EZEKIYEL 27
27
Tiy-tuwta kay Tirus
1Ma-Vatɗina ka di yoboyn tan ala:
2Naŋu goora vi sana,
gaŋ nul ma tiyna kay Tirus.
3Daŋ tam Tirus ala:
Yayya! Naku ta musi vun niy-lum ma ŋolla,
naku ta li filiwna jargi hiɗi jaf-sumun ŋolo.
Ki kayn nala Bum-Sumuna Ma-Vatɗina ka di ala:
Tirus; nak di'e:
Jifiyta vanu na' asay ŋaa'a ŋolo.
4Jar nagata vagu ka goy way niy-lumna;
nisi sa inag kulona kotag jifiy ŋolo.
5Nisi inag gaŋag kulo kaf hiɗi gu-sipre ma hay Senir,
6nisi ka gu-gamna ma hay Libaŋ aya,
kay pi gu-fiyokŋa#27:6 Gu-fiyokŋa ɗek gu ma jun drapon kulo fiyok talamna. kulo hayagu,
nisi kot purana vagu hiɗi gu-ma'asna ma hay Basan,
nisi kot baŋŋa vagu hiɗi siy-slokŋa,
ma may hay Asiriya,
hiɗi ma maram ay hay jokona vi Kittim pa.
7Sligar ma dol lumayna koti hiɗi baraw direŋŋa,
ma may Egipte pana,
ma tuwam ɗoyna,
nam muɗi mi drapona vagu;
sligar-purpella hiɗi sligar ma slaw keŋŋa
ma maramay kay jokota Elisa pana,
nak kot tantana vag kayn hiɗi namu.
8Sum sa hay Sidon hiɗi sum sa hay Arvad
kayn si sa gi lumayna vagu,
nisi sa wi yal lumayna ŋolo.
Sa yalla ŋolo hayag nak Tirus kayni si sa ɗek sa gi lumna.
9Sa maariyana vi Gebal hiɗi sa wi yal lumayna ka hayagu,
kay kot ir lumayna;
lumay ma goloŋ hay niy-lumna,
hiɗi sa gi-lumayna kaf ka hay nagata vagu,
kay ci way sle ma gusna vagu.
10Nisi sa hay Persiya,
hay Lud hiɗi Put ka li lop jar sojena vagu,
nisi kayni si sum sa wi duura;
marayta hiɗi bogorayna visiya nisi gaɓam kulo hayagu,
nisi ka vulag suburta.
11Gurona vi Arvad hiɗi sa wi duura vagu
ka ŋuyi kat gulmunna vagu,
sa ŋomda ka zlaray kay yam simdira vagu,
nisi ka gaɓ marayna visi kulo kat gulmunna vagu.
Nisi ka muɗag jifiy suw asa.
12Nisi sa hay Tarsis li filiw hiɗi naku,
kuɗ slena vag kaf ma ka hay ɓag ŋolla;
nisi ka hob lumuna vag hiɗi doorona,
kawayna, eteŋŋa hiɗi plomna.
13 Yavan, Tubal hiɗi Mesek li filiw hiɗi naku;
sa gorvona hiɗi wayna,
nisi muɗsi hiɗi sle ma filiwna vagu.
14Nisi sa hay Togarma ka hob lumuna vagu hiɗi kulumayna,
sa ɓe kulumayna hiɗi kulumay-kurona.
15Gurona vi Dedan li filiw hiɗi naku,
sle ma gusna vi jokon ŋolo jikis hay ɓag nak pa;
nisi wurakag galla vagu hiɗi siy-slokŋa,
hiɗi gu-ɦooyna kaw.
16Siriya li filiw hiɗi naku,
kuɗ slen ma gusna vag ma ka dak-dakŋa,
nisi hob lumuta vagu hiɗi hiɗiy-slawna,
hiɗi purpella, hiɗi sligar ma ciliyna,
hiɗi baraw direŋŋa,
hiɗi dana-gumna, hiɗi hiɗiy-rubisna.
17Yuda hiɗi nagata vi Israyel li filiw hiɗi naku,
nisi ka muɗ hiɗi naku alkamare ma hay Minitna,
cayna, yumna, mula hiɗi urdi ma kor tuwna.
