2 SAMUEL 4
4
Mitta Is-Boset
1Hay li ma goora vi Sawul hum ala Abner mitawa hay Hebron, donota valam vat goyo, sum sa Israyel kaf muɗ geɗa. 2Is-Boset ka hiɗi sum sara ma' sa tun vok sumuna: Hen yum Baana, hen yum Rekab; nisi si gurona vi Rimmon ma Beerotna, jar gurona vi Benyamin. 3Kay Beerot nisi ɗuwa' kayn ki nagata vi Benyamin nala, kay sum sa Beerotna pir goy hay Gittayim, nisi lak ziy ɗawni ta-ta vaydi.
4Yonatan goora vi Sawul, goor valam mara ka kep selem dirlaya. Labar co hay Yisreel kay mitta vi Sawul hiɗi Yonatan kayni, nam ka hiɗi busat vasl tuwa. Hay na'ta goot sa ziyimta slumu, pir jaŋi, hay li ma na' ka jaŋ koloyo kayni, nam nig gaa'a muɗ dirlaya, semda valam ala Mefiboset.
5Fat tara'a, gurona vi Rimmon ma Beerotna, Rekab hiɗi Baana, kalay hay falay calakka hay ziyna vi Is-Boset, nam ka buri gaa'a kay tun sukamu hay falayta. 6Nisi kal ta-ta kulo way-ziyda, ki nisi min yaw alkamarena nala, nisi jikim hayam kip'; bugol kayni nisi pir jaŋi. 7Nisi cuk kalaf valam kayni, hay li ma nam ka buri gaa kay gilikŋa valam hay ziyd ta buura valam waŋi, nisi calamu, cum goy mati, nisi kaam yalam goyo. Nisi slum yalam kisiya, bur tuɗ hiɗi nam talal' hay fulda. 8Nisi mar yam Is-Boset hay Hebron mi David, nisi di tam David: Heɗe, kayni mi yam Is-Boset, goora vi Sawul, sa ma gaw kaŋŋa, nam ma gar kay yaw irita vaŋ goyna; vayd kayni, Ma-Vatɗin jobaŋ yaŋawa kat Sawul hiɗi jafna valamu. 9David hot dit tam Rekab hiɗi ɓasulumna Baana ala: Nigi gurona vi Rimmon ma Beerotna, Ma-Vatɗin ma butan goy vun lawt kafn ka iriya! 10Sa ma maran labar ala Sawul mitiyana, nam var ala nam maramti kayn mi labar ma ŋaa'a, may nan vumu cum goyo, kayni hay Siklag, kay vulum wurakŋa vi law ma nam maramna. 11Hay li ma sum sa joona ci sa ma ɗigera vo hay ziyna valamu, hay liyn ma buura valam noŋo, nan ma job busuwna valam tigi ɗawn sem gaage? Nan as bagi irgi goy hay nagatɗi ɗawn ba tige? 12David vul hagat tam sumuna valamu kay cisi goyo, nisi kaasi ɓisi hiɗi sesi goyo, nisi ɓalsi kulo kel goloŋga vi Hebron. Bugolda nisi sli yam Is-Boset, nisi pum yalam hay zulda vi Abner hay Hebron.
Currently Selected:
2 SAMUEL 4: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
