1 YOHANA 3

1Ɗuwgi ti-kamda ŋolda ta Bumna la' kayta natige, kay nay muɗi yay ala gurona vi Lawna. Nay muɗi yay nala kaw. Kuɗ na'ta kayni sum sa nagatna may way nayɗi, kay nisi bay wum namu. 2Nigi sa hayan kigina, wulini nay muɗi gurona vi Lawna, la nay ma muɗ nanige kla kayni bay ɗek goy kiray haraŋ tuwa, may nay wi ala hay li ma nam ma ɗek tuwam goy haraŋi, nay ma muɗ ŋray ca ki nam nala, kay nay ma wi tuwam ma gasina goy haraŋi. 3Gigekaw ma ka hiɗi cubta-sle'ta kayni hayamu, nam ma li tuwam peldete, ki nam Bum-Sumuna ka peldete nala.

4Gigekaw ma li suluku, nam raw vun-ma-gatna goyo, kay sulukŋa kayni mi rawta-goyta vi vun-ma-gatna. 5May nigi wi ala nam Bum-Sumuna vul tuwamawa goy haraŋi kay yaw sulukŋa goyo; sulukŋa may hayam nam noŋɗi. 6Gigekaw ma mus hay namu li sulukɗi; la sa li suluku nam may wumɗi, wum hiɗi iram noŋɗi.

7Gurona vanu, hin sa ɗutgi goyɗi, sa ma li ɗigerta nam ɗigere, ki nam Bum-Sumuna ka ɗigere nala. 8Sa ma li suluku nam vi Matna, kay Matna li suluku hay cawa'ta tunit pa.#3:8 Ɗuw hay Yoh 8:44; Heb 2:14. Goora vi Lawna vul tuwamawa goy haraŋi kay ɓulak lopna vi Matna.

9Gigekaw ma vuɗum mi Lawna li sulukɗi, kay jafna vi Lawna ka cuki hayamu, nam as li sulukɗi, kay vuɗum mi Lawna. 10Hiɗi kayni san fi poŋ ir gurona vi Lawna hiɗi gurona vi Matna goy haraŋi. Gigekaw ma li ɗigertaɗi, nam may vi Lawnɗi, sa ma min ɓasulumɗina nam ki kayn nala kaw.

11Kayni mi labara ma nigi humumi hay tun cawta pa ala: nay ma min tuway jar-tuwaya; 12nay ma li ki Kayin naɗi, nam ay vi ma Joona, nam ci ɓasulumna goyo. Nam cum goyo kay mige? Kay lopna valam nam joo'o, may lopna vi ɓasulumna ay ɗigere.#3:12 Ɗuw hay Ct 4:8.

13Ɓosiyonna, la sa nagatna ka gaw kigiya, nigi ma muɗ ɦuyum' kay kaynɗi. 14Nay wi ala nay jikiyawa hay mitta pa kal hay irita, kay nay min ɓosiyayna. Sa ma min ɓasulumɗina mus hay mitta. 15Gigekaw ma ka gawt tam ɓasulumna nam sa ma ci mati, nigi wi ala sa ma ci mati irita vatɗita may mus hayam noŋɗi. 16Nay wi ti-kamda na'ta kayni: kay nam vul irita valam goy kaya. Nala kaw nay ma vul irita vay goy kay ɓosiyayna. 17La san ka hiɗi slen hay ɓalamu, la nam wi ɓasulumna hay kiɗata, may duk dikam talamu ni, ti-kamda vi Lawna fi mus hayam ir nanige? 18Gurona vanu, minay tuway hiɗi dit ɦawaɗi, hiɗi vunay ɦawaɗi kaw, may hay lita hiɗi gasita.

19Kuɗ kayni nay ma wi ala nay si sa vi gasitna, nay ma sleɗ dikay gaa vokomu kaw. 20Kay la dikay ka kitat kay joota vaya, Lawna nam ŋol suw dikaya, nam wi slen pete kaw. 21Nigi sa hayan kigina, la dikay ka kitat kay joota vayɗi, nay lakay hiɗi iray teŋiya vok Lawna. 22Mige kaw ma nay jobom kalamna, nay ma fumu, kay nay ŋom vun-ma-gatna valamu, li slen ma kiram ŋaana kaw. 23Kayni mi vun-ma-gatna valamu: A nay ma vi hay semda vi goora valamu Yesu Kristu, a nay ma minay tuwaya tuwaya, kuɗ vun-ma-gatna ma nam vulaya. 24sa ma ŋom vun-ma-gatna valamu mus hay Lawna, Lawna mus hayamu lay; kuɗ Ŋusta ta nam vulayawa, kuɗ kayni nay ma wi ala nam mus hayaya.

Currently Selected:

1 YOHANA 3: Massana

Highlight

Copy

Compare