Lucas 24
24
Jesuspa kawsarimusqanmanta
(Mt 28.1-10. Mr 16.1-8. Jn 20.1-10)
1Chay warmikunam domingo tutapayta sepulturaman rirqaku, perfumekunatawan miski asnaq pomadakuna preparasqankuta aparikuspanku. 2Chayaruspankum sepultura wichqasqanku rumita asuchisqataña tarirurqaku; 3chaymi yaykuruspanku Señor Jesuspa cuerpontaqa manaña tarirqakuchu. 4Chaywan mancharisqallaña kachkaptinkum, qonqayllamanta kancharichkaq pachayuq iskay runakuna waqtankupi rikuriykurqa. 5Chaymi manchakuymanta pampakama kumuykuspanku kaynata nirqaku:
¿Imanasqataq kawsaqta wañusqakuna ukupi maskachkankichik? 6Payqa manam kaypiñachu, aswanqa kawsarirunmi, nispanku. Yuyariychikyá Galileapi kachkaspan, 7#Mt 16.21; 17.22-23; 20.18-19; Mr 8.31; 9.31; 10.33-34; Lc 9.22; 18.31-33.“Runapa Churintaqa huchasapakunaman qoykuptinkum chakatasqa kanqa, ichaqa kimsa punchawmantam kawsarimunqa”, nisusqaykichikta.
8Hinaptinmi paykunaqa Jesuspa nisqanta chayraq yuyarirurqaku. 9Chaymi sepulturamanta kutiruspanku, tukuy chaykunata chunka hukniyuq apostolkunamanwan wakinkunaman willarqaku. 10Chay willakuqkunam karqaku Magdala llaqtayuq María, Juana, Jacobopa maman María hinaspa wakin warmikuna. 11Chay willakusqankutam llapa apostolkuna cuentopaq hapispanku mana creerqakuchu.
12Pedrom ichaqa hatarispan sepulturaman kallparqa, chaymi sepulturata qawaykuspan sabanasllataña tariykurqa, hinaspam chayta qawaykuspan admirasqallaña wasinman kutirirqa.
Emaús llaqtaman riqkunaman Jesuspa rikuriykusqanmanta
(Mr 16.12-13)
13Chay punchawllapim iskay discipulonkuna Emaús llaqtaman richkarqaku. Chay llaqtaqa kachkan Jerusalenmanta yaqa chunka hukniyuq kilómetro masninpim. 14Paykunam tukuy ima pasakusqanmanta rimastin richkarqaku. 15Chaykunata rimastin richkaptinkum, kikin Jesús asuykuspan paykunawan rirqa. 16Ichaqa rikuchkaspankupas manam pay kasqanpaqqa hapirqakuchu.
17Jesusñataqmi paykunata tapurqa:
¿Imamanta atipanakustintaq richkankichik? nispa.
Chaymi paykunañataq llakisqallaña sayarurqaku. 18Hinaptinmi paykunamanta huknin, Cleofas sutiyuq nirqa:
¿Qamllachu Jerusalenpi samapakuqkunamanta chay llaqtapi imakunam kay punchawkunapi pasakusqanmanta mana imatapas yachaq kachkanki? nispan.
19Chaymi Jesusñataq nirqa:
¿Imataq pasakururqa? nispa.
Hinaptinmi paykunañataq nirqaku:
Rimachkanikuqa Nazaret llaqtayuq Jesusmantam. Payqa karqa profetam hinaspa Diospa qayllanpipas chaynataq runakunapa qayllanpipas atiywan rimaspa imatapas ruwaqmi. 20Ichaqa sacerdotekunapa kamachiqninkunawan llapa kamachiqninchikkunam chakataspa wañuchinankupaq hapichirqaku. 21Ñoqaykuqa piensarqaniku Israel nacionpa libraqnin kasqantam, ichaqa kimsa punchawñam wañukun. 22Chaywanpas ñoqaykuwan kaq warmikunam mancharirachiwanku, paykunam tutapayta sepulturanman rirqaku, 23hinaspam cuerponta mana tarimuspanku wasiman kutiramuspa willakurqaku, iskay angelkuna rikuriykuspa “Jesusqa kawsarirunmi”, nispa nimusqankuta. 24Chaymi ñoqaykuwan kaqkunamanta wakiqniyku sepulturaman rispanku warmikunapa nisqankuman hina tariykamurqaku, Jesustam ichaqa mana rikumurqakuchu, nispanku.
25Chaymi Jesusñataq paykunata nirqa:
Mana yuyayniyuq runakuna, qamkunaqa profetakunapa willakusqantapas sasallaña creeqmi kankichik. 26¿Manachum Cristoqa hanaq pachaman kutinanpaqqa tukuy chaykunata ñakarinan karqa? nispan.
27Hinaspam Moisespa qellqasqanmanta qallarispa profetakunapa qellqasqankama, paymanta llapallan Qellqapa nisqanta paykunaman entiendechirqa.
