2 SAMUEL 9

Ŋaata ta mulla David la' tam Mefiboset goora vi Yonatan

1David ka joba: Sa mara hay jafna vi Sawul ma hini iriya, ma nan as lum ŋaata kuɗ Yonatan ka su? 2Sa mara kep mi sa ma sunda hay ziyna vi Sawul, yum Siba, nisi maram vok David. Mulla ka jobom ala: Naŋ damni mi Siba su? Nam hot dit ala «awa mi nan sa ma sunda vaŋu». 3Mulla di'e: Sa mara hay ziyna vi Sawul, ma nan as kay li ŋaata vi Lawn talam ka su? Siba hot dit tam mulla: Goora vi Yonatan mara ka kepe, selem hurɓuliya, 4mulla dumu: Nam ka arige? Siba hot dit tam mulla, nam ka hay ziyna vi Makir, goora vi Amiyel, hay Lodebar. 5Mulla David gi sunu kay garamiya hay ziyna vi Makir goora vi Amiyel, hay Lodebar. 6Nala Mefiboset, goora vi Yonatan, goor-ŋolona vi Sawul, nam co kat David, gi tuwam gaa'a, dab vokom gaa'a. David di'e: Mefiboset! Nam hot dit ala sa ma sunda vaŋ zawni.

7David dumu: Laŋ nar noŋɗi, kay nan min laŋ ŋaata kuɗ buŋu Yonatan. Nagata vi buŋ Sawul noŋ kaf nan min vulaŋga, naŋ ma ti fun dok-dok hiɗi nanu. 8Nam dab vokom gaa'a di'e: Nan gorvona vaŋ damni ŋray ca hiɗi diy ma mitina, nagay a naŋ var kan ki kayn nala su?

9Mulla yi Siba sa ma sunda vi Sawul, nam dumu: Slena vi mulaŋŋa Sawul hiɗi slena vi jafna valam noŋ kaf nan min vulum mi Mefiboset. 10Naŋ ma zumum sinena, naŋu hiɗi gurona vaŋu hiɗi sa sunda vaŋu. Naŋ ma feɗ wana, kay gurona vi mulaŋŋa ma fi va ma ti'e: May Mefiboset ma ti fun dok-dok hiɗi nanu. Siba kayni gurona valam sa jufayn ka doogo yam vasl, sa sunda dok-ma' may. 11Siba di tam mulla: Nan gorvona vaŋu ma li kuɗ sle ma naŋ danti kafna. Mefiboset ka musi ti tin hiɗi mulla ki nam mi goora vi mulla nala. 12Mefiboset goora valam ma joriyo ka kepe, yum Mikka, nisi kaf sa ka hay ziyna vi Siba, nisi si sa sunda vi Mefiboset. 13Mefiboset musi kayni hay Yerusalem, kay nam ka ti dok-dok kayn hiɗi mulla. Selem ma' kaf hurɓuliya.

Currently Selected:

2 SAMUEL 9: Massana

Highlight

Copy

Compare