2 SAMUEL 22
22
Nulla vi David, hay li ma nam but goy hay ɓam sa gawt kalamna
1David gi nulla ki kayn nala tam Ma-Vatɗina, hay li ma Ma-Vatɗin butum goy hay ɓam sa gawt kalamna, butum goy hay ɓam Sawul kaw. 2Nam di'e:
Ma-Vatɗina mi hiɗiyna vanu,
mi gulmun ma ŋuyi tanna,
mi ma butan goyna,
3Lawna mi hiɗiyna vanu,
liyn ma ŋayna vanu.
Mi marayta vanu,
mi donota ta suɗanta kaw.
Mi liyn ma nan pir goyo kay ŋay hayamna.
Naŋ sa ma su'da vanu,
naŋ tel sumun kay lan joo'o.
4Nan ka siwel ala:
Suburta ka kay Ma-Vatɗina,
nan buti goy hay ɓam sa gawt kanna.
5Kay billa mi mitta sluɓanawa,
Niy-ɓatna vi ɓulak-goyta muɗanawa nari;
6Zigewna vi zul ma pi sumun ŋuyanawa,
jawta vi mitta vanawa.
7Hay li ma nan ka vun zlata,
nan yi sem Ma-Vatɗina,
nan yi sem Lawna vanu,
goy hay zlamda-mulda valam pa,
nam human delanawa,
tiyta van coowa talamu kaw.
8Nagat muɗ geɗa, na' wir kaw,
dir dukalawn ma tuni gaan tun caw wira,
nam tun caw geɗa, kay nam muɗi ɦiya.
9Nukŋa ka cukay goy hay cinam pa:
Kuta ŋalta kalay goy hay vunamu,
veŋŋa ma sliy kuna ka jaŋay goyo.
10Nam tun dukalawn gaa'a,
nam jikay gaa'a kaw,
ɗugulla ka moki gaa kuɗ selemu.
11Nam ka musi kulo'o kay kerubena,
keruben ka fok hiɗi namu.
Nam ka kal goyo hay gilaŋat simeɗna.
12Guɗuk ma ini talamna ti jufunda,
tuwam ŋuyi hiɗi niy ma toki hay liyn kepna
hiɗi ɗugul ma jufun nilla.
13Veŋ ma kuta ka kal goy hay wileta ta tuɗ vokomta.
14Ma-Vatɗin di delemay kulo hay wuralawn pa,
ma Kulo-Jamna di delem goyo;
15Nam ɓe ɓarawta, mer sa gawt kanna goyo,
niy-ma-bayna viysi hagat kirsiya.
16Torɓok ma gaa kuɗ niy-lum ma ŋolla wizik kulo'o,
dir nagat ma tuni gaana vul tuwam goy haraŋi,
kuɗ donota ta Lawn ɗeka' goyta,
kuɗ suwana vi simeɗ ma cinamna.
17Nam meɗ ɓalamay kulo pa, nam bowonu,
nam vanay goy hay niy-lum ma ŋulon pa;
18Nam butan goy hay ɓam sa ma gawta ma donona
hay ɓam sa gawta sa dono suwan nanu.
19Nisi ŋuyanu hay buur ma nan ka hay vun-zlata.
May Ma-Vatɗina namu mi ma gut kuɗanna.
20Nam muɗanawa goy ŋolo,
nam suɗanawa, kay nam minanu.
21Ma-Vatɗin li tanu kuɗ ɗigerta vanu,
nam vulanu kuɗ bay-gesta vi ɓanu;
22Kay nan poyay hay gatta vi Ma-Vatɗina,
nan may li va ma joo'o kir Ma-Vatɗina vanɗi.
23Dita valam kaf ka gaa vokanu,
nan bay cal goy hay gatta valam tuwa.
24Joota van vok iram tayɗi,
nan tel tuwanu kay li jiw-zlata.
25Ki kayn nala Ma-Vatɗina vulanu kuɗ ɗigerta vanu,
kuɗ bay-gesta vanu vok iramu.
