1 YOHANA 5

Vida hiɗi vuɗna va'a

1Gigekaw ma vi ala Yesu mi Kristu, vuɗum mi Lawna, gigekaw min nam ma vuɗumna min nam ma nam vuɗumna kaw. 2Hiɗi kayni nay wi ala nay min gurona vi Lawna: Hay li ma nay min Lawna, nay li kuɗ vun-ma-gatna valamu kaw. 3Nay min Lawna kayni hay li ma nay li kuɗ vun-ma-gatna valamu, vun-ma-gatna valamu may nekɗi, 4kay gigekaw ma vuɗum mi Lawna kol kay nagata, kayni donota ta kol kay nagata: Ti vida vaya. 5Nam ma kol kay nagata mi gige? May mi nam ma vi ala Yesu mi Goora vi Lawna ɗisu?

6Mi namu, Yesu Kristu ma ma'a hiɗi niyna hiɗi busuwna, may hiɗi niyna ɦawaɗi, hiɗi niyna hiɗi busuwna kaw; lo li di-goyta kayni Ŋusta, kay Ŋusta kayn ti gasita. 7Nisi sa li di-goyta ka ɦidi hay wuralawna: Bumna, Yoboyna hiɗi Ŋusta-Peldetta. Nisi ɦidi lakŋi nisi tapay kepe. 8Nisi sa li di-goyta gaa kay nagata ka ɦidi: Ŋusta, niyna hiɗi busuwna. Nisi ɦidi lakŋi vunsi ŋray kep. 9La nay vi di-goyta vi sumuna, di-goyta vi Lawna na' ŋol suwa; kay di-goyta vi Lawn kayn ala: Nam di goy kay Goora valamu. 10Sa ma vaawa hay Goora vi Lawna, di-goyta na'ta ka hayam nam kay tuwamu; sa ma vi hay Lawnɗina, nam muɗum goy sini, kay di-goyta ta Lawn la' hiɗi Goora valamu nam min vi haya'ɗi. 11Di-goyta na'ta kayni: Lawna vulay irita vatɗitawa, irita na'ta ka hay Goora valamu. 12Sa ma vi hay Goora fi iritawa, sa ma vi hay Goora vi Lawnɗina irita tay hayamɗi.

13Slen kayni nan ɗoowa tigiya, kay nigi ma wi ala nigi fi irita vatɗitawa, nigi sa vi hay semda vi Goora vi Lawna. 14Nay wi goy gasi kayn ala: La nay job va'a kuɗ minda valamu, nam ma humaya. 15La nay wi ala nam humaya, la nay jobom kay mige kaw, nay wi ala va ma nay jobomna nay fumawa.

16La san wi ɓasulumna li suluk ma nar tam mittaɗi, nam siɗawa, Lawna ma vulum irita; kayni may mi suluk ma nar san tam mittaɗi. Kay sulukŋa ma nar san tap mitta ka'a. Nan digi ala nigi siɗaw kayn may kay suluk namnaɗi.#5:16 Ɗuw hay Mat 12:31-32. 17Lop ma bay-ɗigera kaf mi sulukŋa. Suluk mara'a ma nar san tam mittaɗi ka kaw.

18Nay wi ala sa ma Lawn vuɗumna li sulukɗi; may sa ma Lawn vuɗumna nam ŋomomu kay Ma-Joona ma jomɗi.

19Nay wi ala nay ir vi Lawna, may nagat kuɗulu ka hay gaŋeraŋa vi Ma-Joona.

20May nay wi kaw ala Goora vi Lawna maawa, nam vulay yamda-widawa kay nay wi ma gasina, nay ka hay ma gasina kaw; hay Goora valamu Yesu Kristu, namu mi Lawna ma gasina hiɗi irita vatɗita.

21Gurona vanu, ŋomgi tuwgi kay lawayn ma waana.

Currently Selected:

1 YOHANA 5: Massana

Highlight

Copy

Compare