1 SAMUEL 8

TUNDA VI MULDA

Sum sa Israyella ka job mul kisiya

1Hay li ma Samuel muɗ maari, nam tun gurona valam kay ka kitata vi sa Israyella. 2Goora valam ma vuɗi jewna yum Jowel, ma ma'na yum Abiya; nisi ay si sa ka kitata hay Beer-Seba. 3Gurona vi Samuel min sli kuɗ busiɗi; nisi daram mi slena vi sumuna, yaw vulda, min gun kitata kaw. 4Sa maariyana vi Israyel tok tuwsi kafe, nisi ma kat Samuel hay Rama. 5Nisi di tam Samuel: Humaŋu, naŋ muɗi maari, may gurona vaŋ min sli kuɗaŋɗi. Wulin kayn naŋ ma tun mul kuma kepe kay ka kitata vuma'a, ki jaf-sum segen kaf nala kaw. 6Dita ta nisi di tam Samuel ala: Vulma mulu kay ka kitat kuma'a kayni may cuk kuɗ hayamɗi, nala Samuel siɗaw Ma-Vatɗina. 7Ma-Vatɗin di tam Samuel: Slen ma sumun daŋga kafna naŋ ma li kuɗumu; kay nisi ganti goy kayn mi nanu, may mi naŋɗi, kay nisi min ala nan ma ti mul kisiɗi. 8Nisi ka li taŋ kayni ki nisi ka li tan nan nala, hay li ma nan kalsiyay goy hay nagat Egipte pa ta-ta vayɗi; nisi noyan goyo kay sun lawayn mara'a. 9Humaŋ kuɗsi maŋu; may naŋ ma disi goy kirsi haraŋi, naŋ ma ɗeksi kay lop ma nisi ma lum tam mul ma tun kisin ɗawni.

10Samuel mar dita vi Lawn tam sumun kaf kuɗ mul ma nisi ka jobomna. 11Nam di'e: Kayni mi va ma mul ma nigi tunum kigina ma lum tigin ɗawni: Nam ma yaw gurona vigi sa jufayna, nam ma laksi kulo kay keke-ma-duura valamu, jar sa ɓe kay kulumayna valamu, kay nisi ma jaŋ vok keke-ma-duura valamu; 12nam ma yaw segena kay tunsi ŋol kay vok ma birimna hiɗi vok ma dok-vaslna, nam ma laksi hay sinena valam kay zumumu, kay feɗ wana valamu, kay kotom sle-ma-duura, kay kotom sle ma tam keke-ma-duura valamna kaw. 13Nam ma yaw guro-boyna vigiya kaw, kay nisi ma kotom urdi ma hisna, kay nisi ma kotom sle ma tina kaw. 14Gal sinena vigi ma ŋaana nam ma yawamu, gulda-guldana vigiya hiɗi gun-olive nam ma yawamu, ma vulum mi sa sunda valamu. 15Gal-ma-doogona vi jafna vigiya hiɗi gulda-guldana nam ma yawamu, ma vulum mi sa sunda valamu. 16Nam ma yaw sa sunda vigiya, luwayna vigi ma ŋaana hiɗi kurona vigiya kaw, ma li lopna valam hiɗi nisiya. 17Nam ma yaw gal-ma-doogona vi farayna vigiya, nigi kay tuwgi kaw ma muɗ si gorvona valamu. 18Nala nigi ma muɗ tiya kay mulla vigi namna ma nigi vilekemna, may Ma-Vatɗin ma hum siɗawta vigi noŋɗi.

19Sumun min hum dita vi Samuel noŋɗi. Nisi di'e: A'a, numa min ala mul ma tun kuma'a, 20a numa kaw ma li ki jaf-sum segen kaf nala; mulla vuma ma ka kitata vuma'a, nam ma tun vokma'a, tun vokma hay duura kaw. 21Hay li ma Samuel hum dita vi sumun kaf humna, nam tuɗ da' mi Ma-Vatɗina. 22Bugol kayni Ma-Vatɗina di tam Samuel: Humaŋ kuɗsiya, tunaŋ mul kisiya. Bugol kayni Samuel di tam sum sa Israyella: Mergi hay hoyok-ziyna vigiya vigiya kafe.

Currently Selected:

1 SAMUEL 8: Massana

Highlight

Copy

Compare