SA KA KITANA 18
18
Sumuna vi Dan yaw slen ma girifimna, nisi vi mul-ma-difinna lay
1Hay li namna kayni, mul may hay Israyel noŋɗi, sumuna vi Dan kaw ka gar liyn ma cuk ziyna visi hayamna, kay ta-ta wulini, liyn ma voco visi hayam ki gurona vi Israyel segen nala mayɗi. 2Gurona vi Dan ɗuw jar sumuna visi kaf, nisi vilek sum sa ŋulo sa dono vasl, nisi cuksis hay Soreya hiɗi Estahol pa kay nisi ma tuɗ ɗuw gul-liyna vi nagata, sara' goy ŋaa'a. Nisi di tisiya: Tuɗgiya, fekgi nagata. Nisi co kulo kay hiɗiyta vi Efrayim, nala nisi co hay ziyna vi Mikka, nisi bur haya. 3Hay li ma nisi ka hay ziyna vi Mikka kayni, nisi hum del sa ma Levitna ma joriyona, nisi co talamu dumu: Maran tani mi mige? Naŋ lum hay liyn tan zawn mi mige? Va ma ka kaŋ tani mi mige? 4Nam ka hotsi dita: Mikka ka li slen mara'a mara'a tanu, nam ka wurakan gurju'u, nan ka sunumu ki mul-ma-ɗifinna valam nala.
5Nisi dumu: Naŋ jobma Lawn tige, rogoyta vuma ɗawn ma li hay liya'a kaw su? 6Mul-ma-ɗifinna ka hotsi dita: Tuɗgi migi hiɗi toyta, kay rogoyta vigi na'ta kayni Lawna iram ka cuki ka'a.
7Sum sa vaslna kaliya, nisi co hay Layis. Sum sa hay naga na'tina nisi fisi lakay nisi hay sle'ta lak' ki sum sa Sidoniyan nala, lakay ŋal kiliŋ, va ma ɓirsi diksi may noŋɗi; sa mara ma lisi law ma ti tuwu lebo gar a ti mul kisiya kaw may hay nagata visi kep noŋɗi, jarsi ka goy gine hiɗi sum sa Sidonna, haga may jarsi hiɗi sum sara noŋɗi. 8Nisi hotay tam ɓosiyosina hay Soreya hiɗi Estahol, ɓosiyosin di tisiya: Nigi marayt mi labar mige? Nisi hotsi dit ala: 9Tuɗaygiya, naygi mokay sum nisina, kay naga na'ta numa wa'ayawa, naga na'ta kayn ŋaa'a, nigi ma vi yigi noŋɗi, lakgi ŋal kiliŋ loɗi, slaygi hagata, kay nay min kal sli naga na'ta. 10Naga na'ta hay li ma nigi coowa haya'ana, sum nisin nigi fisi ɗawn lakay hay sle'ta lak', naga na'ta beɗay ŋolo, may Lawn vula'awa hay ɓigiya; naga na'ta kayni, va mara ma hay nagat tani ma fum haya'ɗin mayɗi.
11Sumuna kis-karkiya hay jafna vi Dan fokis hay Soreya hiɗi Estahol pa, slen ma buura visi kisi kotiya. 12Nisi jik kulo'o, nisi tun farana visi hay Kiryat-Yeyarim hay Yuda; kuɗ kayni liyn namna, ma ka goy bugol Kiryat-yeyarim ta-ta vaydi nisi ka yum ala Makane-Dan.
13Hay ɗawnis pa nisi jik tam hiɗiyta vi Efrayim, co ta-ta hay ziyna vi Mikka. 14Sum sa vasl sa tuɗ ɗuw gul-liyna hay nagata vi Layisna sli ditiya di tam ɓosiyosina: Ziyn tani sligar ma cukum tam mul-ma-ɗifin ka haya, terafim ka hay lay, va ma sli tuw san ma ceɗayna hiɗi ma yorayna ka hay lay kafe kayn kirgi su? Ɗuwgi va ma nigi ma lumna.
15Nisi ma tam liy namna goboyo, cuk kalaf hay ziyna vi sa ma joriyona ma Levitna, kayni hay ziyna vi Mikka. Nisi gum deɓe.
