GATTA-SEM-MA'TA 7
7
Hagata vuli kay ci sa Kanaaniyan goyo hiɗi lawayna visiya
1Hay li ma Ma-Vatɗina Lawna vigiya cogiyawa hay nagata ta nigi min kal haya'a kay muɗa' goy ir vigit ɗawni, hay li ma jaf-sum sa dak-dakŋa nam digiɗsiyawa vokgiya, kayn di ala sa Hititna, sa Girgasiyena, sa Amoriyana, sa Kanaaniyana, sa Feresiyena, sa Heviyena, sa Yebusiyena; jaf-sumun siɗiya ŋol suwgi nigiya kaw, 2hay li ma Ma-Vatɗina Lawna vigiya vulsiyawa hay ɓigiya, hay li ma nigi kolawa kisiya, nigi ma cisi goyo, nigi ma jun bono hiɗi nisiɗi, nigi ma wisi hawsiɗi, 3nigi ma vul guro-boyna vigi mi gurona visiɗi; guro-boyna visiya nigi ma yawsi boy mi gurona vigiɗi kaw; 4kay nisi ɗawni ma ja jar gurona vigi goy hiɗi nanu, nisi ɗawni ma girif lawayn mara'a, nala Ma-Vatɗin ɗawni dikam ma ɓulak katgiya, nam ɗawni ma vatgi goy gosoyo. 5Kayni mi va ma nigi ma lum katsina: Nigi ma to giwin-ma-ɗifinna visi gaa'a, hiɗiyna visi ma ceɗayna nigi ma tom gaa'a, naga ma nisi inim kulo kay girifimu ma nisi yum Asera nigi ma ɦom gaa'a, gun ma ceɗayna ma nisi girifimna nigi ma ŋalam goyo.
6Kay nigiya si jaf-sum sa peldete, kay Ma-Vatɗina Lawna vigiya; Lawna Ma-Vatɗin vilekgi kayni kay nigi ma li si jaf-sum sa ir valamu jar jaf-sum sa hay nagat kuɗulu. 7Ma-Vatɗin jun bonot hiɗi nigiya, nam vilekgi goyo kaw kayni kuɗ ta ala nigi suw jaf-sum segen kafeɗi, may nigi kayni kiɗaya suw jaf-sum sa hay nagat kafe. 8May kay Ma-Vatɗin mingiya, kay nam mini kay li kuɗ va ma nam yum kalam kat sumaygiya, nam kalgiyay goy hiɗi ɓalam ma donona, butgiyay goy nagata ta gorvota, goy hay ɓam Farawn mulla vi Egipte. 9Nigi ma wi ala Ma-Vatɗina Lawna vigiya nam mi Lawna, Lawna namna ma mu'ɗina ŋom bonota hiɗi ŋaata valamu jaram hiɗi sa minimna, sa ŋom vun-ma-gatna valamu kaw, ta-ta tam jafsi voksi birimi. 10May nisi sa ka gaw hiɗi namna nam ka kitat kisi bay lopo, nam cisi goy mati; nam may vi yalam tam sa gaw kalamnaɗi, nam wurak lopna visi wulini wulini. 11Nigi ma li kuɗ vun-ma-gatna, sle ma ɗoyna hiɗi dita ma nan vulgi vaydi, kay nigi ma li lop hiɗi namu.
12Hay li ma nigi ka hum dita kayni, nigi ŋoma'a li lop hiɗi na'a kaw, Ma-Vatɗina Lawna vigiya ma ŋom bonota hiɗi ŋaata ta jargita ta nam yi va kalamu tam sumaygiya. 13Nam ma mingiya, nam ma gi bol kigiya, nam ma biyagi jafgiya, nam ma gi bol kay jaf ma haygina, hiɗi jaf ma hay sinena vigiya, alkamarena, gulda-guldana, mula, hiɗi vin ma jibetna, nam ma biya farayna vigiya kaw hay nagata ta nam yi va kalamu vok sumaygiya kay vulgiya. 14Nigi ma fi bolda suw jaf-sumun kaf; sa jufu lebo ca'a kaw ma getiya ma li hay nagata vigiɗi, faray ma getiya kaw as li hay nagata vigiɗi. 15Ma-Vatɗin ma gi ir moyn kaf goy gine hiɗi nigiya; moy ma joona ma li hay nagat Egipte nam ma hinim li tigi noŋɗi, may nam ma gi moy namna tam sum sa ka gaw hiɗi nigiya kafe. 16Jaf-sum sa Ma-Vatɗin Lawna vigi vulsi hay ɓigin ɗawni nigi ma vatsi goy noŋ kafe; kir-hawta kisiya ma li hay dikgi noŋɗi, nigi ma girif lawayna visiɗi, kay kayni ma li ti jawta ta ganay vokgita.
17Hay li ma nigi ma di hay dikgi ala jaf-sumun kayni ŋol suwma numa'a; numa digiɗsi goy ɗawn digiɗtige? 18Ligi nar kisiɗi humgi ma gigi kay va ma Ma-Vatɗin lum kat Farawn hay Egipte, 19wakka ŋolda ta irgi wa'a, ɗekka hiɗi gul-yalda, ɓalam ma donona hiɗi gilaŋatam ma goy meɗayna, hay li ma Ma-Vatɗina Lawna vigiya kalgiyay goyo: Ki kayn nala kaw sum sa nigi li nar kisina Ma-Vatɗina ma li tisi ki kayn nala. 20Ma-Vatɗina Lawna vigiya ma cuk ŋofora ay katsiya, ta-ta sum sa hiniya sa ŋay vok irgina ma vatis goy kafe. 21Ligi nar kisiɗi, kay Ma-Vatɗina Lawna vigiya ka jargiya, Lawn ma ŋolla ma sa liwimɗina. 22Ma-Vatɗina Lawna vigiya ma digiɗ jaf-sumun kayni goy vokgi hiɗi ŋali ŋali; nigi as a vatsi goy vun tuwsi kirɓicik' deɗi, kay la naɗi muur ma fulla ma biya katgiya. 23Ma-Vatɗina, Lawna vigiya ma digiɗsi goy vokgiya, nam ma viysi liyn kirsi kafe, ta-ta nisi ma vatis goy kirɓicik'. 24Nam ma vul muliyana visi hay ɓigiya, nigi ma ɦassi sesi goyo gaa kay nagata; mara ma col vokgi kep kaw mayɗi, ta-ta nigi ma vatsi goy noŋ kafe. 25Lawayna visi ma nisi kotomna nigi ma ŋalam goy hay kuta, nigi ma niŋa gurjutɗi, ora ma ka talamnaɗi nigi ma yawam ir vigiɗi, kay kayni ma muɗ mi jawta vokgiya; kay Ma-Vatɗina Lawna vigiya min sle namna canɗi. 26Slen ma liwisna nigi ma kalam hay ziyna vigiɗi, kay nigi kaw ma fi cita-goyta ki nisi naɗi, nigi ma ɗuwum liwisi, joo ŋolo, kay kayni mi sle ma telayna.
Currently Selected:
GATTA-SEM-MA'TA 7: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001