KAL-GOYTA 18

Yetro co'o kay ɗuw Musus

1Yetro, Mul-ma-ɗifinna hay Madiyan, ma kuno Mususna, nam hum labara kay slen ma Lawn lum tam Musus hiɗi sumuna valam sa Israyel kafe; nam hum ala Lawn kal sum sa Israyellawa goy hay Egipte pa. 2Sefora cata vi Musus ta nam hota'ta, Yetro mara'a kuɗumu. 3Nam mar gurona vi Sefora sa ma'na kuɗum kaw; ma kepna yum Gerson, kay Musus di ala nan li ziy damni hay nagat ta pulu; 4ma hena yum ala Eliezer: Kay nam di'e: Lawna vi sumiyan gutawa kuɗanu, kay nam butan goy hay ɓam kew-gaferaŋa vi Farawn.

5Yetro ma kuno Mususna, hiɗi Sefora hiɗi gurona va' kaw co'o hay fulda ta sa Israyella ka molay haya, kay hiɗiyta vi Lawna. 6Nam jok sunda kay di Musus ala: Nanu, Yetro ma kunoŋŋa, nan ka tuɗis taŋu hiɗi cata vaŋu hiɗi gurona va' sa ma'na. 7Musus kalay goy ŋaf ir kunomna, nam girif gaa'a, nisi ŋaf vun tuwsiya, nisi vi labara vi tuwsiya, bugol kayni nisi cuk vo hay ziyna vi Musus. 8Musus vi Labara mi kunomna kay slen ma Ma-Vatɗina lum tam Farawn hiɗi sa Egipten noŋ kafe kuɗsi nisi sa Israyella, nam vum labara kay makka ta nisi fa' hay hagata, kay but ma Lawn butsi goyna kaw. 9Yetro dikam li firiya kay ŋaata ta Lawn la' tam sum sa Israyel kafta, kay but ma nam but sa Israyella goy hay ɓam sa Egiptena. 10Ki kayn nala Yetro di'e: Gi deɓta tam Ma-Vatɗina, namu ma but sumun valam goyo hay ɓam sa Egiptena hiɗi ɓam Farawn kaw; namu ma but sumuna valam goy hay ɓam sa Egiptena. 11Wulini nan wi gasi ala Ma-Vatɗina nam ŋolo suw lawayn kafe; kay joota vi sum sa Egipten nigawa gaa'a kisiya.

12Yetro kuno Mususna li ɗifin ma ŋal-goyna hiɗi ɗifin ma ŋatna kaw tam Ma-Vatɗina, Aaron hiɗi sa maariyana vi Israyel noŋ kaf co'o, nisi lakay gaa ti'e hiɗi kuno Mususna, hay vok ir Lawna.

13Hay buurta ka'ta, Musus musi gaa'a kay ka kitata vi sa Israyella, sumun ka lak vokomu, tun caway hay grawt pa ta-ta vulatita. 14Yetro wi slen kaf ma Musus ka lum kisina, nala nam di'e: Naŋ lum hiɗi sumun na kayn mi mige? Naŋ ka musi gaa vaŋ kepe may sumun ka lak vokoŋu, tun cawis hay grawt pa ta-ta vulatita kayn kay mige? 15Musus hot dit tam kunomna ala: Sumun ka co tan kayni kay job minda vi Lawna vi Lawna. 16Hay li ma nisi ka hiɗi lawi, nisi co tani, nan kota' jarsiya, nan ɗeksi kay dita vi Lawna hiɗi gatta valamu.

17Kuno Mususna dumu, slen ma naŋ ka li'e may hay tagamɗi. 18Naŋ ka tiyof tuwaŋ goyo, naŋ ka tiyof sum sa ka hiɗi naŋu kaw; kay lawta kayni ka suw donota vaŋu, naŋ vaŋ kep may as ka'ɗi. 19Wulin kayn humaŋ dita vanu, nan min vulaŋ gatta, Lawn ma mus hiɗi naŋ musge, naŋ ma lin mi sa ma jok vun sumun mi Lawna, naŋ ma nar lawta visi vok Lawna. 20Naŋ ma hatsi dita vi Lawna hiɗi gatta valamu, ɗeksi kay hagat ta nisi as sla'ta, kay slen ma nisi as li'e kaw. 21Jarsi kaf naŋ ma yaw sum sa nagaya, sa li nar kuɗ Lawna, sum sa ɗigere sum sa min garta vi farayɗina naŋ ma tun sara'a kay vok ma birimna, sara'a kay vok ma kisna, sara'a kay vok ma dok-vaslna, sara'a kay vok ma doogona kaw. 22Hinsi lak dok-doko kay ka kitata vi sumuna; law ma ŋulon kaf hinsi maram vok iraŋu, law ma gurayna hinsi vatam kay tuwsi may, muɗaŋ lopn kaŋ hefteŋ neeɗa, a nisi kaw ma ziy nekka hiɗi naŋ lay. 23La naŋ li ki kayn nala, la Lawn ɗekaŋ yallawa kaw, naŋ ma as kay law na'ta, sumun kaf ma hot vo hay ziyna visi hiɗi toyta.

24Musus hum kuɗ dita vi kunomna, nam li kuɗ slen ma nam dumti kafna. 25Kay na'ta Musus yaw sum sa nagayna jar sa Israyella kafe, nam tunsi ŋolo kay sumuna. Sa ŋulona vi vok ma birimna, vok ma kisna, vok ma dok-vaslna, vok ma doogona kaw. 26Nisi ka kitata vi sumun dok-doko; law ma ŋulona nisi ka tuɗum vok Musus; may law ma gurayna nisi ka vatam kay tuwsiya may.

27Musus gi dir kunomna Yetro, nam kaliya hay nagata valamu.

Currently Selected:

KAL-GOYTA 18: Massana

Highlight

Copy

Compare