Isaías 30
30
Egipto nacionman hapipakuqkunamanta
1Tayta Diosmi kaynata nin:
¡Imaynaraq kanqaku mana kasukuq churikuna,
ruwankupas manam ñoqapa kamachisqaytachu,
contratota ruwaspapas manam ñoqataqa kaqpaqpas hapiwankuñachu!
Chaynata ruwaspankum aswanraq huchallikunku.
2Mana ñoqata tapuwaspankum
Egipto nacionman chaylla rinku,
rey Faraonpi hapipakuspam yanapakuyta maskanku.
3Aswanqa Faraonman hapipakuynikichikmi
penqakuypaqña kanqa,
Egiptopi hapipakuynikichikmi
pantachisuqnikichik kanqa.
4Kamachiqnikikuna Zoán llaqtapi kaptinpas,
kachasqaykichik runakuna Hanes llaqtaman chayaruptinpas,
5mana imapaq valeq llaqta kasqanraykum
llapallanku penqaypi rikurinqaku,
mana imapipas yanapaspa
penqayman churaqnin llaqta kasqanrayku, nispa.
6Neguev lawpi animalkunamantam kaynata nin:
Sasachakuypa hinaspa ñakariypa kasqan llaqtantam
leonkunapa yachanan lawnintam,
tukuy richkaq maqta urukunapa kasqantam,
asnokunapi qori-qollqeta cargachkanku,
camellokunapim kapuqninkuta apachkanku,
mana imapaq valeq Egipto nacionmanmi astachkanku.
7Egipto nacionpa yanapakuyninqa paqway mana valeqmi,
chayraykum “Manchakuypaq qaparkachaq mana imanakuq animalmi”, nispa suticharqani.
8Kunanyá paykunapa qayllanpi
kay rikusqaykita tablapi qellqay.
Libropi qellqaruptiki hamuq punchawkunapi yuyarinankupaq kachun,
wiña-wiñaypaq chayna qepachun.
9Kay runakunaqa mana kasukuq kullukunam,
iskay uya llulla miraykunam,
Tayta Diospa yachachikuyninta mana uyariy munaqkunam.
10Visionta rikuq runakunatam ninku:
Amaña chaypi ocupakuychikchu, nispanku.
Profetakunatañataqmi ninku:
Cheqap kaqkunataqa amaña willawaykuchu,
willawaykuqa munasqallaykutaña,
willawaykuqa aychayku kusichiqllataña, nispanku.
11Chay ñanta saqeychik,
allin ruwaymanta rakikuychik,
amaña Israelpa Chuya Diosninwan uyapurachiwaykuchu, nispanku.
12Chayraykum Israelpa Chuya Diosnin kaynata nin:
Nisqaykunatam qamkuna wischupakunkichik,
runamasikichikta ñakarichiypi hinaspa llullakuypim hapipakunkichik,
chaykuna ruwasqaykichikpim hapipakunkichik.
13Chayraykum mana allinkuna ruwasqaykichik
tuñirunanpaq raqrasqa alto murallaman rikchakun,
chay murallam qonqaymanta chaylla tuñiykamunqa.
14Wichiykamuspam puyñu hina pakikunqa,
mana kuyapayarispa pakipasqam kanqa.
Chaymanta puchuq kallanaqa
nina sansata hoqarinallankupaqpas manam servinqachu,
pozomanta yakuta wisinallankupaqpas manam valenqachu.
15Israelpa yupaychasqan Chuya Diosmi kaynata nin:
Wanakuywan kutirimuspa hawkalla kaspam salvasqa kankichik,
hawkalla hinaspa hapipakuq kaspaykichikmi kallpasapa kankichik,
ichaqa manam kasukurqankichikchu;
16aswanraqmi qamkuna nirqankichik:
“Caballokunapim ayqekusaqku”, nispa.
Chaynaqa, caballokunapichá ayqenkichik.
Nirqankichiktaqmi:
“Utqayman kallpaq carretakunapim lluptikusaqku”, nispa.
Ichaqa enemigoykichikpas aswan utqaymanraqmi qatisunkichik.
17Chullalla runapa manchachisqanmi
waranqa runakuna lluptinqaku;
pichqa runakunapa manchachisqanñataqmi
llapallaykichik ayqenkichik,
orqopa puntanpi chullalla kaspi hina kanaykichikkama,
moqopi sayarachisqa bandera hina kanaykichikkama.
