EZEKIYEL 4

1May naŋu, goora vi sana, slaŋ direŋgel kepe. Naŋ ma colom goy vokaŋ zaw, naŋ ma ɓir hoyok-ziyna Yerusalem kulo kalamu. 2Bugol kayni, naŋ ma ŋuy tuw hoyok-ziy namna, naŋ ma gi zlaɓ tam hoyok-ziy namna, naŋ ma gi dam talamu, naŋ ma ŋuy kaŋŋa kat hoyok-ziy namna; naŋ ma ŋuy fok-gamalana goy talam kafe. 3Lo naŋu, slaŋ doŋolayt ta kawayt kepe, naŋ ma tuna' jaraŋ naŋu hiɗi hoyok-ziyna ki gulmun ma kawayn nala; naŋ ma cuk iraŋ kira'a, naŋ ma ŋuya'a may. Na' ma li ŋuyiya. Kayni ma liys ti ɗekka kay ziyna vi sa Israyella.

4May naŋu, buraŋ gaa'a hay galaŋ ma gulla, tun joota vi sa Israyella hay galaŋ namna. Naŋ ma ziy joota vi sa Israyella ta-ta hay li ma naŋ ka buri gaa hay galaŋ namna tuwa. 5Buur ma nan min tunum kaŋŋa ŋiray ca hiɗi busata ta nisi li joota. Buurta kis-ɦidi kalam dok-zleeŋe, ki kayn nala naŋ ma ziy joota vi jafna vi sa Israyella. 6Buur namna cani hay li ma naŋ vatamawa, muɗaŋ jurlo hay galaŋ ma jufna, naŋ ma ziy joota vi jafna vi Yuda ir buur dok-fiɗi, nan tun buur kaŋ kep kep ŋiray ir busat kep kep kaw. 7Naŋ ma muɗ iraŋu hiɗi gilaŋataŋu ma goy foki nalana kir Yerusalem, naŋ ma di vun-jobta kat Yerusalem ta ŋuyita. 8Humaŋu, nan ma cukaŋ zigewn kataŋu, kay naŋ ma muɗ goy gal henɗi, muɗ goy gal henɗi kaw, ta-ta buur ma naŋ ŋuy Yerusalemna vat goy tuwa.

9May naŋu, yawaŋ alkamarena hiɗi orgena, dakalawna hiɗi naayna, cayna hiɗi doŋoloŋŋa, naŋ giliɓim hay tasat na kepe, naŋ ma kotom fuwa, naŋ ma tumu dok-dok hay li ma naŋ ka buri gaa hay galaŋ jurlo tuwana, naŋ ma tumu ir buur kis-ɦidi kalam dok-zleeŋe. 10Tin namna naŋ ma tumu, naŋ ma ŋom tuwaŋ hiɗi namu ir sikel dok-ma' hay buurta kepta. Kayni mi tina ma naŋ ma tumu hay buur namna kaf cani. 11Niy ma naŋ cumna naŋ ma ŋiram ŋiraya, ci gal ma karkiyana vi gasasta. Kayni mi niy ma naŋ ma cum hay buur namna kaf cani. 12Naŋ ma beɗ hambul orgena, lum hambulu, cuk suɗoy sa-wuran gaa kuɗumu kay cufum hiɗi namu, nisi ma wumis hiɗi irsi kafe. 13Lo Ma-Vatɗina di'e: Ki kayn nala sum sa Israyella ma ti tina visi ma liwisna, jar jaf-sum sa nan min digiɗsi goy jarsina.

14Nan di'e: Heh! Bum-Sumuna Ma-Vatɗina, slen ma liwisna kaf telay kanu; hay joriyota van pa ta-ta vaydi, muur ma mit waa'a lebo jetem goy mi va'a kaw, nan bay tunum hay vunan tuwa. 15Nam hot di tanu, wulini suɗoy sa-wurana nan min vurnam hiɗi zigidik luwayna, naŋ ma li funa vaŋ kulo kalamu. 16Nam di tan lo: Goora vi sana, nan min yaw tin goy vun sum sa Yerusalemna, nisi ma ti ɗawn kay ŋomom mi tuwsi ɦawa, ma tilek vunsi ŋolo, nisi ma cum ɗawn mi niy ma kiɗaya ma vat laatɗi kaw. 17Funa hiɗi niyna ma kiɗa goy kisiya, nisi ma muɗ ɦuyum' jar-tuwsiya, nisi ma buwis goyo kuɗ bay-ɗigerta visiya.

Currently Selected:

EZEKIYEL 4: Massana

Highlight

Copy

Compare