EZEKIYEL 22

Jiw-zlata vi sum sa Yerusalemna

1Ma-Vatɗina ka di yoboyn tan ala: 2Naŋu goora vi sana, naŋ ma ka kitat su? Naŋ ma ka kitata kay hoyok-ziyn ma ɦok busuwn goyna su? Naŋ ma ɗeksi kay liwista visi kafe.

3Naŋ ma di tisi ala: Bum-Sumuna Ma-Vatɗina ka di ala: Sum sa hay hoyok-ziyn kayni ɦok busuwn goyo, kay buura visi ma co goboyo, nisi kot lawayn ma waana kaw kay muɗ tuwsi liwis hiɗi namu. 4Nigi joo'o kuɗ busuw ma nigi ɦokom goyna, kuɗ tuwgi ma nigi muɗum liwisi hiɗi lawayn ma waana ma nigi kotomna. Nigi kiɗa buura vigiyawa goyo, busata vigi ya' dabawa goboyo. Kuɗ kayni nan min muɗgi zulo'o vok jaf-sumuna, nan min ala sum sa hay nagat kaf ma cen kuɗgiya. 5Nisi sa ka goboyo hiɗi nisi sa ka goy gine'e ma burahgiya, kay semda vigi tiy goy liwisi, kay nigi hobay hiɗi hiwirta kaw.

6Kayni va ma sa yerimana vi Israyel ka li'e: Gigekaw li kayn hiɗi dono'o kay ɦok busuwn goyo. 7Jargiya sumun pan sumaysi sa jufayna hiɗi sa boyna, jargiya sumun curoɗ sum sa pulla. Jargiya sumun yaw slen hay ɓam sa kuyuna hiɗi boy sa duhulla. 8Nigi may sli yam liyna van ma peldetna kuloɗi, nigi muɗ sabatna van goy va waa'a. 9Sum sa di newta kay ɦok busuwn goyna ka jargiya. Jargiya, sumun ti kulo kay hiɗiyna. Sumun cuk tuwsi yawi jargiya kaw. 10Jargiya, sumun ɗuw nalata vi sumaysi sa jufayna. Jargiya sumun li ɦawla tam boy sa muɗi liwisi kay busuw ma tisina. 11Jargiya, gigekaw muɗ tuwam liwisi hiɗi cata vi sugolomna, gigekaw cuk tuwam yawi hiɗi cata vi goor-malamna, gigekaw cuk tuwam yawi hiɗi ɓasulumta, goota vi bulumu. 12Jargiya, sumun vi vulda kay ɦok busuwn goyo. Nigi min job niy slena, li yami, nigi li ɦawlat kat sugolaygina, may nanu, yigi jokanawa. Din mi Bum-Sumuna, Ma-Vatɗina.

13Wulin kayni nan ka ci ɓanu kuɗ haramna ma nigi lumna hiɗi busuwn ma nigi jaŋam goy jargina. 14Hay buur ma nan fok kulo kigin ɗawni, nigi ma lak ɗeŋ su? Nigi ma fi dono kaw su? Nanu Ma-Vatɗina, nan di'e, nan min li va'a kaw. 15Nan ma mergi goy jar jaf-sumun kafe, nan ma mergi goy hay nagat kuɗulu, liwista ta ka jargita nan ma vata' goyo. 16Nigi ma muɗ goy waa'a kir tuwgiya vok ir jaf-sumuna, nala nigi ma wi ala nanu mi Ma-Vatɗina.

17Ma-Vatɗina ka di yoboyn tan ala:

18Goora vi sana, jafna vi Israyel muɗi kiranu ki suɗoy-kawayna nala, nisi kaf ki way-slawta nala, ki eteŋŋa nala, ki kawayna hiɗi plomna nala hay zulla, nisi mi suɗoy doorona. 19Kuɗ kayni Bum-Sumuna Ma-Vatɗina ka di ala: Kay nigi kaf muɗi ki suɗoy kawayna nala, wulini nan min tokgi kulo way Yerusalem. 20Ki doorota, wayta, kawayna, plomna hiɗi eteŋŋa, molom hay zulla, do kut kuɗumu kay yoromu nala, nan nala kaw, nan ma molgi yam tuwgiya hay ɦiyda vanu hiɗi hunayta vanu, nan ma yorgi goyo. 21Nan ma molgi yam tuwgiya, nan ma do kut kuɗgiya hay ɦiyda ŋolda vanu, nan ma yorgi goyo hay Yerusalem. 22Ki doorota yor goyo hay zulla nala, nan kaw ma yorgi goyo hay Yerusalem. Nala nigi ma wi ala nanu Ma-Vatɗina, nan gi ɦiyda vanawa goy kigiya.

23Ma-Vatɗina ka di yoboyn tan ala:

24Goora vi sana, daŋ tam sum sa hay Yerusalemna ala: Naku may ti nagat ta poray goyɗi, hay buur ma ɦiyda vanu niy ma sina may ŋuruɓagɗi. 25Sa jobta sa hay Yerusalem ka fok lawt kulo haya'a, ki zlon ma ci gumna jet muur ma nam min mutumna goy nala, nisi ŋal sumun goyo, nisi yaw farayna hiɗi sle ma ŋaana, nisi ka biya boy sa duhulla jarsiya. 26Muliyan-sa-ɗifinna visiya may li kuɗ gatta vanɗi, liyn ma peldetna vanu nisi muɗum goy waa'a, nisi may poŋ jar slen ma peldetna hiɗi slen ma waanɗi, nisi may poŋ ir slen ma liwisna hiɗi slen ma bay-liwisnaɗi, nisi muɗ irsi goy kir sabatna vanu, nan muɗi goy waa'a jarsiya. 27Sa ŋulona visiya ka jarsiya ki keŋŋa ma mut sliwna nala; nisi ɦok busuwn goyo, nisi ba sumun goyo, kay hob vun haramda visiya. 28Sa jobta visiya kor tuw gulmunna hiɗi naga-laskaɗayna#22:28 Naga-laskaɗayna: Ɗuw cawam ma diy goyna hay 13:10. hiɗi sle ma waa'a ma vul tuwam kirsiya, hiɗi gireyna ma sinna. Nisi di ala: Kayni ti dita vi Bum-Sumuna Ma-Vatɗina, may Ma-Vatɗina may disi vaɗi. 29Sum sa hay nagata curoɗ sumuna, kula, li yam sum sa vun lasta hiɗi sa hawna, curoɗ sum sa pulla, wi gasita vi saɗi kaw. 30Nan ka gar jarsiya kay fi sa ma as kay gi zlaɓ tisiya kay ŋomsiya, nan ka gar sa ma col vok iranu vun baŋana vi gulmunna kay gut kay nagata, kay nagat ma toys gaaɗi, may nan may fi saɗi. 31Nan gi ɦiyda van goy kisiya, nan daba' ya' goy goŋ' hiɗi ɦiyda van ta ku keŋga, nan gi lopna visi gaa kisiya. Din mi Bum-Sumuna Ma-Vatɗina.

Currently Selected:

EZEKIYEL 22: Massana

Highlight

Copy

Compare