EZEKIYEL 48

1Kayni mi semda vi jafna. Fokay hay sin liy ma gaan pa, kuɗ fiyokka vi hagata vi Hetlon tam Hamat, Hatsar-Enon, jaara vi Damas gal gaa'a vi Hamat hay kuɗuwu ta-ta vulatiya, jaf kepe. Mi jafna vi Dan. 2Hay jaara vi Dan, hay gal kuɗuwu ta-ta vulatiya, jaf kepe. Mi jafna vi Aser. 3Hay jaara vi Aser, hay gal kuɗuwu ta-ta vulatiya, jaf kepe. Mi jafna vi Neftali. 4Hay jaara vi Neftali, hay kuɗuwu ta-ta vulatiya, jaf kepe. Jafna vi Manase. 5Hay jaara vi Manase, hay kuɗuwu ta-ta vulatiya, jaf kepe, jafna vi Efrayim. 6Hay jaara vi Efrayim, hay kuɗuwu ta-ta vulatiya, jaf kepe, jafna vi Ruben. 7Hay jaara vi Ruben, hay kuɗuwu ta-ta vulatiya, jaf kepe. Jafna vi Yuda.

8Hay jaara vi Yuda, hay kuɗuwu ta-ta vulatiya, kayni mi galla ma nigi ma slum iram goyna. Buɗukka valamu ir goldoŋ birim dok-ma' yam vasl, fiyokka valamu ŋray ca hiɗi galla ma fokay kuɗuwu ta-ta hay vulatiya nala; Liyn ma peldetna ma li kalaf jaramu. 9Liyn ma nigi ma slum iram goy mi Ma-Vatɗina fiyokka valam ma li ir goldoŋ birim dok-ma' yam vasl, buɗukka valam ir goldoŋ birim doogo. 10Ir liy namna ma peldetna ma hin ɗawni vi muliyan-sa-ɗifinna: Goldoŋ birim dok-ma' yam vasl hay gal gaa'a, goldoŋ birim doogo kuɗ buɗukamu hay gal vulatiya, goldoŋ birim doogo kuɗ buɗukamu hay gal kuɗuwu, goldoŋ birim dok-ma' yam vasl kuɗ fiyokomu hay gal kayami, liyn ma peldetna vi Ma-Vatɗina ma in kalaf jaramu may. 11Liy namna ma hin vi muliyan-sa-ɗifinna sa vuli goyna jar gurona vi Sadok, sa li lopna van ŋaa'a, sa min cal goyɗi hay li ma sum sa Israyella ka cal goyo, ki sa Levitna cal goyo nala. 12Nam ma muɗ visiya ki galla ma peldet ŋolo nala, iram sliy goyo kuɗ galla vi nagata ta ira' sliy goyta, hay jaara vi Levi.

13Ŋray dig jaara vi muliyan-sa-ɗifinna kaw, sa Levitna ma fi liyna ir goldoŋ birim dok-ma' yam vasl kuɗ fiyokomu, goldoŋ birim doogo kuɗ buɗukamu, goldoŋ birim dok-ma' yam vasl kay fiyokom noŋ kafe, goldoŋ birim doogo kay buɗukamu. 14Nisi as gus mara goy kuɗumɗi, nisi as muɗumɗi, vul vun jaf ma jewna vi nagata goy ɦawaɗi, kay nam vuli ɗifin tam Ma-Vatɗina.

15Goldoŋ ma birim vaslna ma hin goy kuɗ buɗukamu kuɗ goldoŋ ma birim dok-ma' yam vaslna, ma hin ɗawn mi liyn ma waana, kay hoyok-ziyna, kay sa lakay hayamna, kay voora valamu; hoyok-ziyna ma hin kulo jari may. 16Kayni mi ŋaɓta valamu: Hay gal ma gaana, goldoŋ birim fiɗi hiɗi diram kis-vasl; gal ma kayamna, goldoŋ birim fiɗi kalam kis-vasl; gal ma kuɗuwna, goldoŋ birim fiɗi hiɗi kis-vasl; gal ma vulatina, goldoŋ birim fiɗi hiɗi kis-vasl. 17Voora vi hoyok-ziyna ma li ɗawni: Goldoŋ kis-ma' kalam dok-vasl hay gal gaa'a; goldoŋ kis-ma' kalam dok-vasl hay gal kayami; goldoŋ kis-ma' kalam dok-vasl hay gal kuɗuwu; goloŋ kis-ma' kalam dok-vasl hay gal vulatiya. 18Cawam ma hini kuɗ fiyokka valamna, ŋray dig liyn ma peldetna, goldoŋ birim doogo hay gal kuɗuwu, goldoŋ birim doogo hay gal vulatiya, kayni ma li ŋray dig liy ma peldetna, kay kayni mi ir liyna vi hoyok-ziyna, vuɗna valamu ma lin mi tina vi sa li lop hay hoyok-ziyna. 19Nisi sa li lopna vi hoyok-ziyna kuɗ jafna vi Israyel kaf, nisi ma zum liy namna. 20Gal ma nisi slum iram goyn kaf ma li ir goldoŋ birim dok-ma' yam vasl kuɗ gefem hena kaw; gal ma fiɗina vi hoyok-ziyna nigi ma poŋom iram goyo kay vulum mi hoyok-ziyna.

