EZEKIYEL 42

Ziy guray ma tam Tempella

1Nam kalan goyo hay wur-daŋŋa ma jiyna, hay gal ma gaana, nam tuɗan kat ziy ma kalafna ma ka ɗiger vok liyn ma goy ɦawana, ɗiger vok ziyna, hay gal gaa'a. 2Goy hay vok-ziyna, hay liyn ma vun-ziyna ma gaana ka'a, fiyokka valam ir goldoŋ kis, buɗukka valam ir goldoŋ dok-vasl. 3Kayni ay ɗiger vok goldoŋ ma dok-ma'na vi wur-daŋŋa ma hay kalafna, ɗiger vok yam nagata ma dakay gaana vi wur-daŋŋa ma goy jiyna. Haga ma kalafna ka ŋray dig haga hen ma kalafna, kuɗ ziy ma jakay kulo kay tuwam ɦidina. 4Goy vok ziy ma kalafna, liyn ma tuɗna ka'a, ma be'da valam ir goldoŋ doogo hay kalafi, haga heta ir goldoŋ kepe kaw; vunam mali hay gal gaa'a. 5Ziy ma kalafna ma kulona hebay suw ziy ma kalafna ma gaana hiɗi ma jaara, kay haga ma kalafna ka yaw liyn goy kalamu. 6Ziy ma jakay kay tuwamna ka ɦidi. May dolla may hayam ki dolla vi wur-daŋŋa nalaɗi. Kuɗ na'ta kayni, fokis gaa vi nagat pa, ziy ma kalafna ma kulona nam hebay suw ziy ma kalafna ma gaana hiɗi ma jaara. 7Gulmun ma goy jiyna, ma kuɗ fiyokka vi ziy ma kalafna, hay galla vi wur-daŋŋa ma goy jiyna, ɗiger vok ziy ma kalafna, fiyokka valam ir goldoŋ dok-vasl. 8Fiyokka vi ziy ma kalafna hay galla vi wur-daŋŋa ma goy jiyna ir goldoŋ dok-vasl, may goy ɗiger vok Tempella, goldoŋ ka kis. 9Gaa kuɗ ziy ma kalafna namna, liyn ma kal kalafi hay gal kuɗuwna ka'a, jikay kayni hay wur-daŋŋa ma goy jiyn pa.

10Ziy guray hegena ka kuɗ buɗukŋa vi gulmunna vi wur-daŋŋa, hay gal ma kuɗuwna, ɗiger vok liyn ma goy ɦawana, ɗiger vok ziyda kaw. 11Goy vokomu, liyn ma tuɗna ka'a, ki vok ziy ma kalafna ma ka hay gal ma kuɗuwna nala. Fiyokka hiɗi buɗukka ŋray ca; liyn ma kal goyna, lakka valamu hiɗi vun-ziyna valamu kaf ŋray ca. 12Ŋray ca nala kaw kay vun-ziyna vi ziy ma kalafna ma hay gal kayamna liyn ma kal kalafna ka kulo kay hagat kepe, hagata ta ka ɗiger vok gulmunna ma ŋray diga'a, hagata ta may kuɗuw pa, hay li ma san tuɗ kat ziy ma kalafna. 13Nam di tanu: Ziy ma kalafna ma gal gaana, ziy ma kalafna ma gal kayamna, ma ka vok liyn ma goy ɦawana, kayni mi ziy ma peldetna, muliyan-sa-ɗifinna sa co vok ir Ma-Vatɗina ma ti slen ma peldet suwina haya; nisi ma lak sle ma peldet suwina haya, vulda-ɦawata, faray ma ŋatiya hay ɗifinna vi poora, hiɗi ɗifinna vi jiw-zlata; kay liyn kayni peldete. 14Hay li ma muliyan-sa-ɗifinna ma cuk kalafi hay liyn ma peldetna, nisi ma kalay goy hay wur-daŋŋa ma goy jiyna gosoy deɗi, may sligara visi ma nisi li lop hiɗi namna nisi ma hinim kalaf hay liy namna lak', kay sligar namna kayni peldete; nisi ma cuk sligar mara tisiya kay co hay liy ma sumun lak hayamna.

15Hay li ma nam vat ŋaɓta vi hay ziyd ma kalafna vatna, nam kalanay goyo hay vun-ziyna ma gal kuɗuwna, nam ŋaɓ haya' ma kalafna kafe. 16Nam ŋaɓ gal ma kuɗuwna hiɗi zugulda ta ŋaɓta, nam co noŋ pet ir zugul kis-vasl, 17nam ŋaɓ gal ma gaana hiɗi zugulda ta ŋaɓta, nam co noŋ pet ir zugulda kis-vasl. 18Nam ŋaɓ gal ma kayamna hiɗi zugul ta ŋaɓta, nam co noŋ pet ir zugul kis-vasl. 19Nam muɗ iram hay gal ma vulatina, nam ŋaɓam goyo hiɗi zugulda ta ŋaɓta, nam co noŋ pet ir zugulda kis-vasl. 20Nam ŋaɓ tuw gulmunna hay gefem ma fiɗin pete: Fiyokka valamu ir zugul kis-vasl, ɓuɗukka valam ir zugul kis-vasl. Gulmun namna ɓuraw jar liyn ma peldetna hiɗi liyn ma waana.

Currently Selected:

EZEKIYEL 42: Massana

Highlight

Copy

Compare