EZEKIYEL 6
6
Vun-jobta kat nagata vi Israyel
1Ma-Vatɗina ka di yoboyn tan ala:
2Goora vi sana,
muɗaŋ iraŋ kir hiɗiyna vi Israyel,
naŋ ma di vun-jobta katsiya.
3Naŋ ma di ala:
Nigi hiɗiyna vi Israyel,
humgi yoboyna vi Bum-Sumuna Ma-Vatɗina:
Kayni mi va ma Bum-Sumuna Ma-Vatɗina dumu,
kat hiɗiyna vi Israyel hiɗi jiŋiliŋŋa kafe,
tam ɦor-ɦuɗukŋa hiɗi liy ma lokŋa ala:
Nan cooyawa,
nan min hin kew-gaferaŋa co katgiya,
nan ma to liyn ma ɗiŋiriŋŋa vigi gaa'a.
4Giwin-ma-ɗifinna vigi ma hin goy ɦawa'a,
slena vigi ma girif fatta ma toys gaa'a,
sa mitina vigiya nan ma cuksi gaa kuɗ lawayn ma waana vigiya.
5Nan ma cuk ŋumna vi sa Israyella gaa vok lawayn waana visiya,
nan ma mergi zokgi goy kat giwin-ma-ɗifinna vigiya.
6Hay liyn kaf ma nigi ka lakay ziy haya,
hoyok-ziyna vigi ma ɦoys gaa'a,
liyn ma ɗiŋiriŋŋa vigiya ma hinis goy ɦawa'a,
giwin-ma-ɗifinna vigiya,
ma nigi ɓulak tuwgi hiɗi namna ma toys goyo,
lawayn ma waana vigiya ma to goyo,
ma vatis goyo,
slen ma girif fatta vigi ma kusis gaa'a,
lopna vigi kaf ma ɦasis goyo.
7Sumun ma mit ŋolo kuɗgiya,
nala nigi ma wi ala nanu mi Ma-Vatɗina.
8May nan ma hin cawgi mara'a,
sa hin goy kuɗ kew-gaferaŋa jar jaf-sumuna,
hay li ma nigi ma meris goy hay nagat kafe.
9Bugol kayni goy jar jaf-sum sa ligi gorvo hay nagata visin pa,
caw sumuna vigi sa hin goyna humsi ma gisi kanu,
a nanige nan muɗ ɦiya kay diksi ma viyuwna,
nanige nan gisi irsi goy gine'e hiɗi nanu kaw,
hiɗi irsiya ma muɗi viyuwu kuɗ lawayn waana visiya.
Nisi ma as kay cuk irsi kir tuwsi loɗi,
kuɗ joota ta nisi la'a hiɗi liwista visi kafe.
10Nisi ma wi ala nanu mi Ma-Vatɗina,
nan may law tisi kayni goy ɦawaɗi,
nan gi joot kisi kayni may ɦawaɗi kaw.
11Ki kayn nala Bum-Sumuna Ma-Vatɗina di'e:
Cigi ɓigiya, dabgi segi gaa kaw,
digi ala: Oy i ɦiya!
Kuɗ lop ma liwisna vi jaf sa Israyella,
nisi ma puk gaa'a kay kew-gaferaŋa,
mayta hiɗi bakmarana.
12Nam ma ka goy gine'e bakmaran ma cumu,
nam ma ka goboyo kew-gaferaŋa ma cumu,
nam ma hinna nisi ma mokomu,
mayt ma cum goyo.
Nan ma dab yam ɦiyda van goy katsiya.
13Nala nigi ma wi ala nanu mi Ma-Vatɗina.
Kayni hay li ma sumun ma mitis gaa kuɗ lawayn ma waana visiya,
kat giwin-ma-ɗifinna visiya,
kulo kay liyn ma jiŋiliŋŋa kafe,
kulo kay yam hiɗiyn kafe,
gaa kuɗ gu ma ŋulomna kafe,
gaa kuɗ gu-ma'asna ma humam goy dasayna kafe,
hay liyn ma nisi ay li ɗifini,
hiɗi urdina ma his fayna tam lawayn ma waana visi kafe.
14Nan ma meɗ ɓan goy kisiya,
nan ma hin nagat goy ɦawa'a,
ziy may ka'ɗi ki fulda vi Dibla nala,#6:14 Fulda vi Dibla Segen ɗo ala Ribla.
hay liyn ma nisi ka li ziy hayamna kafe,
nisi ma wi ala nanu mi Ma-Vatɗina.
Currently Selected:
EZEKIYEL 6: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
