1 MULIYANA 12

MULIYANA VI YUDA HIƊI MULIYANA VI ISRAYEL, TUN CAW TAM ƁURAWTA-GOYTA PA TA-TA TAM VATTA VI MULDA VI ISRAYEL

Ɓurawta vi mulda: Robowam tuni mul hay Yuda, Yerobowam tuni mul hay Israyel may

2 Lml 10

1Robowam kalay hay Sikem, kay sum sa Israyel kaf coy hay Sikem kay tunum mulu. 2Hay li ma Yerobowam goora vi Nebat hum labara namna, nam ay hay Egipte tuwa, kay nam ka piri goy gine ɗawni vok ir mulla Salomon, nam ka musi ɗawni hay Egipte. 3Nisi gi sunda kay yumiya: Nala Yerobowam hiɗi vokŋa vi sa Israyel kaf co kat Robowam, nisi ka dum ala: 4Buŋ tun jak ma nek kuma'a, lop ma zalla hiɗi jak ma nekŋa ma buŋ tunum kuma'na naŋ ma yawam goy kuma'a, nala numa ma sunaŋu. 5Nam disiya: Tuɗgiya, hotgiyay tanu hay buur ɦidi. Nala nisi kaliya.

6Mulla job tam sa maariyana sa ays mus hiɗi bulum Salomon hay li ma nam ka iri tuwana: Nam disiya, nigi min ɗekan yalla mige kay hot dit tam sumun kayni? 7Nisi ka dum ala: Vaydi la naŋ min sun sum nisin kayni, la naŋ min humsiya, la naŋ hotsi dit hiɗi yoboy ma ŋaana, nala nisi ma lak ɗawni si sa sunda vaŋ dok-doko. 8May Robowam hin gatta vi sum sa maariyan goyo, nam kalay job sum sa joriyon sa wul hiɗi namna, sa ka lakay hiɗi namna. 9Nam di tisiya: Sumun kayni joban ala: Jak ma nekŋa ma bun tunum kisina nan ma yawam goyo. Yal ma nigi min ɗek tanu kay nan ma di tisiya mi yal mige? 10Sumun sa wul hiɗi namna ka dumu: Nisi di taŋ ala buŋ tun jak ma nekŋ kisiya, may naŋ muɗum hefteŋe kuma! May naŋ ma disi ala: Cita-ɓan ta goorta na' ŋolo suw fur bunu. 11Wulin kayni bun tun jak ma nekŋ kigiya, nan hayɗini ma muɗum nek suwa, bun watgi hiɗi libetna, may nan hayɗin ma watgi hiɗi ɦurduwna.

12Yerobowam hiɗi sum segen kaf co tam Robowam hay buurta ɦidita, kuɗ va ma mulla di ala hotgiyay tanu hay buur ɦidi. 13Mulla ka hotsi dit hiɗi delem ɗeŋe, gatta ta sum sa maariyan dumtita nam hina' goyo, 14nam lawsi hiɗi gatta ta sum sa joriyon dumtita. Nam ka disi ala: Bun tun jak ma nekŋ kigiya, may nan hayɗin ma muɗum nek suwa, bun watgi hiɗi libetna, may nan hayɗin ma watgi hiɗi ɦurduwna. 15Ki kayn nala mulla min humsi noŋɗi, kay lawt kayni hina' li'e mi Ma-Vatɗina, kay hob vun yoboyn ma Akiya dumu hay Silo, mi Yerobowam goora vi Nebat.#12:15 Ɗuw hay 11:12.

16Hay li ma sum sa Israyel kaf wi ala mulla may humsiɗi, nisi di tam mulla: Gal vuma ka jar jafna vi David su? Voco vuma may jar gurona vi Isayɗi, mergi hay guɗukŋa vigiya, nigi sa Israyella, wulin kayni nigi jafna vi David, ŋomgi tuwgi kay tuwgi yo. Ki kayn nala sa Israyella kaf kalay hay guɗukŋa visiya visiya.

