KAL-GOYTA 36

Inda vi tabernaklena

1Betsaleel, Oholiyab hiɗi sum sege sa Lawn vulsi yalla hiɗi wida kaf kay wi yal slena, kay lumu kaw; nisi tun caw li lopna vi slen ma lakam hay liyn ma peldetna, ki Lawna vul hagat kalam kaf nala. 2Musus yi Betsaleel hiɗi Oholiyab, hiɗi sum sege sa irsi yalla kaf. Sa Lawn vulsi widana, hiɗi sum sa tuwsi goy vuli kaf kay li lop namna. 3Vulda ta gurona vi Israyel vula'a kay li lopna vi liyn ma peldetna nisi yawa' kaf hay vok ir Musus. Graw culumta kaf, nisi ka mar vulda-minda mi Musus dok-doko. 4Nala sum sa irsi yalla sa ka li lop hay liyn ma peldetna hin lopna visi ay kaf, 5nisi co'o di tam Musus: Slen ma sumun ka maramna kayni nam suwi goy kay lopna vi liyn ma peldetna ma Lawn vul hagat kalamna. 6Musus vul labara goy hay kaŋŋa ala la sa jufu lebo ca'a kaw ma vul va mara'a kay inda vi liyn ma peldetna loɗi. Nisi tel sumun kay mar vulda. 7Slen ma nisi maramna asaya, suw goy kay lopna noŋ kaw.

8Sum sa irsi yalla noŋ kaf sa ka li lopna, nisi kot tabernaklena hiɗi tapina doogo hiɗi baraw haɓna ma ciliyna, hiɗi baraw ma tuwam zim-zimna hiɗi ma tuwam cih-cihna, nisi ɗo keruben talamu, kotay hiɗi yalda ŋolo. 9Tapi ma kepna fiyokka valam ir goldoŋ dok-ma' yam glafandi; buɗukka valamu ir goldoŋ fiɗi; tapi ma hen noŋ kaf ŋata valam ay ki kayn nala. 10Tapi ma vaslna nisi siram gaŋam vun tuwam kep; hen ma vaslna kaw nisi siram gaŋam vun tuwam kep lo. 11Nisi kot zigew-ŋokŋa ma tuwam zim-zimna hay vun tapina ma siray vun tuwam jewna; ma siray vun tuwam bugolla nisi lum ki kayn nala kaw. 12Tapi ma siray vun tuwam jewna nisi cuk zigew-ŋokŋa dok-vasl hay vunamu, tapi ma siray vun tuwam bugolla nisi cuk zigew-ŋokŋa hay vunam dok-vasl kaw; zigew-ŋok namna ŋiray vun tuwam ɓurut'. 13Nisi kot sle ma gaɓna ma ora dok-vasl, nisi kal vun tapin kulo hay tuwam hiɗi zigew-ŋokŋ namna, ki kayn nala tabernaklen kotawa.

14Nisi kot tapina hiɗi ɗuŋusna vi fok-meena, kay nam ma bar yam tabernaklena; hiɗi ɗuŋus namna nisi kot tapin doogo yam kep. 15Fiyokka vi tapi ma kepna ir goldoŋ dok-ɦidi, be'da valamu ir goldoŋ fiɗi, nam doogo yam kep kaf kayn ŋray ca ki tuwam nala. 16Tapi ma vaslna nisi siram gaŋam vun tuwamu, hen ma karkiyana nisi siram gaŋam vun tuwamu kaw. 17Nisi cuk zigew-ŋokŋa dok-vasl hay vun tapi ma siray vun tuwam jewna, nisi cuk zigew-ŋokŋa dok-vasl lo hay vun tapi ma siray vun tuwam bugoldana. 18Nisi kot sle ma gaɓna dok-vasl hiɗi wayna, kay ci tapin vun tuwamu kay kotta vi guɗukŋa. 19Kay guɗuk namna nisi kot borgona ma tuwam ɗoy slawna, hiɗi bakŋa vi fok-gamalana, nisi kot borgon mara lo hiɗi bakŋa vi dofeŋŋa, kay gum kulo kalamu.

20Nisi kot biremna kay tabernaklena; kotom mi gu-kasiyana; nisi lakam kulo hiɗi selemu. 21Fiyokka vi birem ma kepna ir goldoŋ doogo, buɗukka valamu ir goldoŋ kep hiɗi gali. 22Birem ma kepna kona ka talam ma' ma', kalay hay tuwamu tuwamu, biremna vi tabernaklen noŋ kaf nisi lum ki kayn nala. 23Nisi kot biremna dok-ma' kay gal ma kayamna vi tabernaklena. 24Nisi yor kaway doorota dok-fiɗi gaa kuɗ biremna ma dok-ma'na. Birem ma kepna hiɗi kona valam ma ma'na nisi yor dooron gaa kuɗum ma' ma'. 25Nisi kot biremna dok-ma' lo hay gal ma ma'na vi tabernaklena, gal ma gaana, 26yor doorot gaa kuɗum dok-fiɗi kaw, birem kep kayni yor dooron gaa kuɗum ma' ma'. 27Nisi kot biremna karkiya gaa kuɗ guɗukŋa, hay gal ma vulatina. 28Nisi kot biremna ma' kay gef tabernaklena ma gaa kuɗumna; 29nam ay tapay tam tuwamu, tun caw ay gaa pa, sinem ma kulon juni tam tuwam ŋaa'a ŋolo hiɗi girliŋŋa; nam ma' kafe nisi lum gefem ki kayni nala. 30Biremna ay noŋ pet glafandi, hiɗi doorot yori gaa kuɗumu, doorot ta yorit noŋ pet doogo yam karkiya, gaa kuɗ birem ma kepna doorot ay ma' ma'. 31Nisi kot malla vasl hiɗi gu-kasiyana kay ziy biremna ma hay gal ma kepna vi tabernaklena. 32nisi kot malla vasl lo kay gal ma ma'na vi tabernaklena, malla vasl kay biremna ma ka hay galla vi tabernaklena, ma gaa kuɗumna hay gal ma vulatina; 33nisi kot malla ma jaara kay jikis hay gaŋ biremna pa ta-ta goy gaŋam gal hena. 34Biremna nisi korom tuwam hiɗi ora, girliŋ ma talamna ma kal malla hayna kaw nisi korom tuwam hiɗi ora, malla kaw nisi korom tuwam hiɗi ora.

35Sligar-gaɓayna nisi kotom hiɗi baraw ma tuwam zim-zimna, ma tuwam cih-cihna hiɗi ma tuwam slawna, hiɗi baraw haɓna ma duɓarayna, nisi kotom hiɗi yal ŋolo, nisi ɗo keruben talamu may. 36Nisi kot dolla valam fiɗi hiɗi gu-kasiyana, korom tuwam hiɗi ora; sle ma gaɓna ma talamna mi ora, nisi yor doorota gaa kuɗum fiɗi. 37Kay vun-guɗukŋa, nisi kot sligar-gaɓayna hiɗi ma baraw ma tuwam zim-zimna, ma tuwam cih-cihna hiɗi ma slawna, hiɗi baraw haɓna ma duɓarayna, nam ciliy ŋaa'a ŋolo. 38Nisi kot dolla valam vasl hiɗi sle ma gaɓ talamna, yalam ma dilarina hiɗi zigew ma kal sligar hayamna, diram ma yori gaa kuɗum vaslna mi wayna.

Currently Selected:

KAL-GOYTA 36: Massana

Highlight

Copy

Compare