2 KORINTENA 12
12
Slen ma vul tuwam kir Paulusna
1 Kor 2:3-5; 2 Kor 4:7-10
1La linigekaw nan ma subur tuwanu, la kayni may ŋaaɗi kaw. May wulini nan min ɗek goyo kay slen ma Bum-Sumuna vulum goy kiran haraŋi. 2Nan wi san kep hay Kristu, busat wulini liy doogo yam fiɗi (la nam ay hay sliw-tuwna kla nan wiɗi, la goy jiy tuwam kla nan wiɗi, may Lawn kep wi'e). San kayni vumis kulo'o ta-ta hay wuralawna ma mul-ɦidina. 3Nan wi ala san kayni (la nam ay hay sliw-tuwam kla nan wiɗi, la goy jiy tuwam kla nan wiɗi, may Lawna kep wi'e). 4Nam sliys kulo'o ta-ta hay Paradis, humam hum yoboyna ma vun san as dum goyɗina. 5Nan as subur tuwan kay san ma ki kayn nala. May kay tuwanu nan as subur tuwanɗi, nan as subur tuwan kayni hay maŋayta van ɦawa. 6La nan min subur tuwanu, nan may mi sa ma ɦay-ɦaynɗi, kay nan ma da' ti gasita; may nan min tel tuwanu, kay sa fi var kanu suw va ma nam wi hiɗi iranu lebo hum hiɗi humamɗi.
7Kuɗ slen ma ŋulona ma vul tuwam kiranu, kay a nan ma jigal tuwanu kay kaynɗi, sunda vi Satan jikan zigiyn kep hay sliw-tuwanu, kay nan ma fi a jigal tuwanɗi. 8Nan siɗaw Bum-Sumuna sem ɦidi kay nam ma pat van kayni goy hay sliw-tuwan pa, 9may nam hotan dit ala: «Slugota vanu asaŋawa, kay donota vanu vuna' hob goyo hay maŋayta». Kay na'ta nan min subur tuwanu hay maŋayta vanu, kay donota vi Kristu fi mus hayanu. 10Hay na'ta nan as li firiya hay maŋayta, hay ŋulda, hay kiɗata, hay lasta, hay yorta kaw kay sem Yesu. Kay hay li ma nan ka maŋaya, hay na'ta nan ka dono'o.
Va ma dik Paulus ka tum kalamna
11Nan ay muɗi sa ma ɦay-ɦayna, muɗan nala si nigiya. Kay lali ɗek goy kan si nigiya, kay apostolayna sa nigi ɗuwsi ŋulo suwan nanna, nan may kiɗay goy katsiɗi, la nan may as vaɗi kaw. 12Ɗekka ta goy ir va'ta vi sa ma apostolayna nigi wa' kuɗ lopna ma ka li jargiya hiɗi cubta-ŋalda hay wakka kaf, hiɗi sle ma ɗekka, sle ma suw mu'da hiɗi lop ma gaŋeraŋ kuɗumna kaf. 13Slen ma nan lum kat sa tapna segena, may nan lum katgi nigiɗi mi mige? Kep kayn ala nan hin tuwan hay ɓigi kay nigi ma ŋom ŋil tuwanɗi tutaɗi su? Vulangi gida kay bay-ɗiger na'ta kayni.
14Humgiya, tuwan koti kan kot kay tuɗis goy vigiya sem ma ɦidina, may kay ŋoman ŋil tuwanu may si nigiɗi, kay nan may gar slena vigiɗi, may nan gargit si nigi kay tuwgiya, may tam gurona kay tok slen mi sumaysiɗi, may sumayna as tok slen mi gurona. 15May nanu, nan mingi ŋolo kuɗ minda vanu, nan min vul tuwan goyo kaw kay ciwta vigiya. Hay li ma nan mingi ŋol suwa, nigi as minan kiɗay su?
16May nan may tun nekka kigiɗi, may (nisi di'e): Nanu mi sa ma ɗutta, ala nan yaw slen kay sumun hiɗi ɗutta. 17Nan yaw slen kigi yali hiɗi sa kep jar sum sa nan cuksiyays katgin su? 18Nan siɗaw Titus kay nam tuɗis katgiya, nan gi ɓasuynis kuɗum kaw, Titus yaw sle hay ɓigi su? Numa may poy hay ŋusta ta keptaɗi su? Hay hagat ta keptaɗi su?
19Sa hayan kigina, hay jew pa nigi ka var ala numa ka ɗop lawt kuma vokgiya, may naɗi, numa ka law kayni vok Lawna hay Kristu, hay slen kaf, kayni kay wulgi kulo'o. 20Kay nan li nar ala, hay li ma nan ma co jargiya, nan ma figi ki nan min naɗi, nigi ma fan ki nigi min naɗi kaw. Nan li nar ala slen cani nan ma fum jargi klasige: Ci-wayta, hunayta, gawta, ka-irta, law ma joona, law ma sinna, jigal-tuwta hiɗi gijum-gijumta. 21Nan li nar ala hay li ma nan ma co jargiya, Lawna vanu ma muɗan haw lo kigiya, hay li ma nan ma tun caw yor tuwanu kay sumun ŋolo jargiya sa li suluk jewe, may bay ham tuwa kay liwista hiɗi zlata-bulota hiɗi sle ma gunina ma nisi lumna.
Currently Selected:
2 KORINTENA 12: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001