17Robowam ti mulda kayni kay gurona vi Israyel sa hini hay hoyok-ziy ma ŋulona vi Yuda tuta. 18Nala mulla gi Adoram ma tuni kay yaw taara, may sum sa Israyel kaf gum hiɗi goorhoyona, nala nam mitiya. Mulla Robowam li tuwam koloyo kay jik kulo hay keke-ma-duura kay pir hay Yerusalem. 19Ki kayn nala, sum sa Israyella ja jarsi goy hiɗi David ta-ta vaydi.

20Sum sa Israyella kaf hum ala Yerobowam hotiyawa, nisi gi sunda kalamu kay yumay jarsi hay tokŋa, nisi tunum mulu kay sa Israyel kafe. Jafna vi Yuda kayni mi ma hin kuɗ sumuna vi Davidna tuta.

21Hay li ma Robowam co hay Yerusalem, nam tok jafna vi Yuda hiɗi jafna vi Benyamin kafe, sum sa wi duura birim kis hiɗi diram dok-glafandi, kay nisi ma dur sum sa Israyella a hotsiyay hay gaŋeraŋa valam nam Robowam goora vi Salomon. 22May Ma-Vatɗina di yoboyn tam Semayeya sana vi Lawna ala: 23Naŋ ma di tam Robowam goora vi Salomon, mulla vi Yuda, ziyna vi Yuda hiɗi Benyamin kaf, hiɗi sum segen kaf: 24Naŋ ma disi ala: Nigi ma tu'ɗi, guro-biyogina sa gurona vi Israyel nigi ma dursiɗi, hin gige gige jargiya hot hay ziyna valamu valamu, kay van kayni hinim co'o mi nanu. Nisi hum kuɗ yoboyna vi Ma-Vatɗina, nisi hotiya, kuɗ dita vi Ma-Vatɗina may.

Mulda vi Israyel hay ɓam Yerobowam, girifta vi goor-put ma ora

25Yerobowam in Sikem kulo kay hiɗiyta vi Efrayim, nam musi haya. Bugolda nam kalay goyo, in Penuwel lo.

26Yerobowam di hay dikam kalaf ala: Wulin kayni mulda ɗawni ma hot hay ɓam jafna vi David. 27La sumun kayni tuɗ Yerusalem kay li ɗifin hay ziyna vi Ma-Vatɗina, diksi ɗawn ma muɗ min mulsina Robowam, mulla vi Yuda, nisi ɗawn ma can goyo, kay hot kuɗ Robowam mulla vi Yuda. 28Bugol nam job tuwam jobna, mulla kot guro-luway ma ora ma'; nam di tam sumuna: Nigi ka tuɗ jew dok-dok kayn kulo Yerusalem, nigi sa Israyella. May wulin kayni, Lawna vigi ma kalgiyay goy hay nagat Egipte pan zawni. 29Goor-put ma kepna nam colom hay Betel, hena nam colom hay Dan may. 30Kayni muɗi mi va ma kalsi hay sulukŋa. Sumun ka tuɗ vok goor-put ma kepna ta-ta hay Dan. 31Yerobowam kot ziyn kep kulo hay liy ma ɗiŋiriŋŋa, nam tun muliyan-sa-ɗifinna, sa yaway kuɗ jaf-sumun kafe, sa may hay jafna vi Levitɗina.

32Yerobowam tun yuldeta hay til ma glafandina, hay buurta doogo yam vaslta vi tilla, ki yuldeta ta ka li hay Yuda nala, nam jik kulo hay giwin-ma-ɗifinna ma nam kotom hay Betel kay sumuna ma li ɗifin tam guro-luwayna ma nam kotomna. Nam lak muliyan-sa-ɗifinna hay Betel kat liyn ma ɗiŋiriŋŋa ma nam kotomna.

33Nam jik kulo kay giwin-ma-ɗifinna ma nam kotom hay Betella, hay buurta doogo yam vaslta vi til ma glafandina, kayni mi til ma nam vilekem kuɗ minda valamu. Nam li yuldeta kay gurona vi Israyel, nam jik kulo kay giwin-ma-ɗifinna kay ŋal urdina.

Currently Selected:

1 MULIYANA 12: Massana

Highlight

Copy

Compare