Rut 2
2
Boozpa chakranpi cebadata Rut pallapakusqanmanta
1Noemiypa qosan Elimelecpa ayllunmi karqa Booz, payqa ancha reqsisqa apu runam karqa.
2 #
Lv 19.9-10; Dt 24.19. Huk punchawmi Noemiyta Rut nirqa:
Mañakuykim chakraman rirunaypaq, pipas chaskiykuwaqniypa chakranpi cebadata pallapakaramunaypaq, nispa.
Chaymi Noemí nirqa:
Riruyá wawalláy, nispa.
3Hinaptinmi Rutqa pasaspan chakraman chayarurqa, chaymi rutuqkunapa qepanta pallapakustin rirqa. Chay chakraqa Elimelecpa ayllun Boozpam karqa. 4Chayllamanmi Boozqa Belén llaqtamanta chayaramuspan rutuqkunata rimaykurqa:
Diosyá qamkunawan kachun, nispa.
Chaymi rutuqkunapas nirqaku:
Qamtapas Diosyá bendecisunki, nispanku.
5Chaymantam rutuqkunapa kamachiqninta Booz tapurqa:
¿Pitaq wak sipasqa? nispa.
6Rutuqkunapa kamachiqninñataqmi nirqa:
Moab lawmanta Noemiywan hamuq sipasmi. 7Paymi ruegakuwarqa rutuqkunapa qepanta rispa gavillakunapa chawpinpi pallapakunanpaq. Chaynapim tutapaymanta kunankama pallapakuchkan mana samaykuspa, nispa.
8Chaymi Rutta Booz nirqa:
Uyariykuway churilláy, amam kaymanta huklaw chakramanqa pasakunkichu, hinallapimá criadaykunawan kuska pallapakunki. 9Qawariy sumaqta maypim rutusqankuta, hinaspayá paykunata qatiy maymanmi risqankuta, ñam serviqniykunata kamachiniña pipas mana imanasunaykipaq. Yakunayasuptikipas puyñukunaman asuykuspam serviqniykunapa yaku hurqomusqanta tomakunki, nispa.
10Chaymi Rutqa qonqoranpa kumuykuspan Boozta nirqa:
¿Imanasqataq forastera kachkaptiypas llakipayariykuwaspa yanapaykuwanki? nispa.
11Chaymi Boozñataq nirqa:
Yachanim qosayki wañukuptin suegraykiwan imaynam vida pasasqaykita, yachanitaqmi tayta-mamaykitawan nacekusqayki llaqtata saqemuspa mana reqsisqayki llaqtaman hamusqaykitapas. 12Diosyá tukuy chaykuna ruwasqaykimanta kutichipusunki, Israelpa yupaychasqan Diosyá bendecisunki payman hapipakamusqaykirayku, nispa.
13Rutñataqmi Boozta nirqa:
Taytalláy, llakipayaykuwaspam consuelaykuwanki; mana serviqniki kachkaptiypas sonqollayta rimapayaykuwaspaykim kallpanchaykuwanki, nispa.
14Mikuy hora chayaramuptinmi Rutta qayaykuspan Booz nirqa:
Hamuy mikusunchik, tantaykitapas vinagrepiyá nuyuchiy, nispa.
Chaymi rutuqkunawan kuska tiyaykuptin Booz mikuyta haywaykurqa, Rutñataqmi saksanankama mikuruspan puchupakururqaraq. 15Huktawan pallapakunanpaq hatariptinmi, rutuqkunata Booz kamachirqa:
Gavilla huñusqaykichikpipas hinam pallapakunqa, amam penqachinkichikchu, 16rutusqaykichik gavillamantapas mana musyayllatam wichichinkichik pallapakunanpaq, amam michakunkichikchu, nispa.
17Chaynapim Rutqa punchaw qaspaykunankama chakrapi pallapakurqa; chay cebada pallapakusqanta qaqoruptinmi yaqa iskay arroba nisqa lloqsirurqa. 18Pallapakusqanta aparikuspa llaqtaman kutiruspanmi suegranman qawaykachirqa, hinaspanmi alsakamusqantapas qepinmanta hurqoykuspan qoykurqa.
19Suegranñataqmi tapurqa:
¿Maypitaq pallapakamurqanki? ¿Maypitaq kunan punchaw llamkapakamurqanki? Diosyá bendecichun yanapaykusuqniki runata, nispa.
Maypim llamkamusqanta suegranman willaspanmi Rut nirqa: Kunan punchaw llamkamusqay chakrayuqpa sutinqa Boozmi, nispa.
20Noemiyñataqmi llumchuyninta nirqa:
Diosyá payta bendecichun. Diosqa bendeciykuwanchikmi ñoqanchikta hinaspa wañukuqninchikunatapas. Chay runaqa qosaypa ayllunmi, payqa nanachikunanmi ñoqanchikmantapas, nispa.
21Rutqa kaytapas willarqataqmi:
Chay runam niwarqa: Criadaykunawan kuskayá pallapakuy rutuy tukunankama, nispa.
22Noemiyñataqmi llumchuyninta nirqa:
¡Ima allinmi wawalláy! Allinpunim criadankunawan llamkakuynikiqa, chaynapi amaña huklaw chakrakunaman richkanaykipaq, nispa.
23Chaynapim Rutqa Boozpa criadankunawan kuska pallapakurqa, cebada rutuywan trigo rutuy tukunankama. Hinaspanmi Rutqa suegranwan kuska yacharqa.
Currently Selected:
Rut 2: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012