DANIEL 12

Daniel wi buura vi Mesiyas

1Hay liy namna ɗawni Mikayel mul ma ŋolla ma fok kulo'o,

nam ma coli dono'o kay gut kuɗ gurona vi sumuna vaŋu.

Liyn ma zumalda ŋolda ma ma'a,

hay li ma jaf-sumun tun cawna pa ta-ta tam liyn namna,

zumalda ta ŋol ki kayn nala tayɗi.

Hay liy namna ɗawni sumuna vaŋu ma hulot goyo,

gigekaw ma selem ka ɗoy hay ɗerwelda.

2Sumun ŋolo sa buri sene

hay buɗufna vi nagata ma zliy kulo'o,

segena kay irita vatɗita,

segena kay zulota hiɗi liwista vatɗita.#12:2 Mat 25:46; Yoh 5:29-30; Lop Ap 24:15.

3Nisi sa wi voksina ma wile'e,

ki wileta vi dukalawna nala,

nisi sa hat ɗigerta tam sumuna ŋolo,

ma wile'e ki mislekŋa nala,

ta-ta hay vatɗita vatɗita.

4Naŋu Daniel, ŋayaŋ yoboyn kayni, sliraɓaŋ ɗerwelda ta-ta hay vatta vi liyna. Sumun ŋolo ma jaŋa'a, wida ma ɦur voko kaw.

5Hay na'ta nanu Daniel, nan ka ɗuwa, iran wi sumun ma' ka lakay lak, ma kepna colay deŋel niyn gal hena, ma hena colay deŋel niyn gal hena may. 6Kep jarsiya di tam sa ma cuki hiɗi sligar haɓna, ma ka coli kulo kay niy-lumna ala: Vatta vi ɗekka na'ta ma co'o lancitige? 7Nan hum del sa ma cuki hiɗi sligar haɓna, ma ka coli kulo kel niy-lumna; nam poŋ ɓalam ta jufta hiɗi ta gulda kulo hay wuralawna, nam yi va kalamu hay sem nam ma ka mus iri ta-ta hay vatɗita ala: Kayni ma li hay liyn kep, liyn ir ca, hiɗi galla vi liyn kep, slen kayni ma vata hay li ma donota vi sum sa peldetna ma vat goy kafe. 8Nan ka hum della, may nan humum cawamɗi, nala nan di'e: Mulla vanu: Slen kayni cawam ma dab dabtige? 9Nam hot dita: Tuɗaŋ maŋu Daniel, kayni mi yoboyna ma ŋayaya, nam sliraɓiya ta-ta hay vatta vi liyna. 10Sumun ŋolo ma por goyo, ma muz goy haɓi, waki-wak kaw; sum sa joona ma li joota, sa ma joo jarsi kep kaw ma humɗi, may nisi sa ka hiɗi yamda-wida ma huma. 11Tun caw tam liyn ma ɗifin ma dok-dokŋa ma yaways goyna pa, tun caw tam liyn ma liwista vi ɓulak-goyta tun gaan pa, buurta ma li birim kep hiɗi kis-ma' kalam dok-zleeŋe. 12Sle'ta ka kay sa ma min cuba, ma min co tam buura birim kep hiɗi kis-ɦidi kalam dok-ɦidi yam vasl. 13May naŋu, tuɗaŋu ta-ta hay dabta vaŋu. Naŋ ma tun sukaŋu, naŋ ma fok kulo'o kay vocota vaŋu, ta-ta hay dabta vi buura.

Currently Selected:

DANIEL 12: Massana

Highlight

Compare

Copy