,
nigi jafna vi Yuda.
29Nisi as ci way hiɗi nan kay mige?
Nigi kaf min vi kuɗanɗi, din mi Ma-Vatɗina.
30Gurona vigi nan watsi kayni,
mi mak tuw ɦawa;
nisi min hum gatta noŋɗi;
kew-gaferaŋa vigiya wat sa jobta vigiya,
ki zlona ma ɓulak slena nala.
31Nigi sum sa bogiyom tuwgina,
vargi kay yoboyna vi Ma-Vatɗina,
nan ay kay sa Israyella ki fulda nala su?
Lebo nagata ta jufun nili su?
Sumuna van di ala «numa goy butiya,
numa min hot kataŋɗi»
nisi di nala kay mige?
32Goot-cata ya' as jok ganna va' su?
Goot-cata darayta ya' as jok bagasina va' su?
May sumuna vanu yisi jokanawa ir buur ŋolo.
33Kay nigi ka hiɗi yalda hay hagata vigiya
kay gar va ma nigi minimna,
nigi li kayni hay ci-matta.
34Busuw sum sa may li va ma jooɗina
ka goɓi hay vun-sligara vigiya,
sum sa nigi may fisi vun law ma joo noŋɗina.
35hiɗi kayni kaf nigi ka di ala,
joo vuma mayɗi,
Lawna vat ɦiyda valamawa goy katma'a.
Nala nan min ci way hiɗi nigiya,
kay nigi di ala nigi may li sulukɗi.
36Nigi muzuk tuwgi ŋolo
kay muɗ hagata vigiya kay mige?
Zulota vigi ma may goy hay Egipte pa
ki na' may goy hay Asiriya nala kaw.
37Hay ɗawni pa kaw nigi ma cukay goyo
hiɗi ɓigi cuki kisiya;
kay sum sa nigi vi haysina Ma-Vatɗina noysi goyo,
nigi as fi va kuɗsiɗi.
Currently Selected:
YEREMIYAS 2: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001