21Ma hin goyna ma li vi mulla, hay gal ma ma'na vi liyn ma peldetna, hiɗi vi hoyok-ziyna, kuɗ fiyokŋa vi goldoŋ ma birim dok-ma' yam vaslna vi gal ma slum iram goyna, ta-ta hay jaara ma gal kuɗuwna, hay gal ma vulatina kuɗ fiyokka vi goldoŋ ma birim dok-ma' yam vaslna, hay jaara ma gal vulatina, ŋray dig liyn ma ɓurawayna. Kayni ma li mi liyna vi mulla. Galla ma peldetna hiɗi liy ma peldetna vi Ziyda ma hin kulo hay jaara. 22Galla vi mulla ma li ɗawni hay jaara vi sa Levitna hiɗi jaara vi hoyok-ziyna; ma ka hay jaara vi Yuda hiɗi jaara vi Benyamin ma li vi mulla.

23Kayni mi jafna ma hinina. Fokay hay kuɗuwu ta-ta vulatiya, jaf kep. Jafna vi Benyamin. 24Hay jaara vi Benyamin, hay kuɗuwu ta-ta hay vulatiya, jaf kepe. Jafna vi Simeyon. 25Hay jaara vi Simeyon, hay kuɗuwu ta-ta hay vulatiya, jaf kepe. Jafna vi Isakar. 26Hay jaara vi Isakar hay kuɗuwu ta-ta hay vulatiya, jaf kepe, jafna vi Zabulon. 27Hay jaara vi Zabulon hay kuɗuwu ta-ta hay vulatiya, jaf kepe. Jafna vi Gad. 28Hay jaara vi Gad, hay gal ma kayamna, jaara ma fokis hay Tamar pa ta-ta tam niyna vi Meriba hay Kades, ta-ta tam niy-ma-riŋŋa kat niy ma ŋolla. 29Kayni ti nagata ta nigi ma ɓurawa' voco'o hiɗi ŋaɓta kuɗ ɦayta kay jafna vi Israyel, kayni mi ir liyna visiya kaw. Din mi Bum-Sumuna Ma-Vatɗina.

30Kayni mi vun-galana vi hoyok-ziyna ma kal goyna. Gal ma gaana ŋa goldoŋ birim fiɗi hiɗi kis-vasl. 31Vun-galana vi hoyok-ziyna hiɗi sem jafna vi Israyel, vun-galan ɦidi gal gaa'a; vun-galan kep kay Ruben, vun-galan kep kay Yuda, vun-galan kep kay Levi; 32hay gal ma kuɗuwna, goldoŋ birim fiɗi hiɗi diram kis-vasl. Vun-galan ɦidi. Vun-galan kep kay Yosef, vun-galan kep kay Benyamin, vun-galan kep kay Dan; 33hay gal ma kayamna, goldoŋ birim fiɗi hiɗi diram kis-vasl. Vun-galan ɦidi. Vun-galan kep kay Simeyon, vun-galan kep kay Isakar, vun-galan kep kay Zabulon; 34hay gal ma vulatina; goldoŋ birim fiɗi hiɗi diram kis-vasl. Vun-galan ɦidi. Vun-galan kep kay Gad, vun-galan kep kay Aser, vun-galan kep kay Neftali. 35Ŋuyna vi tuwamu: Goldoŋ birim doogo yam glafandi. Hay buur na'ta pa, hoyok-ziyna ma yum ala «Ma-Vatɗina ka tani.»

Currently Selected:

EZEKIYEL 48: Massana

Highlight

Compare

Copy