2 MULIYANA 24

1Hay liyna valam kayni, Nebukadnesar mul ma Babilonna kal goy ti ɓuraŋi. Yoyakim musi gaa kuɗ gaŋeraŋa valamu ir busat ɦidi; may nam fok kulo kat Nebukadnesar. 2Ki kayn nala Ma-Vatɗina cuk sojena vi Kaldeena, sojena vi Siriyana, sojena vi sa Mowabna hiɗi sojena vi sa Amonna kay durumu. Ma-Vatɗin cuk sojen kat jafna vi Yuda kayni kay vatsi goyo, kuɗ yoboy ma nam dum hiɗi vun sa sunda valamu sa jobta.

3Van ki kayn nala co kayn kuɗ minda vi Lawna tuta, kay nam mini kay yaw jafna vi Yuda goy vok iramu, kuɗ suluk ma Manase lum kafna. 4Kuɗ busuw ma bay-joota ma Manase ɦokom goyo ma nam hob Yerusalem hiɗi namna. Kuɗ kayni Ma-Vatɗina min vul gida kay sulukŋa visi noŋɗi.

5Caw lopna vi Yoyakim ma hinina, slen ma nam lum kafna, kayni ka ɗoy hay ɗerwelda vi Labar-Ma-Liyna vi muliyana vi Yuda. 6Yoyakim miti kuɗ sumiyamu, goora valamu Yoyakin ti mulda hay baŋalamu.

7Mul ma Egiptena may kalay goy hay nagata valam pa loɗi, kay mul ma Babilonna yaw ir nagana valam kafe, tun caway hay niy-ma-riŋŋa vi Egipte pa, ta-ta hay vun niy-lumna Eufrata goŋ'.

Yoyakin, mulla vi Yuda, nisi ŋuy Yerusalem sem ma jewna

2 Lml 36:9-10

8Yoyakin ka hiɗi busat doogo yam glafandi hay li ma nisi tunum mulu. Nam ti mulda ir til ɦidi hay Yerusalem. Sulum ya' Nehusta, goota vi Elnatan, ma Yerusalemna. 9Nam li slen ma joona kir Ma-Vatɗina, ŋray ca ki bulum nala.

10Hay na'ta kayni, sa sunda vi Nebukadnesar mul ma Babilonna co'o, kay dur Yerusalem, nisi ŋuy Yerusalem cusl'. 11Nebukadnesar mul ma Babilonna co vun hoyok-ziyna, kayni hay li ma sa sunda valamu ka ŋuy hoyok-ziyna. 12Ki kayn nala Yoyakin mulla vi Yuda kalay kat Nebukadnesar, namu hiɗi sulumu, sa sunda valamu, sa ŋulona valamu hiɗi sa patayna valam kafe. Mul ma Babilonna gum daŋgaya, kayni hay busata glafandita vi mulda valamu. 13Timgil ma ka hay ziyna vi Ma-Vatɗina hiɗi timgil ma ka hay ziyna vi mulla nam yawam kafe; tasa ma ora ma Salomon mulla vi Israyel kotom kalaf hay Tempella nam yawam kafe, tasa ma kawayna ma mulla Salomon kotom kalaf hay Tempella ki Ma-Vatɗin dum nalana, nam tom goy kafe. 14Sum sa ŋulona hay Yerusalemna nam kalsi gorvo kaf, tapay hiɗi sum sa jufayna pet nisi ir birim doogo, sa har guna hiɗi sa kot vun-ziyna, hin kayni si sum sa hawna tuta. 15Nam kal Yoyakin hay Babilon, sum-mulla nam va'ays hay Yerusalem pa kala' gorvo hay Babilon, boyna vi mulla hiɗi sa patayna valam kaw nam yawsiya, hiɗi sa ŋulona vi nagat kafe. 16Sa wi duur kaf ir birim siɗiya, sa har guna hiɗi sa kot vun-ziyna ir birim ɗaw, sum sa jufayna hiɗi sum sa wi duur kafe. Mul ma Babilonna kalsi goy gorvo'o hay Babilon.

17Mul ma Babilonna vi Mataniya nasum Yoyakinna, nam tunum mulu hay baŋal Yoyakin, nam muɗum selem ala Sedekiyas.

Sedekiyas mul ma cawna vi Yuda. Nisi ŋuy Yerusalem, nisi sla'a

2 Lml 36:11-21; Yer 52

18Sedekiyas tun hay mulda kayn busata valam asay dok-ma' yam kepe. Nam ti mulda ir busat doogo yam kepe hay Yerusalem. Sulum ya' ala Hamutal, goota vi Yeremiyas ma Libnana. 19Nam li slen ma joo'o kir Ma-Vatɗina, ŋray ca ki Yoyakim li ays nala. 20Van kayni co'o kuɗ ɦiyda vi Ma-Vatɗina kat Yerusalem hiɗi Yuda, kay nam min noysi goyo vok iramu. May Sedekiyas fok kulo'o kat mulla vi Babilon.

Currently Selected:

2 MULIYANA 24: Massana

Highlight

Compare

Copy