16Gurona vi Dan sa kis-karkiyana jun fursiya hiɗi sle-ma-duura visiya, zlar goy vun-gala'a. 17Sum sa vaslna sa tuɗ ɗuw gul liyn jewna cuk kalaf hay ziyda; nisi sli va ma ceɗayna, yaw sligara ma li ɗifin hiɗi namna, yaw terafimna, sli va ma sli tuw sana ma yorayna. Hay na'ta mul-ma-ɗifinna ay goy hay vun-galana kat sum sa kis-karkiya sa fursi juni jun' hiɗi sle-ma-duura visina. 18Hay li ma nisi cuk kalaf vi Mikka, nisi ka yaw va ma sli tuw sana ma ceɗayna hiɗi ma yorayna, hiɗi sligar ma li ɗifin hiɗi namna, kaway ma yorayn kaw, mul-ma-ɗifinna wisiya, nam ka disiya: Ele! Nigi ligit kayn mi mige? 19Nisi dum ala baŋ vunaŋu, dukaŋ ɓaŋ ka vunaŋu, tapaŋay tapi kuɗma'a, naŋ ma li lop kuma'a ki bumna vuma'a nala, ki mul-ma-ɗifinna vuma nala lay. Kiraŋ ŋaan kayn ma naŋ li lop mul-ma-ɗifinna kay ziyna vi sa ma kepna lebo, ma naŋ li lop mul-ma-ɗifinna hay jafna vi san noŋ ta' hay Israyel su? 20Mul-ma-ɗifinna dikam li firiya, nam yaw sligar ma li ɗifin hiɗi namna, yaw terafimna, hiɗi va ma ceɗayna kaf kaw, tap kuɗ sum nisina.
21Nisi tun goy hay hagat zirliŋ', gurosgurayn nisi tunsi voko, farayn lay jakŋ lay nisi tunis bugolom may. 22Hay li ma nisi kal goy gine hiɗi ziyna vi Mikka kalla, sum sa hay hoyok-ziyna vi Mikkana tok tuwsiya, nisi yaw jaŋ kuɗ gurona vi Dan. 23Nisi siwel tam gurona vi Dan. Gurona vi Dan muɗ irsi ay kirsiya di tam Mikka: Naŋ zat sumuni kuɗaŋ kayn mingit mige? 24Mikka disiya: Lawayna van ma nan kotomna yawi ay kigiya, mul-ma-ɗifinna van viy ay kigiya, nigi kalay hiɗi nam kaf, nigi may hinan va mara ay kan noŋɗi, may nigi as dan ala nan minim mige lo litige? 25Gurona vi Dan dumu: Numa humaŋ delaŋ law kulo goboy tuma tani loɗi, la naɗina, hay li ma sumuna vuma sa galakŋa futisawa jargiya ni, naŋ lay sumuna vaŋ lay sa as hin kuɗgi iri loɗi. 26Gurona vi Dan tun irsi voksi hay hagata; Mikka sar ta-ta kayni nisi dono suwumu, nam muɗ iram malam bugolomu, hot vo'o.
Nisi sli nagat Layis, in hoyok-ziyna vi Dan haya in liyn ma ɗifinna kaw
27Slen ma Mikka kotomna hiɗi mul-ma-ɗifinna valam kaw nisi kalawa hiɗi namu, nisi co hay Layis, nisi co kayn kay sum sa lakay ŋal kiliŋ, sum sa lakay misi hay sle'ta lak', nisi cal sum nisin hiɗi kew-gaferaŋa, nisi do kut kuɗ hoyok-ziyna. 28Sa kep kaw co kay but hoyok-ziyn namna goy hay ɓisiɗi, kay hoyok-ziyn namna ay goy gine hiɗi Sidon, sum sa hayamna haga mara ma jarsi hiɗi sum sara mayɗi. Kay ziy namna ka kayn hay liyn ma beɗna ma jik tam Bet-Rehobna. Gurona vi Dan hot in hoyok-ziy namna kulo'o, lak hayam ziya. 29Nisi tunum selem ala Dan. Tunum selem na kayn kuɗ sem Dan ma busina, ma vuɗi ay hay Israyella. Hoyok-ziy namna yum jewe ala Layis. 30Va ma sli tuw sana ma ceɗayna nisi colom voksiya. Yonatan goora vi Gerson, goor-ŋolona vi Musus hiɗi gurona valam li lopna vi ɗifinna kay jafna vi Dan. Nisi li lop ma ɗifinna ta-ta hay li ma sum sa hay nagat na'ta yawsis goy gorvona. 31Hay li ma ziyda vi Lawna ka jarsi hay Silo kayni, va ma sli tuw sana ma Mikka kotomna nisi ŋomom haya' dok-doko.
Currently Selected:
SA KA KITANA 18: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001