18Chaywanpas Tayta Diosqa
llakipayarisunaykichikpaqmi suyasuchkankichik,
payqa kuyakuynintam qamkunaman reqsichisunkichik.
Allin arreglo ruwaqmi Tayta Diosqa.
¡Mayna kusisqam paypi suyaqkunaqa!
Israel llaqta kuyapayasqa kananmanta
19Sión moqopi runakuna, Jerusalén llaqtapi yachaqkuna, manañam haykapipas waqankichikñachu. Payqa llakipayakuspa kuyapayakuqmi. Qaparispa mañakuptikichikmi uyarisunkichik. 20Tayta Diosqa, ñakariyta mikuchisuspaykipas, llakikuyta tomachisuspaykipas, yachachisuqnikiqa manañam pakakunqañachu, aswanqa ñawikiwanmi qawaykunki. 21Hinaspapas rinrikichikwanmi uyarinki qepaykimanta kayna rimapayakuyta:
Kaymi allin ñan, chayninta puriychik, amayá alleqmanpas nitaq ichoqmanpas muyuychikchu, niqta.
22Qorimanta qollqemanta idoloykichikkunatapas millakuypaqtañam qawankichik. Chaykunataqa millakuypaq qacha latapata hinam wischunkichik, hinaspam ninkichik:
Anchuy kaymanta, nispaykichik.
23Señormi parachimunqa tarpukuynikichikman, chaynapim kawsaynikichikpas allinta qespiptin chaninninpi mikunkichik. Animalnikichiktapas chay tiempopiqa hatu-hatun echaderokunapim michinqaku. 24Llamkaq toroykichikkunawan asnoykichikkunapas palawan chaynataq horquetawan wayrachisqa chuya kawsaykunatam mikunqaku. 25Hatun wañuchinakuy punchawpi torrekuna tuñichisqa kaptinmi, hatun orqokunamantawan alto moqokunamantapas mayukuna paqchamunqa. 26Hinaptinmi killapa achkiyninpas intipa achkiynin hinaraq kanqa, chaynataqmi intipas qanchis kuti mastaraq kancharinqa, imaynam qanchis punchawpi kanchayninta hina. Chaynam kanqa runankunapa isunta kikinpa isuchasqanta Tayta Dios wataspan hampisqan punchawpi.
Asiria nación castigasqa kananmanta
27Qawariychik, kikin Tayta Diosmi karumanta hamuchkan,
piñakuptinmi nina hinaraq uyanpas ruparichkan,
simin huntam piñakuynin kachkan,
tukuy ima ruparuq nina hinaraqmi qallunpas kachkan.
28Samayninpas llimpariq lloqlla hinaraqmi,
kunkakama haypaq lloqlla hinaraqmi.
Harnerowan suysuq hinam llapa nacionkunata ñakarichinqa,
frenota siminman churaspam llaqtakunata chinkachinqa.
29Qamkunam ichaqa,
pascua fiestata ruwasqaykichik tutapi hina takinkichik,
sonqomantam qamkunaqa kusikunkichik,
qenata tocaspa Tayta Diospa orqonman richkaq hinam kusikunkichik,
Israelpa amparakunan Diosman richkaq hinam kusikunkichik.
30Tayta Diosmi,
manchakuypaq piñakuyninwan,
lenwachkaq ninawan,
rayokunawan llipyakunawan,
loco parawan runtu parawan,
atiyniyuq siminta uyarichinqa.
31Tayta Diospa Chuya siminmi Asiria nacionta ñutuparunqa,
varanwanmi paykunata waqtaparunqa.
32Tayta Dios sapa kutilla varanwan waqtaptinmi
tamborkunapiwan arpakunapas waqanqa.
Tayta Diosmi chaqwallawanña paykunapa contranpi peleanqa.
33Asiriapaqwan reyninpaqmi ñawpaqmantaraq
ancho-ancho hinaspa uku-uku toqo allichasqa kachkan,
achkallaña yantawan ratachisqa kunununuq ninam kachkan,
Tayta Diospa samayninmi azufreyuq mayu hina chaypi rupanqa.
Currently Selected:
Isaías 30: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012