Colosenses 1
1
Cartapa qallariyninmanta
1Ñoqa Pablom Dios Taytapa munayninman hina Señorninchik Jesucristopa apostolnin kani. Wawqenchik Timoteopiwanmi 2Colosas llaqtapi Jesucristopi iñiq wawqe-panikunaman qellqamuykiku. Dios Taytanchikpawan Señorninchik Jesucristopa kuyakuyninwan hawkayayninyá qamkunapi kachun.
Iñiqkunapaq Pablo mañakusqanmanta
3Qamkunapaq Diosta mañakuspaykum Señorninchik Jesucristopa Taytan Diosninchikman graciasta qoniku. 4Jesucristopi iñiyniyuq kasqaykichikmantawan iñiqkuna kuyasqaykichikmantam uyarirqaniku, 5chaytaqa ruwachkankichik hanaq pachapi churasqa premioykichikraykum, chaymantaqa cheqap allin noticia palabrantakamam uyarirqankichikña. 6Chay palabraqa qamkunamanwan hinaspa lliw kay pachapi runakunamanmi chayamurqa, hinaspam allinta ruruspan tukuy hinastinpi mirachkan, chaynaqa kachkan uyarisqaykichik hinaspa Diospa kuyakuynin chaskisqaykichik punchawmantaraqmi. 7#Col 4.12; Flm 23.Chaykunataqa kuyasqanchik wawqenchik Epafrasmi yachachisurqankichik. Payqa qamkuna ukupi mana hukmanyaspa Jesucristo serviqmi. 8Paymi willawarqaku Espirituman hina llumpay kuyawasqaykikumantapas.
9Chaymi yachaykusqayku punchawmantapacha ñoqaykupas Dios Taytanchikta mana pisipaspa mañapuchkaykiku, chaynapi imam paypa munasqanta entiendenaykichikpaq, yachayniyuq kanaykichikpaq hinaspa Espiritumanta kaqkunata lliw reqsinaykichikpaq. 10Mañakuchkanikuqa Señorpa qatiqninkuna hina kawsaspa, paypa munasqanta ruwaspa allinta rurunaykichikpaqmi chaynataq aswan mastaraq Diosninchikmanta yachanaykichikpaqmi. 11Mañakuchkanikutaqmi hatu-hatun atiyninwan kallpanchasunaykichikpaqpas, chaynapi ima mana allintapas pacienciakuspa kusikuywanraq aguantanaykichikpaq, 12hinaspa kusikuywan Dios Taytanchikman graciasta qonaykichikpaq. Paymi sapakamaman achkirichkaq tupasuqnikichikta qosunkichik. 13Diosmi tutayaypa atiyninmanta libraykuwarqanchik, hinaspam kuyasqan Churinpa munaychakusqanmanña churaykuwanchik. 14#Ef 1.7.Paypa wañusqallanwanmi huchanchikkunamanta pampachaykuspa libraykuwarqanchik.
Dioswan allinyanakusqanchikmanta
15Mana rikuy atina Diospa rikchayninqa Cristom, llapa imakunapas manaraq unanchasqa kachkaptinqa payqa karqañam. 16Paynintakamam Dios unancharqa cielopi kaqkunata, kay pachapi kaqkunata, rikusqanchik kaqkunata, mana rikuy atisqanchikkunata, munaychakuqkunata, kamachikuqkunata, autoridadkunata hinaspa llapallan atiyniyuqkunatapas. Paynintakamam hinaspa paypaqtaqmi tukuy imapas unanchasqa karqa. 17Tukuy imapas manaraq unanchasqa kachkaptinqa Cristoqa karqañam, tukuy imapas paypa atiyninwanmi takyachkan. 18#Ef 1.22-23.Payqa llapallan iñiqkunapa umanmi, iñiqkunañataqmi cuerpon, paymi llapanmanta puntata kawsarimurqa imapipas punta kaq kananpaq. 19Dios Taytam munarqa paypi tukuy ima tarikuq Cristopi kananta. 20#Ef 2.16.Diosmi allinyanakuyta munarqa kay pachapi kaqkunawan chaynataq hanaq pachapi kaqkunawanpas, chaytaqa ruwarqa Cristopa cruzpi yawar chaqchusqanwan hawkayayman yaykuspanmi.
21Ñawpaqtaqa Diosmanta karunchasqam karqankichik, mana allinkunata ruwaspam Diosta cheqnirqanchik, kunanmi ichaqa kikinpuni qamkunawan allinyanakuykun. 22Chaynaqa, karun Cristopa runa kayninpi wañusqallanwanmi. Payqa wañurqa chuyanchasqata, mana qachayuqta hinaspa pasaypaq mana huchayuqtaña Diospa qayllanman pusaykusunaykichikpaqmi 23Ichaqa chayna kanaykichikpaqqa qaqa hinayá iñiynikichikpi sayaychik ama iskayrayaspa, salvakunaykichikpaq allin noticia uyarisqaykichikman hapipakuspa. Kay allin noticiaqa willakusqa kachkan kay pachapi llapallan runakunamanmi, chayta willakunaypaqmi ñoqa Pablopas churasqa karqani.
Iñiqkunata Pablo yanapasqanmanta
24Kunanqa llumpaytam kusikuni qamkunarayku ñakarisqaywan, chaynapim llapa iñiqkunarayku Cristopa ñakarisqanta kikiypa cuerpoypiña tukupachkani, llapa iñiqkunaqa Cristopa cuerponmi. 25Diosqa akllawasqanman hinam iñiqkunata servinaypaq churaruwan, chaynapi qamkunapa allinnikichikpaq paypa palabranta lliwta willakunaypaq. 26Chay pakasqa hina palabrankunataqa ñawpaq-ñawpaqmantaraqmi mana pipas yacharqachu, kunanmi ichaqa chay ñawpaq pakasqa kaqtaqa payllapaqña kawsaqkunaman reqsiykachinña. 27Chay pakasqa kaqtaqa Diosmi mana judío kaqkunamanpas reqsichiyta munarqa, chay pakasqa kaqqa qamkunapi Cristopa kawsasqanmi, chayraykum wiñaypaq kawsakuyta suyachkankichik.
28Chaymi ñoqaykuqa llapa runakunata anyaspa hinaspa tukuy yachaywan yachachispa Cristomanta willakuniku, chaynapi llapa runakuna Cristo hina kanankupaq 29Chayraykum Cristopa qowasqan hatun atiywan sinchita kallpanchakuspay llamkachkani.
Currently Selected:
Colosenses 1: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012