EZEKIYEL 35
35
Vun-jobta kat sa Edomna
1Ma-Vatɗina ka di yoboyn tan ala:
2Goora vi sana,
muɗaŋ iraŋ kir hiɗiyta vi Seyir,
daŋ vun-jobta kata'a.
3Naŋ ma di ta' ala:
Bum-Sumuna Ma-Vatɗina ka di'e:
Fay tuwayawa! Hiɗiyta vi Seyir,
nan meɗ ɓanawa goy kagu,
nan ma hinag goy ɦawa'a, muɗag goy hiweŋ'.
4Nan ma ɓulak hoyok-ziyna vag goyo,
nak ma muɗ goy mi liy ma hiweŋŋa.
Nak ma wi ala nanu mi Ma-Vatɗina.
5Kay mige sum sa hayagu gawta ta diksita tay vatɗi.
Kay mige nigi ci sum sa Israyel goy hiɗi kew-gaferaŋa,
hay li ma zlat fisiya,
hay liy ma joota liy ŋolo.
6Nan ka iriya,
din mi Bum-Sumuna Ma-Vatɗina.
Nan ma muɗag busuwu;
busuwn ma tap kuɗagu;
kay mige nak min ka gaw hiɗi busuwnɗi,
busuwn ma tap kuɗagu.
7Hiɗiyta Seyir nan ma hina' goy ɦawa'a,
muɗa' goy hiweŋ',
sum sa poy haya'na kaf nan ma vatsi goyo.
8Hiɗiyna vi Seyir nan ma hobom hiɗi sum sa mitina;
hiɗiyna, lokŋa, zul-hiɗiyna,
liy ma korkocona,
nisi sa kew-gaferaŋ calsina ma cuk gaa haya.
9Nan ma hinag yag goy ɦawa'a ta-ta hay vatɗita,
hoyok-ziyna vagu sa as li ziy hayam loɗi,
nala nigi ma wi ala nanu mi Ma-Vatɗina.
10Kay mige nak di ala jaf-sum sa ma'na,
nagat ta ma'ta ma muɗ vagu,
sumuna vag ma lak haya'a.
May Ma-Vatɗina ay zaw.
11Awa ŋaa'a,
nan ka iriya,
Din mi Bum-Sumuna Ma-Vatɗina,
nan ma li tigi ɗawni hiɗi ɦiyda,
hiɗi hunayta kaw ŋray ca
ki nigi ɗek gawta vigi goyo katsi nisi nala;
nan ma ɗek tuwan goy jarsiya,
hay li ma nan ma ka kitat kigiya.
12Nala nak ma wi ala nanu Ma-Vatɗina,
nan humi labara kay ŋulda
ta nak ŋul hiɗiyna vi Israyel hiɗi na' kafe,
hay li ma nak di ala hiɗiyna vi Israyel hini goy hiweŋ',
nam muɗi mi liyn ma farayna vag ti haya.
13Nak fokay kulo katanu hiɗi ɓakŋa vagu,
sumuna vag di yoboyn ma to'ofayn katanu,
humum mi nan kay tuwanu.
14Ki kayn nala Bum-Sumuna Ma-Vatɗina di'e:
Hay li ma nagat kaf ma lak hay firita,
nak hayɗin nan ma muɗag goy hiweŋ'.
15Kuɗ firi ma nak firi ala
ziyna vi Israyel hini goy ɦawa'ana,
nan ma lag nak nala kaw;
yak ma hin goy ɦawa hiweŋ',
nak hiɗiyta vi Seyir.
Naku hiɗi Edom noŋ kafe;
nala nisi ma wi ala nanu mi Ma-Vatɗina.
Currently Selected:
EZEKIYEL 35: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
