Juan 18
18
Jesusta presochasqankumanta
(Mt 26.47-56. Mr 14.43-50. Lc 22.47-53)
1Chaykunata niruspanmi discipulonkunawan Jesús lloqsirqa Cedrón wayqopa waklawninman. Chaypi kaq huertamanmi Jesús yaykurqa discipulonkunapiwan. 2Traicionaqnin Judaspas sumaqtam reqsirqa chay sitiotaqa, chaypiqa achka kutitam Jesusqa discipulonkunawan huñunakuq. 3Chaymanmi Judas chayaramurqa soldadokunawan hinaspa sacerdotekunapa kamachiqninkunapa hinaspa fariseokunapa kachasqan guardiakunawan. Paykunam antorchayuqkama, mecheroyuqkama hinaspa armayuqkama rirqaku. 4Jesusqa yacharqañam tukuy ima pasananta chaymi asuykuspa tapurqa:
¿Pitataq maskachkankichik? nispa.
5Paykunañataqmi nirqaku:
Nazaretmanta kaq Jesustam, nispanku.
Jesusñataqmi nirqa:
Ñoqam kani, nispa.
Traicionaqnin Judaspas paykunawanmi kachkarqa. 6“Ñoqam kani” nispa Jesús niptinmi runakunaqa qepaman suchurispanku pampaman wichiykurqaku. 7Jesusmi musoqmanta tapurqa:
¿Pitataq maskachkankichik? nispa.
Paykunañataqmi nirqaku:
Nazaretmanta kaq Jesustam, nispanku.
8Jesusñataqmi nirqa:
Ñam nikichikña “Ñoqam kani” nispa. Ñoqata maskawaspaykichikqa paykunataqa saqeychik pasakunankupaq, nispa.
9Chaynapim cumplikurqa Jesuspa ñawpaq rimarisqan, paymi nirqa: “Taytapa qowasqankunataqa waqaycharqanim, manam mayqanninpas chinkarqachu” nispa. 10Simón Pedroñataqmi espadayuq kasqanrayku, hurqoykuspa Malco sutiyuq runapa alleq rinrinta qorururqa. Malcoqa karqa sumo sacerdotepa serviqninmi. 11#Mt 26.39; Mr 14.36; Lc 22.42.Jesusñataqmi Pedrota nirqa:
Espadaykita vainanman kutiykachiy. ¿Ñakarinaypaq Taytaypa qowasqantaqa manachu chaskiyman? nispa.
Anaspa wasinman Jesusta pusasqankumanta
(Mt 26.57-58. Mr 14.53-54. Lc 22.54)
12Llapa soldadokunam capitanninpiwan hinaspa judiokunamanta kaq guardiakunapiwan Jesusta hapiruspanku chaqnarurqaku. 13Hinaspam puntata pusarqaku Anaspa wasinman. Anasqa karqa Caifaspa suegronmi. Chay watapim Caifasqa karqa sumo sacerdote. 14#Jn 11.49-50.Caifasqa puntataraqmi judiokunata nirqa: “Aswan allinqa kanman nacionninchikpa rantinpi huk runallapa wañuyninmi”, nispan.
Jesusta Pedro negasqanmanta
(Mt 26.69-70. Mr 14.66-68. Lc 22.55-57)
15Simón Pedroñataqmi huknin discipulomasinwan Jesusta qatirqaku, chay discipuloqa karqa sumo sacerdotepa reqsisqanmi, chaymi Jesuswan kuska sumo sacerdotepa pationman yaykururqaku. 16Pedroñataqmi qeparurqa hawa law punkupa waqtallanpi, chaymi sumo sacerdotepa reqsisqan discípulo lloqsiramuspan punku nanachikuq warmita ruegakuspan Pedrota pusaykurqa. 17Punku nanachikuq criadañataqmi Pedrota nirqa:
Qamqa kachkanki kay runapa huknin discipulonmi, nispa.
Pedroñataqmi nirqa:
Manam ñoqachu kani, nispa.
18Chirimuptinmi criadokunawan guardiakuna ninata sansarachispanku sayaspa qonikuchkarqaku, chaypitaqmi Pedropas paykunawan qonikuchkarqa.
Jesusta sumo sacerdote tapusqanmanta
(Mt 26.59-66. Mr 14.55-64. Lc 22.66-71)
19Sumo sacerdotem tapurqa Jesusta pikunam discipulonkuna kasqanmanta chaynataq imakunam yachachisqanmanta. 20Jesusmi nirqa:
Ñoqaqa llapa runapa qayllanpim rimarqani. Tukuy tiempom sinagogapi chaynataq llapa judiokunapa huñunakunan templopipas yachachirqani, ñoqaqa manam pakasqallapichu imatapas rimarqani.