26Hiɗi sa ma ŋaana naŋ ɗek tuwaŋ goy ŋaa'a,
hiɗi sa ma ɗigera naŋ li kuɗ ɗigerta,
27hiɗi sa ma bay-gesna,
naŋ ɗek tuwaŋ goy bay-gese kaw,
hiɗi sa ma yalam ɓulakayna,
naŋ li kuɗ yamda ɓulakayta kaw.
28Sum sa hot yisi gaan naŋ suɗsiya,
hiɗi iraŋ ma ɗuwna kaw,
naŋ hot yam sum sa subur tuwsin gaa'a:
29Awa, naŋu mi haraŋa vanu,
Ma-Vatɗina, Ma-Vatɗina muɗ jufunda van goy haraŋi.
30Hiɗi naŋu nan mok sum sa tuwsi ganay hiɗi sle-ma-duura,
hiɗi Lawna vanu nan jik goy kay gulmunna.
31Hagata vi Ma-Vatɗina ka ɗigere,
yoboyna vi Ma-Vatɗina waki-wak;
namu mi marayta vi nisi kaf sa ŋay talamna.
32Lawn ma kepna kayn mi Ma-Vatɗina ɗisu?
Hiɗiyna vaya mi Ma-Vatɗina vaya ɗisu?
33Ma-Vatɗina mi gulmunna van ma donona,
namu mi ma naran hay hagata ta ɗigerta.
34Nam muɗan sen ŋray ca ki sem dukka nala,
nam colan hay liyna van ma kulo ɗiŋiriŋŋa.
35Nam hatan ɓan kay li duura,
glaŋan nir diŋ-diŋ ɓaraw ma wayna.
36Naŋ vulan marayta vi su'da vaŋu,
nan muɗi ŋolo kuɗ ŋaata vaŋu.
37Hagat ta nan tuɗ haya'ta naŋ muɗa' goy buɗuku,
sen may geɗ goy noŋɗi.
38Nan digiɗ sa gawt kanna, nan vatsi goyo;
la nan bay vatsi goyo, nan hot bugolanɗi.
39Nan vatsi goyo, nan kirapsi gaa'a,
nisi may fok kulo loɗi; nisi yak gaa kuɗ senu.
40Naŋ junan furan hiɗi donota kay li duura,
sa gawt kanna naŋ hotsi yisi ka kuɗanu.
41Sa gaw kanna naŋ muɗsi ŋorsi kiranu.
Sa kan gawna nan vatsi goyo.
42Nisi ɗuw goy galsiya, sa ma suɗsi goy mayɗi,
nisi siwel tam Ma-Vatɗina, nam may hotsi ditɗi.
43Nan lutsi goyo ki butuw ma gaa kay nagatna nala,
nan kirapsi gaa'a,
nan taysi gaa'a ki butuw ma hay hagatna nala.
44Naŋ butan goyo kay cirepta vi sumuna vanu;
naŋ ŋomanu kay nan ma li mi ma ŋolla vi jaf-sumuna;
sum sa nan wisiɗin muɗi si sa sunanna.
45Gurona vi sum sa pulla giɗelan delanu,
vunan di kep kayn nisi hum de'.
46Gurona vi sum sa pulla tuwsi ka visi bat-bat'.
Nisi cuki goy hay hoyok-ziyna visi hiɗi tuwsi visi bat-bat'.
47Bolda kay Ma-Vatɗina, suburta tam hiɗiyna vanu.
Lawna, hiɗiyna vi su'da vanu, seŋ ma tiy ŋol tiy ge.
48Lawna ma joban yanna,
ma hot yam sumun gaa kuɗanna,
49Ma hulotan goy ɓam sa gawt kanna,
naŋ wulan kulo'o kay sa gawt kanna,
naŋ butan goy hay ɓam sum sa ɦawlana.
50Kuɗ kayni, Ma-Vatɗina,
nan ma subur semda vaŋu jar jaf-sumuna,
nan ma gi nul kay gajijita vi semda vaŋu.
51Naŋ vul butta-goyta ta ŋolda mi ma naŋ tunum mulla,
naŋ li slugota tam faŋŋa ma mul ɦoki kamna,
Mi David hiɗi jafna valamu, kay dok-doko.
Currently Selected:
2 SAMUEL 22: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
