2 SAMUEL 17

Husay bulak yal ma Akitofel ɗekemna

1Akitofel di tam Absalom: Hinan yaw sumun birim doogo yam ma', nan min kal kuɗ David hay henjet ta vaydita noŋo. 2Hay li ma nam makiya, muɗi maŋay kaw kayni, nan ɗawn ma co kalam tukusi', nan ma muɗum nari, nala sum sa hiɗi namna kaf ma mun jaŋi, mulla ma hin valam kep ɗawni, nan ma cum goyo may. 3Sum sa hinin kaf nan ma hotsiyay kuɗaŋu; sa ma naŋ min mitta valamna mitawana, sum segen ɗawn ma hoti kuɗaŋu kafe, nisi kaf ma lak hay sle'ta. 4Lawt kayni cuk kuɗ hay Absalom hiɗi sum sa maariyana vi Israyel kafe.

5May hiɗi kayni kaf Absalom di'e: Husay ma Arkina nigi yumay lo tige, nay humay va ma nam min dumna lay tige. 6Husay co kat Absalom, Absalom dumu: Kayni mi va ma Akitofel dumna; naŋ daŋay tige, nay as li kuɗ yal ma nam ɗekemna lebo asɗi su? 7Husay hot dit tam Absalom: Yal ma Akitofel ɗekaŋgi vaydi kayni may ŋaaɗi. 8Husay di'e: Naŋ wi manjufta vi buŋu hiɗi sumuna valamu, nisi ɦiy ŋolo ki ursena#17:8 Nay fi fotona vi ursena hay Wŋ 13:2. ma yawam guron kuɗum hay fulda nala, Buŋu mi sa ma wi duura; hay henjeta nam as bur jar sumunɗi; 9wulini la li ŋalɗi nam ka ŋayay hay zulu lebo hay liy mara'a. La hay tun cawta vi duura, nisi ci saawa kepe ni, sumun hum ɗawni, nisi ma vi yisi noŋɗi kay di ala: Sumuna vi Absalom ciya.

10Nala la sa ma manjufu dikam ki zlon nala kaw, narta ɗawn ma kal hayamu, kay sumun kaf wi ala buŋu mi zlona vi duura, sum sa wi duura ŋolo ka kuɗumu kaw. 11Nan hayɗin ɗekaŋ yalda van kayn ala sum sa Israyel kaf tok tuwsi kataŋu, tun caway hay Dan pa ta-ta hay Ber-Seba, ŋol hini-hini' ki ŋesl ma goloŋ kel niyn nala. Naŋ kay tuwaŋ ma tun voko kay li duura. 12Nay ma co kay David hay liyn kaf ma nay fum hayamna, nay ma ko kalamu ki maɗayn ka ko gaa kay nagat nala. Sa kep kaw as pir goyɗi, nam pirɗi lay sa kuɗumna pirɗi lay. 13La nam ŋay goy hay hoyok-ziy mara'a, sum sa Israyel kaf ma ŋuy hoyok-ziy namna cusl', nay ma sabam goy hay liy ma lokŋa, ta-ta a hiɗiy kep kaw as hin kuloɗi. 14Absalom hiɗi sum sa Israyel kaf di'e: Husay ma Arkin kayni, yal ma nam ɗekemna suw yalla vi Akitofel. Dolay kayni Ma-Vatɗina mini kay ɓulak yal ma ŋaana vi Akitofel, kay mar joot kay Absalom.

15Husay di tam muliyan-sa-ɗifinna Sadok hiɗi Abiyatar ala: Akitofel ɗek yalla mi Absalom hiɗi sa ŋulona vi Israyella ki kayn nala nala; nanu, nan ɗek yalla ki kayn nala nala may. 16Wulini cukgi sumun gosoyo tam David kay dum ala: Hay henjeta naŋ ma bur goy hay liyn ma wiŋŋa vi fulda loɗi, may tuɗaŋ goy gine neeɗa, kay naŋu hiɗi sum sa kuɗaŋŋa ma vulis goy vun mittaɗi. 17Yonatan hiɗi Akimaas ka lakay hay En-Rogel. Cata sunda kep co'o disiya kay nisi ma tuɗ vul labara mi David; kay nisi as a ɗek tuwsi goyo kay kal kulo hay hoyok-ziynɗi. 18Goor ma joriyo kep ŋaf hiɗi nisiya, nam mar labara tam Absalom. Nala nisi kalay gosoyo, ta-ta nisi co hay Bakurim, hay ziyna vi san kep ma kaata ka hay daŋ ziyna valamu, nisi jik gaa haya'a. 19Cata sli daɓan kepe, na' gum vun kaata, na' bar wa ma guɗufin kalamu kay nisi ma giriŋ kay kayn noŋɗi. 20Sa sunda vi Absalom kal hay ziyna kat cat na'ta, nisi di'e: Akimaas hiɗi Yonatan ka arige? Cat hot dita: Nisi ɦawi kulo gal hena. Nisi garsiya, may fisiɗi kayni, nisi hot misi hay Yerusalem. 21Bugol kalta visi kayni, Akimaas hiɗi Yonatan jikay kulo'o hay kaata pa, nisi kaliya, di David ala: Yawgi kulo'o, ligi koloyo kay ɦaw niy-lum kulo'o, kay Akitofel ɗek yal ma joo kat gi ki kayn nala nala. 22David hiɗi sum sa kuɗumna kaf yaway kulo'o, nisi ɦaw Yordan kulo'o, hay haraŋ ma culumtina, sa mara ma hin goy kuɗsi bay ɦaw Yordan kulo kep kaw mayɗi.

23Hay li ma Akitofel wi ala sa may li kuɗ gatta valamɗi, nam gan kurona valamu, kalay hay hoyok-ziyna valamu. Nam gi bolom mi sum sa vo valamna, bugol kayni nam jun tuwam kulo'o. Ki kayn nala nam mita, nisi pum hay zulda vi bulumu may.

David co hay Mahanayim goy bugol Yordan, Absalom ka digiɗimu

24Hay li ma David co hay Mahanayim kayni, Absalom hiɗi sum sa kuɗumna sa Israyella kaf ɦaw Yordan kulo'o may. 25Absalom tun Amasa ŋol kay sojena, hay baŋal Yowab. Amasa kayni nam mi goora vi san kep yum Yitra, sa ma Israyella. Yitra nam sli Abigayil goota vi Nahak, ɓasum Seruyata, na' ti sum Yowab. 26Sum sa Israyella hiɗi Yowab lak hay nagata vi Galaad.

27Hay li ma David co hay Mahanayim, Sob goora vi Nahak, ma hay Rabba ta vi gurona vi Amonta, Makir goora vi Amiyel, ma hay Lodebar, hiɗi Barzilay ma sa ma Galaadna ma hay Rogelimna kaw, 28nisi mar raŋgaw ma buura, dutay ma ŋulona, doway-nagana, futuw-alkamarena, orgena, futuwna, wa ma hawayna, naayna mara'a mara'a, 29yumda, mul fok-dimina hiɗi luwayna, sle namna nisi maram mi David hiɗi sum sa ka kuɗumna, kay nisi ma tumu; kay nisi di tuwsi ala: Sumun kayni fisi lasay hay fulda ŋolo kay mayta, kay makka hiɗi laata kaw.

Currently Selected:

2 SAMUEL 17: Massana

Highlight

Copy

Compare