18Damas li filiw hiɗi naku,
na' ka muɗ slena va' ma koti dak-dakŋa hiɗi naku,
na' ka marag vinna ma hay Helbon,
hiɗi ɗuŋus haɓayna vi mirisna.
19Vedan hiɗi Yavan,
fokay hay Uzal pa,
ka hob lumuta vagu hiɗi kaway ma zliyna,
hiɗi cerew ma his fayna,
nisi ka muɗum hiɗi naku.
20Dedan li filiw hiɗi naku,
hiɗi sle ma gan kulumayna.
21Arabiya hiɗi muliyana vi Kedar kaf li filiw kayni,
jik kag naku.
Sumuna vagu sa li filiw guro fok-dimina,
fok-gamalana hiɗi fok-ŋekŋa ka goy hay nagata visiya.
22Sum sa li filiwna vi Saba hiɗi Rayema li filiw hiɗi naku,
nisi ka hob lumuna vagu hiɗi aromatna ma ŋaan kafe,
hiɗi hiɗiy ma ŋaan kuɗ jafam kaf,
hiɗi ora kaw.
23Haran, Kanne hiɗi Eden,
sum sa li filiwna vi Saba,
vi Asiriya, vi Kilmad kaf,
li filiwn hiɗi naku;
24nisi lum filiw hiɗi naku mi sle ma ŋaana,
sligar ma goɗayna,
sligar ma ciliyna,
sligar kuɗ jafamu jafamu,
zigew ma junina ma slewayna,
kaf kay gut filiwna vagu.
25Lumayna vi Tarsis ka yaw jakŋa vagu,
nak hobay hiɗi farayna hiɗi gajijita,
goy way niy-lumna.
26Sa gi lumna vagu kalagawa goy way niy-lum ma ŋolla,
simeɗ ma gal kuɗuwna kusagawa goy way niy-lumna.
27Farayna vagu,
lumuna vagu hiɗi slena vag ma nak gusum goyna,
sum sa hay lumayna hiɗi sa ɗek lop lumayna,
nisi sa kot tuw lumayna,
sa ci way slena vag ma gus goyna,
sumuna vag sa wi duura kaf sa ka hay nagata vagu,
jar sa tokŋa sa ka hay nagata vagu,
nisi kaf ma cuk gaa way niy-lumna,
hay buur ma nak ma nig gaa'a.
28Hay li ma sa ɗek lop lumna pat ciriyn ɗawni,
sum sa kel niy-lumna tuwsi ma visi bat-bat';
29nisi kaf sa gi lumayna ma jik gaa hay lumayna pa,
sa goloŋ hay lumayna,
sa ɗek yal lumayna goloŋ hay niy-lum ma ŋolla kaw.
Nisi ma lak kulo kay nagata;
30nisi ma di delsi goy kagu,
ma pat tiy ma galakŋa;
nisi ma ko butuwn kulo kisiya,
ma gi tuwsi gaa hay butuw-kuna;
31nisi ma wel yisi goyo kuɗag naku,
nisi ma cuk sligar bolla tisiya,
ma tiy kagu hiɗi diksi noŋ pete,
nisi ma tiy tiyna vi do'olla.
32Hay tuw-tita visiya,
nisi ma gi nul ma tiyna kagu,
nisi ma yor tuwsi kuɗagu ala:
Nagata ta ŋray hiɗi nak Tirus ti tarige?
Nagata ta ki hoyok-ziyn namna,
ma ɓulakay goy way niy-lumna ki kayn nala tayɗi.
33Hay li ma sle ma gusna vagu kalay goy hay niy-lumna pa,
nak ka hob jaf-sumun ŋolo,
kuɗ slena vag ma ka dak-dakŋa hiɗi farayna vagu,
nak ka muɗ muliyan sa hay nagatna faray ŋolo.
34Wulini hay li ma nak kusi goyo kay niy-lumna,
jakŋa vag ma gus goyna hiɗi sle ma hay lumayna
koy goloŋo hay niy ma zulla,
hiɗi nak lay.
35Sum sa ziy kay jokon kaf hini hay hawta kuɗag naku,
muliyana visiya muɗi nari,
irsi zoɓi gaa'a.
36Sum sa li filiwna ka feɗ kuɗag kuy-kuy',
naku mi va ma wir tuw sa'a,
sa as kay wag loɗi.
Currently Selected:
EZEKIYEL 27: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
