AMOS 5
5
Tiyta kay sa Israyella
1Nigi jafna vi sa Israyella,
humgi dit kayni,
humgi yorta ta nan ka yorgiya.
2Wulini na' nigawa gaa'a,
na' ma fok kulo loɗi,
na' goot-cata vi Israyel,
haya' koɗawa gaa kay nagata,
sa ma poŋa' kulo may loɗi.
3Kay Bum-Sumuna Ma-Vatɗina ka ɗi ala:
hoyok-ziy ma cuk sumun goy vun duur birim ɗawna,
ma cuk sumun vun duur ɗawn kis,
sa tuɗ vun duur kisna sumun ma hin kuɗsi doogo,
kayn jar gurona vi sa Israyella.
4Kay Ma-Vatɗina di dit kayni
tam sum sa hay ziyna vi Israyel ala,
nigi ma garanu, nala nigi ma lak iriya,
5nigi gargi Betelɗi, tuɗgi hay Gilgalɗi,
jikgi hay Beer-Sebaɗi,
kay gasita, sum sa Gilgal ma tuɗ goy gorvo'o,
Betel kaw ma vat goy ɦawa'a.
6Gargi Ma-Vatɗina, nala nigi ma lak iriya,
ligi ŋali,
kay la nam do kutawa kuɗ ziyna vi Yosef,
la kut tun caw ŋal ziyna,
sa ma tewa' hay Betel may noŋɗi kayni may ŋaaɗi.
7Nigi sa muɗ gasita galak ki goyo-goyn nala,
nigi tay ɗigerta gaa kuɗ segiya may.
8Namu mi ma kot dahaŋalla hiɗi bajaara,
mi ma muɗ jufunda goy haraŋa,
nam muɗum jufunu kay liyn li henje'e,
nam yi niy-lum ma ŋolla aya,
hinim ti kay yam nagata.
Semda valamu ala Ma-Vatɗina.
9Nam hin ɓulakka co'o kay sum sa donona,
ɓulakka co'o hay liyn ma donona.
10Sum sa mus hiɗi nisi kep disi kay gasita kaw,
nisi gaw hiɗi nisiya,
sum sa disi kirsina nisi may minsi noŋɗi.
11Sum sa hawna nisi taysiyawa gaa'a,
wa-alkamare ma sum sa hawn zumumna nisi yawamawa kisi ɦawa'a.
Kuɗ kayni ziy ŋa ma nigi kotomna
hiɗi hiɗiy ma nigi ceɗemna,
nigi fi lak hayam loɗi.
Nigi pi gulda-gulda ma ŋaanawa,
may nigi fi ci vinna valam loɗi.
12Kay nan wi'e,
jiw-zlata vigi ɓa' suwiya,
sulukŋa vigi biyay goy ŋolo,
nigi las sum sa ɗigera,
yaw slen hay ɓisiya,
nigi cuk vo kuɗ sum sa hawn dono'o.
13Kuɗ na'ta, hay li ma liyn laawa ki kayn nala,
sa ma yalla ŋom sinamu kay liyn kayni joo'o.
14Ligit ti ŋaata, may ti jootɗi,
nala nigi ma lak iriya,
nala Ma-Vatɗina Lawna vi vok-ma-duura ma mus hiɗi nigiya.
Ki nigi ka di nala.
15Kaagi gaw hiɗi joota,
mingi ŋaata,
hingi ɗigerta ti mul hay ziyna vigi kafe,
la nala, Bum-Sumuna,
Ma-Vatɗina vi vok-ma-duura
ma li slugot kay dir sumuna vi Yosef ma hinina klasige.
16Kuɗ kayni, Ma-Vatɗina,
Lawna vi vok-ma-duura,
Bum-Sumuna ka di ala:
Hay liyn kaf nigi ma tiya,
hay hagan kaf sumun ma di ala hih! hih!
Sum sa zum sinena yit ma co tisiya kay nisi ma ti do'olla,
Sum sa wi tiyna ma gi nul ma hawna,
17Goy hay sine gulda-guldana kaf sumun ma yor tuwsiya,
kayni ma li ɗawni hay buur ma nan ma jik jargina,
Din mi Ma-Vatɗina.
Buura vi Ma-Vatɗina
18Joot kay nisi sa cub buur ma Ma-Vatɗina min co hayamna.
Nigi min cubum hay buur ma nam min co hayamna mi mige?
Kay buur namna li ɗawn ti jufunda,
may mi haraŋaɗi.
19Nigi ma li ɗawn ki sa ma pir jaŋi vok zlona nala,
ki sa ma ursena ŋafam hay hagata nala.#5:19 Ɗuw fotona vi ursena hay Wŋ 13:2.
ki san hot vo'o,
cuk balam kat gulmunna,
guyn calamu nala.
20Buura vi Ma-Vatɗina ɗawni,
mi jufunda may mi haraŋaɗi naɗi su?
Namu mi liyn ma zim gaana,
haraŋ may hayɗi naɗi su?
21Nan min yuldeta vigiɗi,
Yuldeta vigi kiran bisi,
tokŋa vigiya iran min wum noŋɗi.
22Hay li ma nigi li ɗifin ma ŋal-goyna hiɗi vulda tanu,
nam may kiran ŋaa noŋɗi,
luway ma jufayna ma nigi ŋatam goyo kay lop ma slugona,
iran may wum noŋɗi.
23Winekŋa vi nulla vigiya ɦurgitis goy tan gine'e,
nan min hum del dilla vigi noŋɗi.
24May hingi ɗigerta jaŋ goyo,
Hingi gasita jaŋ goyo,
ki niyn jaŋ goyo may so goyɗi nala.
25Hay li ma nigi ka hay fulda ir busat dok-fiɗi,
nigi li ɗifini hiɗi vulda tanu su?
Nigi gurona vi Israyella?
26Tuɗgi hiɗi tantana vi mulda vigiya,
tuɗgi hiɗi lawayna vigi ma ceɗayna,
tuɗgi hiɗi mislekŋa vi lawayna vigi ma nigi kotom kafna.
27May nan min nargi gorvo'o goy bugol Damas,
Din mi nam ma semda valam ala Ma-Vatɗina vi vok-ma-duura.
Currently Selected:
AMOS 5: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