21¿Imanasqataq ñoqata tapuwanki? Tapuyqa uyariqniykunatayá, paykunayá nichun imamantam rimasqaytapas. Paykunaqa yachankum imamantam rimasqaytapas, nispa.
22Chaynata niptinmi, templo waqaychaq guardiakunamanta huknin kaqñataq, Jesusta uyanpi takaruspan nirqa:
¿Chaynatachu sumo sacerdoteta ninki? nispa.
23Chaymi Jesusñataq nirqa:
Mana allinta rimaruptiyqa niykuwayá imapim pantarusqayta. Sichum nisqay allin kaptinqa ¿imamantataq maqawankiqa? nispa.
24Chaymantam Anasqa Jesusta hina chaqnasqallata sumo sacerdote Caifasman pusachirqa.
Jesusta Pedro huktawan negasqanmanta
(Mt 26.71-75. Mr 14.69-72. Lc 22.58-62)
25Pedroqa hinallam sayaspa ninapi qonikuchkarqa, hinaptinmi nirqaku:
Qamqa kanki kay runapa huknin discipulonmi, nispanku.
Pedroñataqmi negakuspan nirqa:
Manam ñoqachu kani, nispa.
26Chaymantam sumo sacerdotepa serviqnin tapurqa, chay sirvienteqa karqa Pedrowan rinrin kuchurachikuq runapa ayllunmi, paymi nirqa:
¿Manachum rikurqayki Jesuswan kuska huertapi kachkaqta? nispa.
27Chaymi huktawan Pedro negakurqa, hinaptinmi chaylla utulu waqaramurqa.
Jesusta Pilato sentenciasqanmanta
(Mt 27.1-2,11-31, Mr 15.1-20. Lc 23.1-25)
28Caifaspa wasinmantam Jesusta pusarqaku gobernador Pilatopa palacionman. Achikyaramuptinmi judiokunaqa manaña palaciomanqa yaykurqakuchu. Chayman yaykuspaqa manañam Pascua carnerotaqa mikuyta atinmankuñachu karqa. 29Chaymi Pilato hawaman lloqsimuspa paykunata nirqa:
¿Imamantataq kay runata acusankichik? nispa.
30Paykunañataqmi nirqaku:
Allin runa kaptinqa manachá entregaykikumanchu, nispanku.
31Hinaptinmi Pilatoñataq nirqa:
Pusaspaykichikyá juzgamuychik leynikichikman hina, nispa.
Judiokunañataqmi nirqaku:
Ñoqaykuqa pitapas wañuchinaykumantaqa prohibisqam kaniku, nispanku.
32 #
Jn 3.14; 12.32. Chaynapim imaynam cruzpi wañunanmanta Jesuspa nisqan cumplikurqa. 33Pilatom palacioman kutirispan Jesusta tapurqa:
¿Qamchu kachkanki judiokunapa reynin? nispa.
34Chaymi Jesusñataq nirqa:
¿Kikillaykimantachu chayta niwachkanki icha pim ñoqamanta willasurqanki? nispa.
35Pilatoñataqmi nirqa:
¿Judiochu ñoqaqa karqani? Llaqtamasikikunawan sacerdotekunapa kamachiqninkunam qamtaqa ñoqaman entregamuwachkanku ¿imatataq ruwarunki? nispa.
36Jesusñataqmi nirqa:
Munaychakuyniyqa manam kay pachamantachu, kay pachallamanta kaptinqa qatiwaqniykunachá judiokunawan peleanmanku mana entregasqa kanaypaq. Munaychakuyniyqa manam kay pachamantachu, nispa.
37Hinaptinmi Pilato nirqa:
Chaynaqa, ¿qamchu rey kachkanki? nispa.
Jesusñataqmi nirqa:
Qanmi rey kasqaytaqa nichkanki. Chaypaqmi ñoqaqa nacerqani, chaypaqtaqmi kay pachamanpas hamurqani, chaynapi cheqapmanta rimanaypaq. Cheqap kasukuqkunaqa nisqaykunatam uyarin, nispa.
38Pilatom nirqa:
¿Imataq chay cheqapqa? nispa.
Chaynata tapuruspanmi Pilatoqa huktawan lloqsimurqa hinaspam judiokunaman nirqa:
Kay runapiqa manam imatapas tarinichu sentencianaypaq hinaqa. 39Qamkunapa costumbrekichikman hinam Pascua fiestapi huk presota kacharini. Chaynaqa, ¿judiokunapa reynin kacharinayta munawaqchikchu? nispa.
40Chaynata niptinmi llapallanku qaparirqaku:
¡Ama paytaqa kachariychu, Barrabasta kachariyqa! nispanku.
Barrabasqa karqa suwa runam.
Currently Selected:
Juan 18: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012