2 SAMUEL 12

Hamda vi David

1Ma-Vatɗina gi Natan ay kat David. Natan co talamu ka dum ala: Hay hoyok-ziyn mara kep sumun ka hayam ma', ma kepn faraya, ma hen hawi. 2Ma farayna fok-dimina hiɗi fok-meena valam ka ŋolo. 3Ma hawna ɦu-dimita valam ka kep tuta, nam gusa'ay gusiya; nam ka vula' tina, na' ka wul vo valam hiɗi gurona valam kuɗ tuwsiya; na' ka ti fu ma nam tumna, ci niy hay tasat ta nam ci niy hayta, na' bur kayn gaa dikamu, na' muɗi kiram ki goota valam nala. 4Sa ma farayna rogoy co hay ziyna valamu, may sa ma farayna min tun ɓalam tam fok-dimina valamɗi, tam luwayna valamɗi lay, a kot tin mi rogoy ma co hay ziyna valamna; nam vi ɦu-dimita vi sa ma hawna, nam ŋata'a mi sa ma co hay ziyna valamna.

5David muɗ ɦiy ŋolo kat san kayni. Nam di tam Natan: Ma-Vatɗin ka iriya! San ma li slen kayni cum ciy goyo. 6Nam ma wurak fok-dimi fiɗi kaw, kay nam li slen kayni, kay kir-hawta may hayamɗi.

7Natan hot di tam David: Naŋu mi sa namna. Kayni mi va ma Ma-Vatɗina Lawna vi Israyel di'e: Nan tunaŋ mulu kay sa Israyella, nan butaŋ goyo hay ɓam Sawul; 8ziyna vi mulaŋŋa nan vulaŋga, boyna vi mulaŋŋa nan bursi gaa dikaŋu, nan vulaŋ ziyna vi Israyel hiɗi Yuda. Lali kayni kiɗaya, nan asay kay cuk mara vunam lo. 9Naŋ min ɗuw lawta vi Lawn birek-ceke hay li ma naŋ li sle ma kir Lawn joona kay mige? Uriyas ma Hetna naŋ calam goy hiɗi kew-gaferaŋa, naŋ vi cata valamu kay muɗa' goy ir vaŋu, may namu naŋ cum goyo hiɗi kew-gaferaŋa vi gurona vi Amon. 10Wulin kayni kew-gaferaŋa jaram as ja goy hiɗi ziyna vaŋ loɗi, kay mige naŋ ɗuwan birek-ceke, kay mige naŋ vi cata vi Uriyas ma Hetna kay muɗa' goy cata vaŋu. 11Humaŋ va ma Ma-Vatɗin di'e: Goy hay ziyna vaŋ pa nan ma kal joot ay goy kataŋu, boyna vaŋ kay tuwaŋu nan ma yawsi goy kiraŋ haraŋi kay vulsi mi sa mara'a, sumun ma bur hiɗi nisi goy hay falayta. 12Kay naŋ li kayn goy ŋayaya, may nanu, nan ma li kayni goy haraŋi kir sa Israyel kafe, goy hay falayta kaw.

13David di tam Natan: Nan li sulukawa kat Ma-Vatɗina! Nala Natan di tam David: Ma-Vatɗin vulaŋ gida kay sulukŋa vaŋu, naŋ as mit noŋɗi. 14May hay lawt ta naŋ la'ta kayni naŋ hin hagat tam sa gaw kay Ma-Vatɗina a nisi ŋul semda valamu ni, goor ma naŋ vuɗumna kayni ma mita. 15Bugol kayni Natan kalay vo hay ziyna valamu. Goor ma cata vi Uriyas vuɗum mi Davidna Ma-Vatɗin lum moy dono ŋolo.

16David siɗaw Lawn kay goora, nam sli laata; hay li ma nam kal vo'o, hay fat na'ta nam bur gaa butuwu ta-ta liyn fo goyo. 17Sum sa maariyana sa hay ziyna valamna lum dono'o kay nam fok kulo'o kay butuwna, may nam min noŋɗi, nam min ti fun hiɗi nisi noŋɗi. 18Hay buurta siɗiyata, goora mita. Sa sunda vi David ka li nari kay dum labar mitta vi goora. Nisi ka di ala: Hay li ma goor ka iri tuwana, nay dum kaw nam min humayɗi, wulin kayni nay as dum noŋ ala goor mitiya ɗawn ditige? Kay nam ɗawn ma yor tuwam ŋol suwa. 19David wi kayni sa sunda valam ka law jar-tuwsi hiɗi delsi gaa gooro, nala nam wi ala goora mitiya. Nam di tam sa sunda valamu: Goor mitiya su? Nisi ala awa nam mitiya. 20Ki kayn nala David fok kulo hay butuwna pa, nam muz tuwam goyo, Set mul talamu, muɗ sligara valamu; bugol kayni nam kalay hay ziyna vi Ma-Vatɗina kay li girifta. Hay li ma nam hoti vo'o, nam job ala nisi garam tin aya, nam ti'e may. 21Sa sunda valamu jobomu: Va ma naŋ lumna kayni ɗek mige? Hay li ma goor ka iri tuwana, naŋ li laata naŋ tiya kaw, wulin kayni hay li ma goor mitawana, naŋ fokay kulo'o, naŋ ti fun kaw kayn litige? 22Nam hot dita: Hay li ma goor ka iri tuwana, nan li laata, kay nan di'e: La Ma-Vatɗin wan hawta vanu, la nam as hin goor iriya kaw sa as wi su? 23Wulin kayni nam mitiya, nan as li laata lo kay mige? Nan as hotomay iri lo su? Nan ma tuɗ kuɗumu, may nam as hotay katanɗi.

24David teŋ ir cata valam Bat-Seba. Nam kalay bur ta'a. Na' vuɗ goor kep, nam tunum selem ala Salomon. Goor kayni Ma-Vatɗin minim ŋolo. 25Nam vulum hay ɓam Natan ma jobta, Natan tunum semda ala Yedidya, kuɗ Ma-Vatɗina.#12:25 Yedidya Min di ala ma Lawn minimna.

Nisi sli Rabba

1 Lml 20:1-3

26Hay na'ta Rabba hoyok-ziyna vi gurona vi Amon ka ŋuyi kay Yowab, nala nam sli hoyok-ziy ma mulda hayna, 27nam cuk sa sunda kat David kay dum ala: Nan mok Rabba, hoyok-ziy ma niyna nan slumawa; 28tokaŋ dir sum sa hinina, ŋuyaŋ hoyok-ziyna, slaŋga, kay la sli hoyok-ziy namna ɗawn mi nan kay tuwanu ni, suburta ɗawn ma hot vanu. 29David tok sumun kaf, nisi kalay mok Rabba; nam mok hoyok-ziyna, slumu. 30Bogoray ta kay mulla (vi Rabba) David sla'a, nekka va'a ir talente ma ora kepe, hiɗiy ma ŋaana ka ciy ta'a. Nisi tuna' kay yam David, sle ma ɓuraŋŋa hay hoyok-ziy namna ŋolo nisi yawamu, kalay hiɗi nam kafe. 31Sum sa hay hoyok-ziyna nam cuksiyay goyo, nam kaasi goy hiɗi siina, hiɗi kaway ma vunam jarkayna, hiɗi ceɗna, cuksi hay fuur ma gi direŋgella, hoyok-ziyna vi gurona vi Amon kaf nam lum ki kayn nala. David hot hay Yerusalem hiɗi sumun kafe.

Currently Selected:

2 SAMUEL 12: Massana

Highlight

Copy

Compare