28Emaús llaqtaman chayaruptinkum Jesusqa karuman richkaq hina ñanman churakuykurqa. 29Hinaptinmi paykunañataq harkaspanku nirqaku:
Tutaykamuchkanñam, kayllapiña samapakusunchik, nispanku.
Chaymi Jesusqa paykunawan samakunanpaq yaykurqa.
30Mesaman tiyaykuptinkum, tantata hapiykuspan Diosman graciasta qorqa, hinaspanmi pakiykuspan qoykarirqa. 31Hinaptinmi chay ratollapi ñawinku kicharikuruptin Jesús kasqanta reqsirurqaku. Paymi ichaqa chinkarurqa. 32Paykunañataqmi kaynata ninakurqaku:
¿Manachum sonqonchikpas ruparirqaraq ñanpi rimapayawaspanchik Qellqapa imam nisqanta entiendechiwaptinchik? nispanku.
33Hinaspankum chay ratollapi Jerusalén llaqtaman kutirirqaku, chaypim chunka hukniyuq discipulokunatawan paykunawan kaqkunata huñunasqata tariykurqaku. 34Paykunam ninakuchkasqaku:
Cheqaptapunim Señorqa kawsarirusqa. Pedromanpas rikuriykunñam, nispanku.
35Hinaptinmi Emaús llaqtamanta kutiqkunapas, ñanpi imam pasakusqanmanta hinaspa mesapi tantata pakiptin reqsirusqankumanta willakurqaku.
Discipulonkunaman Jesuspa rikuriykusqanmanta
(Mt 28.16-20. Mr 16.14-18. Jn 20.19-23)
36Chaykunamanta rimachkaptinkum Jesusqa chawpinkupi rikuriykuspan nirqa:
Hawkayay qamkunawan kachun, nispa.
37Hinaptinmi paykunañataq mancharikurqaku anima kasqanta piensaspanku.
38Chaymi Jesusñataq nirqa:
¿Imanasqataq mancharisqallaña kachkankichik? ¿Imanasqataq sonqoykichikpi iskayrayachkankichik? 39Makiykunatawan chakiykunata qawaychik. Ñoqam kani, qawaykuwaspa llapchaykuwaychik. Animaqa mana aychayuq hinaspa mana tulluyuqmi, ñoqam ichaqa aychayuq hinaspa tulluyuq kachkani, nispan.
40Chaynata niruspanmi makinkunatawan chakinkunata paykunaman qawaykachirqa. 41Paykunam ichaqa, admirasqa chaynataq kusikuypa huntasqan kaspanku imam rikusqankupi mana creerqakuchu, chaymi Jesusñataq paykunata tapurqa:
¿Kachkanchu imallaykichikpas mikuykunaypaq? nispa.
42Hinaptinmi kankasqa parten challwata qoykuptinku, 43hapiykuspan paykunapa qayllanpi mikurqa.
44Chaymantam paykunata nirqa:
Kaykuna pasakunanmantaqa qamkunawan kachkaspayraqmi willarqaykichikña: Moisespa qellqasqan kamachikuykunapi, profetakunapa qellqasqanpi hinaspa Salmokunapi ñoqamanta qellqasqa kaqkunaqa cumplikunanpunim, nispay.
45Chaynata niruspanmi yuyayninkuta kichaykurqa Qellqapa nisqanta entiendenankupaq. 46#Is 53.1-12.#Os 6.2.Hinaspanmi paykunata Jesús nirqa:
Qellqasqam kachkan Cristoqa ñakarispa wañunanmanta hinaspa kimsa punchawman kawsarimunanmanta, 47chaynapi Jerusalenmanta qallaykuspa lliw nacionkunapi paypa sutinpi willakuptinku, runakuna huchankumanta wanakuspa pampachasqa kanankupaq. 48Chaynaqa, qamkunam kaykuna rikusqaykichikmanta testigo kankichik. 49#Hch 1.4.Qamkunamanmi Taytaypa prometesusqaykichikta kachamusaq, chaykamayá kay Jerusalén llaqtallapi suyaykuychik, hanaq pachamanta hamuq atiywan pachallisqa kanaykichikkama, nispa.
Hanaq pachaman Jesuspa wicharisqanmanta
(Mr 16.19-20)
50Chaymantam paykunata Betania llaqtakama pusarqa. Chaypim makinkunata hoqariykuspan paykunata bendeciykurqa. 51#Hch 1.9-11.Bendecichkaspanmi paykunamanta rakikuykuspan hanaq pachaman hoqarisqa karqa. 52Paykunañataqmi hatunchasqankumanta ancha kusisqallaña Jerusalenman kutimurqaku. 53Hinaspankum templopi tukuy tiempo kaspanku Diosta yupaycharqaku.
Currently Selected:
Lucas 24: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012