Isaías 28
28
Samariapa contranpi willakuymanta
1¡Ay, Samaria llaqta imaynaraq kanqa!
coronanmanta hina Efrainpa alabakunan llaqta,
sinkakunapa kanan llaqta,
sumaq wayta chakirusqa hina llaqta,
tukuy imapa wiñanan qechwapa hanayninpi tarikuq llaqta,
vinoman qokuruq runakunapa kanan llaqta.
2Tayta Diosmi hatallichkan huk kallpasapa sinchi atiyniyuq runata.
Chay runaqa, runtu para hina dañakuqmi,
llumpay wayra-para hinaraqmi,
loco para hinaraqmi,
manchakuypaq repunti lloqlla hinaraqmi.
Kallpawanmi pampaman wikapanqa,
3Efraín castapa alabakunan llaqtatam sarupanqa,
sinkaruspan coronanmanta hina alabakunan llaqtatam sarupanqa.
4Chakisqa wayta hina kachkaspapas Efrainpa alabakunan llaqtam,
tukuy imapa wiñanan qechwapa hanayninpi kaq llaqtam
manaraq cosecha kachkaptin,
chayllaraq rikurimuq poqosqa higos hinaraq kanqa,
pipas rikuqninqa chayllam hapispa mikurunqa.
5Chay punchawmi Tukuy Atiyniyuq Tayta Diosqa
puchuq runankunapaq kancharichkaq coronanku hina kanqa,
paykunapaqmi kuyayllapaq alhajanku kanqa.
6Cortepi juezkunamanmi allin arreglo ruwanankupaq yachayta qonqa,
llaqtata nanachikuq tropakunatam kallpanchanqa.
Jerusalén llaqtaman prometesqanmanta
7Ichaqa paykunam vinota upyasqankurayku pantarunku,
poqosqa aqata upyaspam tamsakachanku.
Sacerdotewan profetapas poqosqa aqawan machaspam tampikachanku,
paykunaqa visión rikusqankutam qewirunku,
quejapi sentenciaspam pantarunku.
8Mesankupas millakuypaq kutichisqankuwanmi qachallaña kachkan,
manam mayninpas limpioqa kanñachu.
9Ñoqata kamiwaspankum ninku:
¿Pitataq yachachichkan?
¿Pitataq allin yachachikuykunata entiendechichkan?
¿Anukasqa wawakunatachu?
¿ñuñuq wawakunatachu?
10Aswanqa kay kamachikuyta yachaychik,
asllatapas ruwaychik,
kay kamachikuyta kasukuychik,
as-asllamanta, chulla-chullallamanta,
kaypi asllata, wakpi asllata, nispankuraq.
11Chaynaqa, gagokunapa rimayninpim,
mana yachasqanku simipim,
kay llaqtataqa rimapayanqa.
12 # 1 Co 14.21. Paykunataqa ñawpaqmantaraqmi nirqa:
Hawkayayqa kaypim kachkan,
samariypas kaypim kachkan,
pisipasqayá samarichun nichkaptinpas
manam kasukurqakuchu.
13Chayraykum Tayta Dios paykunata rimapayanqa,
chayllaraq leey yachaq warmachakunata hina:
Kay kamachikuyta yachaychik,
asllatapas ruwaychik,
kay kamachikuyta kasukuychik,
as-asllamanta, chulla-chullallamanta,
kaypi asllata, wakpi asllata;
purisqankupi wasanpa wichinankukama,
heridasqa kaspa, toqllaman wichispa,
preso kanankukama.
Kamachikuqkuna qaqchachikusqanmanta
14Chaynaqa, Jerusalén llaqtapi llapa qara uya kamachikuqkuna,
Tayta Diospa nisqanta uyariychik.
15Qamkunam ninkichik: “Contratotam wañuywan ruwaruniku,
wañusqakunapa kasqanwanpas contratotam ruwaruniku,
sasachakuy hamuspa mana haypawanankupaq;
llulla rimaykunapim amparakuruniku,
engaño ruwaykunapim pakakuruniku”, nispaykichik.
16 #
Ro 9.33; 10.11; 1 Pe 2.6. Chayraykum Tayta Dios kaynata nin:
Ñoqam Sión moqopi cimientopaq churani,
kuyayllapaq suni takyaq akllasqa esquina rumita.
Pipas chay rumipi hapipakuqqa manam hukmanyanqachu.
17Plomadawan hinam allin arreglota ruwasaq,
nivelwan hinam allin kawsakuyta ruwasaq.
Llullakuy amparoykichiktapas runtu param tukurunqa,
pakakunaykichiktapas yakum tuyturunqa.
18Wañuywan contrato ruwasqaykichikpas yanqachasqam kanqa,
wañusqakunapa kasqanwan contrato ruwasqaykichikpas manaña kaqmi kanqa;
chay manchakuypaq sasachakuy hamuruspanmi sarupasunkichik.
19Tutapas punchawpas rikurimuspam,
sapa kutilla rikurimuspam haypasunkichik;
uyarisqaykichikta yachaykuyllapas qamkunapaqqa
paqway manchakuypaqmi kanqa.
20Chutaparikunallanpaqpas puñunan camapas taksallam kanqa,
wankukunanpaq qatapas taksallam kanqa.
21 # 2 S 5.20; 1 Cr 14.11. #
Jos 10.10-12. Tayta Diosmi Perazim orqopi hina hatarirunqa,
Gabaón qechwapi piñakusqanta hinam piñakunqa,
chaynapi mana haykapipas rikusqanku ruwayninta ruwananpaq,
chaynapi mana haypay atina ruwayninta ruwananpaq.
22Hinaptinqa amañayá burlakuychikñachu,
yanqañataq watasusqaykichik astawan seqorusunkichikman;
kay pachata tuñichinanpaq Tukuy Atiyniyuq Tayta Diospa tanteasqantam uyarirqani.
23Rimasqayta sumaqta uyariychik,
palabraykunata allinta uyariychik.
24Tarpukuq yapuspanqa
manam tukuy punchawchu yapun,
nitaqmi tukuy punchawchu kurpatapas ñutun.
25Aswanpas kurpata ñuturuspanmi muhuta machqen:
Cominostapas eneldotapas,
trigotañataqmi suyunpi tarpun.
Cebadatapas maymi wiñananmanmi machqen,
avenatañataqmi patankunaman machqen.
26Diosninmi paytaqa imaynam tarpunanta yachachin.
27Eneldotawan cominostaqa manam carretawanchu trillana,
astawanpas kaspiwanmi waqtana.
28Trigota erapi trillakuspaqa,
manam chuyan ñutunankamachu trillana,
manataqmi kutakunankamachu saruchina.
29Kay yachachikuykunaqa Tukuy Atiyniyuq Tayta Diosmantam hamun,
payqa admirakuypaq kaqkunatam tantean,
payqa yachayninwanmi ruwayninkunata qespichin.
Currently Selected:
Isaías 28: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012