Proverbios 26
26
1Imaynam poqoy tiempopi qasaqa mana allinchu,
cosecha tiempopi parapas mana allinchu,
chaynam mana yachayniyuq runata hatunchaypas mana allinchu.
2Imaynam pichinchu llutanpi pawan,
imaynam wayanakuy muyun,
chaynam yanqamantaqa ñakaypas
mana pimanpas chayanqachu.
3Latigowanmi caballotaqa mansanchik,
asnotañataqmi jaquimawan controlanchik,
mana kasukuqkunataqa azotewanmi correginchik,
4mana yachayniyuqtaqa ama kutipaychu,
yanqam qampas mana yachayniyuqpaq hapisqa kawaq.
5Mana yachayniyuqtaqa
mana yachayniyuqta hina kutipay,
chaynapi yachayniyuqpaq
mana hapikurunanpaq.
6Mana yachayniyuq runata kunakuyqa
chakita kuchukuruy hinam
otaq sasachakuyman wichiykuy hinam
7Suchu runapa chakinkuna hina mana valeqmi
mana yachayniyuqpa siminpi yachaywan rimaykunapas.
8Mana yachayniyuqta hatunchayqa
warakaman rumita wataruy hinam.
9Imaynam machasqa runa makinta kichka tipaptin mana musyanchu,
chaynam rikchanachiypas sonsopa siminpiqa mana entiendekunchu.
10Llapa purikuqta flecharuq runa hinam sonso runata llamkananpaq contrataq runaqa.
Llapa purikuqta flecharuq runa hinam yanqa purikuqta llamkananpaq contrataq runaqa.
11 # 2 Pe 2.22. Imaynam allqo mikusqanta kutirachispan kaqllamanta mikurun,
chaynam sonso runaqa mana tanteaspa ruwasqanta kaqllamanta ruwarun.
12Yachayniyuqpaq hapikuruq runamantaqa
mana yachayniyuqmi aswan allinqa.
13Qella runaqa kaynatam nin:
“Ñanpiqa leonmi kachkan,
callepipas leonmi muyurichkan”, nispa.
14Imaynam bisagranpi punku muyun,
chaynam qella runapas camanpi qochpan.
15Qella runaqa platoman makinta haywarichkaspapas
siminman apaykuytaqa qellakunmi.
16Qella runaqa yachaysapapaqmi hapikun,
yachaywan consejakuq qanchis runamantapas
aswan yachaqniyuqpaqmi hapikun.
17Hukpa quejanman chapukuyqa
allqopa rinrinkunamanta hapiruy hinam.
18Imaynam locoyasqa runa wañuchikuq
lenwachkaq flechakunata kacharin,
19chayna runamanmi rikchakun amigonta engañaruspan:
“Asispallaymi ruwarqani” niq runapas.
20Mana yanta kaptinqa
ninapas wañurunmi,
chaynam cuento qepi mana kaptinqa
piñanakuypas tukurun.
21Imaynam ninata carbón mismichin,
imaynam ninata yanta lenwarichin,
chaynam peleollata kuyaq runapas
piñanakuyta hatarichin.
22Cuento qepi runapa rimayninqa
miski mikuy hinam runapa sonqonman yaykun.
23Qollqewan bañasqa allpa manka hinam,
mana allin sonqoyuq runapa miskillaña rimayninqa.
24Cheqnikuq runaqa siminwanmi cheqnikuyninta pakan,
sonqonpim ichaqa tukuy mana allinkunata yuyaymanan.
25Kuyakuyllawanña rimapayasuptikipas ama creeychu,
sonqonqa mana allinpa huntasqanmi kakuchkan.
26Cheqnikuyninta pakayta munaptinpas,
mana allin ruwayninmi runakunapa qayllanpi rikurachikunqa.
27Pipas trampata uchkuqqa
kikillanmi chayman wichiykunqa,
rumita kuchpaykuq runataqa
kuchpasqan rumillam
hawanta pasarunqa.
28Llulla runaqa cheqap kaqtam cheqnin,
hawa sonqolla rimapayakuqqa tuñichinmi.
Currently Selected:
Proverbios 26: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012