1 SAMUEL 19

Sawul gar kay ci David goyo. Mikal cata vi David suɗum goyo, nam pir goy kat Samuel

1Sawul di tam Yonatan goora valamu hiɗi sa sunda valam kaf, kay nisi ma ci David goyo, may Yonatan goora vi Sawul, nam min David ŋolo. 2Nam vulum labara ka dum ala: Sawul bunu ka gar kay caŋ goy mati. Jifini hay graw culumta ɗawni naŋ ma ŋom tuwaŋ ŋaa'a, musaŋ goy hay liy ma ŋayaya, nala ŋayaŋ tuwaŋ goyo. 3Nan ma kalays goyo, nan ma col tam bunu hay sine ma naŋ ka ŋayay hayamna; nan ma law kaŋu tam bunu, nan ma wi va ma nam ma dumna, nan ma naraŋ labar namnisa. 4Yonatan di law ma ŋaan kay David tam Sawul bulumu. Nam di'e: Mulla, naŋ ma li suluk kat sa ma sunda vaŋ Davidɗi, kay nam kaw may li suluk kataŋ naŋɗi lay. Nam lum kaŋ kayn mi law ma ŋaan hay'; 5Nam vul tuwam vun mitta, nam ci sa ma Filistin goyo, Ma-Vatɗin li butta-goyta ta ŋolda hay Israyel kaf kuɗum namu. Naŋ wum kaw, dikaŋ li firi kuɗumu kaw. Kay mige naŋ as li suluk kat busuw ma bay joota? Naŋ as ci David goy bay lawi kay mige? 6Sawul hum vun Yonatan, nam yi va kalamu di'e: Ma-Vatɗin ka iriya! David as mitɗi. 7Yonatan yi David, nam vulum labar namna kafe; bugol kayni nam tuɗum kat Sawul, nisi lak kat tuwsi ki nisi ay jew nala.

8Duur ka tuɗ vokom dok-doko. David tuɗ dur sa Filistina; nam ci sumun kuɗsi ŋolo, nisi mun vokom jaŋi. 9Ki kayn nala ŋusta joota vi Ma-Vatɗina cuk kay Sawul, nam ka musi hay ziyna valamu hiɗi kawayta valam hay ɓalamu. 10David ka liwa, Sawul min kay weɗem hiɗi yakata valam kulo kat goŋ-ziyna. May David vi tuwam goy kalamu, nala kawayta vi Sawul ɓal kulo kat goŋ-ziyda. David pir goy jaŋi, nam ba kay Sawul hay henjeta.

11Sawul cuk sumuna hay ziyna vi David, kay nisi ma ŋomom ta-ta cum goyo hay graw culumta. May Mikal vul labara mi jufa' David, na' ka dum ala: La hay henjet ta vaydita naŋ may pir goyɗi, jifin ɗawn naŋ ma fi mitta. 12Na' jikim gaa'a hay ir ziyda, nala David kalay jaŋi. Ki kayn nala nam ba kisiya. 13Bugol kayni Mikal sli terafimna, na' burum kulo kay gilikŋa; na' tun bak ɦu-meet kulo kalamu, na' ɗutum hiɗi borgona. 14Hay li ma Sawul cuk sumun kay vi David, na' di'e: Nam ka moyo. 15Sawul hot cuksi lo kay nisi ma wum hiɗi irsiya, nam di'e, la nam ka buri gaa kay gilikŋa kaw nigi ma maranta, kay nan min cum goyo. 16Sum nisin hotay lo, nisi ɗuw na kayni, buri gaa kay gilikŋ kayn mi terafimna, bak fok-meen ka tuni kalam ta' may. 17Sawul di tam Mikal: Nak ɗutan nala kay mige? Nak hin sa ma gaw kanna pira kay mige? Mikal hot dit mi Sawul: Nam dan ala la nan hinim kalɗi, nam ma can mati.

18Ki kayn nala David pir goyo, nam kalay kat Samuel hay Rama, nam vum labara kay slen ma Sawul lum talamna kafe. Bugol kayni nam kalay mus hiɗi Samuel hay Nayot. 19Nisi vul labara tam Sawul ala: Humaŋu, David ka hay Nayot, goboy hiɗi Rama. 20Sawul cuk sumuna kay vi David aya. Nisi fi sa jobta ka tokay di law ma voksina, Samuel ka tuni voksina. Ŋusta vi Lawna kal hay dik sum sa Sawul cuksina, nisi kaw tun caw di law ma voksina. 21Nisi mar labara tam Sawul, nam cuk sum sara'a, nisi kaw tun caw di law ma voksina. Nam cuk sum sara lo sem ma ɦidina, nisi tun caw di law ma voksin lay. 22Nala Sawul kay tuwamu kalay hay Rama, hay li ma nam co tam kaata ta ŋolda ta ka hay Seku, nam joba: Samuel hiɗi David ka arige? Nisi hotom dita: Nisi ka hay Nayot, goboy hiɗi Rama. 23Nam tun iram hay Nayot, goboy hiɗi Rama. Ŋusta vi Lawna cuk kalam kaw; Sawul ka tuɗ hay hagata, nam ka di law ma vokomna, ta-ta nam co hay Nayot, goboy hiɗi Rama. 24Nam fok sligara valam goyo, nam di law ma vokomna vok ir Samuel kaw, hay buur na'ta ta-ta hay henjeta, nam gi tuwam gaa kay nagata, goy nala'a, ta-ta buur tos. Kuɗ na'ta kayni nisi ka di'e: Sawul kaw ka jar sa jobta lay su?

Currently Selected:

1 SAMUEL 19: Massana

Highlight

Copy

Compare