EZEKIYEL 25
25
DI VUN-JOBTA TAM JAF MA PULLA
Law kat sa Amonna, sa Mowabna sa Edomna hiɗi sa Filistina
1Ma-Vatɗin ka di yoboyn tan ala:
2Goora vi sana, muɗaŋ iraŋ kat sa Amonna,
daŋ vun-jobta katsiya.
3Naŋ ma di tam sa Amonna ala:
Humgi yoboyna vi Bum-Sumuna Ma-Vatɗina.
Kayni mi va ma Bum-Sumuna Ma-Vatɗin dumna:
Kay nigi cen ala haha! Kuɗ liyn ma peldetna vanu,
hay li ma nisi muɗum goy liwisi,
nigi cen kuɗ nagata vi Yuda hay li ma nisi kalay goy gorvo'o,
4kuɗ kayni fay tuwayawa!
Nan min vulgi mi gurona vi nagat ta gal kuɗuwta;
nisi ma in guruna visi jargiya,
nisi ma in ziyna visi jargiya,
vuɗ-guna vigi tum ɗawn si nisiya,
ci miira vigi ɗawn si nisiya.
5Rabba nan ma muɗa' mi liyn ma lamgan ti haya,
nagata vi sa Amonna nan ma muɗa' mi liyn ma fok-dimin mol haya.
Nala nigi ma wi ala nanu mi Ma-Vatɗina.
6Kay kayni mi va ma Bum-Sumuna Ma-Vatɗin dumna:
Kay nigi ci ɓigi til-til',
dab segi gaa rim-rim' kaw,
kay nigi li firiya,
nigi pan nagata vi sa Israyel hiɗi dikgi noŋ kafe,
7kuɗ kayni fay tuwayawa!
Nan meɗ ɓan goy kigiya,
nan min vulgi goy tam jaf-sumuna kay nisi ma vurumgiya;
nan min kaagi segi goy jar jafna vigiya,
nan min vatgi goy hay nagata,
nan min cigi goyo.
Nala nigi ma wi ala nanu mi Ma-Vatɗina.
8Ki kayn nala Bum-Sumuna Ma-Vatɗina ka di ala:
Kay sum sa hay Seyir hiɗi Mowab ka di ala:
Lakŋi mi ziyna vi Yuda ɗisu,
nam muɗi ki jaf-sum segen nala kaw.
9Kuɗ kayni nan min mal vun-nagata vi Mowab goyo,
nan min yaw hoyok-ziyna va'a,
hay vunam hen pa ta-ta hay vunam hen goŋ',
hoyok-ziy ma sem nagat suburi kuɗumna,
Bet-Yesimot, Baal-Mewon hiɗi Kiryatayim;
nan min malam vunam goyo,
mi gurona vi nagata ta gal kuɗuwta,
10nan mal vun nagat goyo,
mi gurona vi nagat ta gal kuɗuwta,
sa tuɗ dur gurona vi Amon,
nan min vul nagat misi nisiya,
kay a gurona vi Amon ma li ŋaɓay jar jaf-sumun loɗi.
11Nan min ka kitata van kay sa Mowabna,
nala nisi ma wi ala nanu mi Ma-Vatɗina.
12Ki kayn nala Bum-Sumuna Ma-Vatɗina di'e:
Kay mige sum sa Edomna job yisi kat jafna vi Yuda,
nisi kal tuwsi hay joota hay li ma nisi job yisiya,
13kuɗ kayni Bum-Sumuna Ma-Vatɗina ka di ala:
Nan min meɗ ɓan goyo kat sum sa Edomna,
sumuna hiɗi farayna kaw nan min cisi goyo,
nan min vatsi goyo tun caway hay Dedan pa,
ta-ta hay Teman;
kew-gaferaŋa ma vatsi goyo.
14Nan ma job yan kat sum sa Edomna,
hiɗi ɓam sumuna vanu sa Israyella;
nisi ma hob vun ɦiyda vanu hiɗi purcakka kat sa Edomna,
nisi ma wi job-yamda van tisiya.
Din mi Bum-Sumuna Ma-Vatɗina.
15Ki kayn nala Bum-Sumuna Ma-Vatɗina di ala:
Kay sum sa Filistina job yisiya,
nisi job yisi hiɗi panta hiɗi diksi noŋ kafe,
hay gawta visi ta vatɗita nisi mini ɓulak slen kafe.
16Kuɗ kayni, Bum-Sumuna Ma-Vatɗina ka di ala:
Fay tuwayawa, nan min min meɗ ɓan goy kat sa Filistina,
nan vat sa Keretiyen goyo#25:16 Sa Keretiyena Hay vuɗna vi sa Filistina, si sa Keretiyena.
caw sa hin kel niy-lumna nan min vatsi goyo.
17Nan min job yan katsiya hiɗi purcakka ta ŋolda.
Nisi ma wi ala nanu mi Ma-Vatɗina,
hay li ma nan hob vun ɦiyda vanawa katsiya.
Currently Selected:
EZEKIYEL 25: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
