Eclesiastés 3
3
Tukuy imapas tiempoyuqlla kasqanmanta
1Kay pachapiqa imapas tiempoyuqllam,
kay pachapiqa ima ruwaypas horayuqllam.
2Kanmi tiempo nacenapaq kantaqmi wañunapaqpas,
kanmi tiempo plantanapaq kantaqmi plantasqata chutanapaqpas.
3Kanmi tiempo wañuchinapaq kantaqmi hampinapaqpas,
kanmi tiempo tuñichinapaq kantaqmi hatarichinapaqpas.
4Kanmi tiempo waqanapaq kantaqmi asinapaqpas,
kanmi tiempo lutokunapaq kantaqmi tusunapaqpas.
5Kanmi tiempo rumikunata cheqechinapaq kantaqmi huñunapaqpas,
kanmi tiempo abrazanapaq kantaqmi rakinakunapaqpas.
6Kanmi tiempo tarinapaq kantaqmi chinkachikunapaqpas,
kanmi tiempo waqaychanapaq kantaqmi wischunapaqpas.
7Kanmi tiempo llikinapaq kantaqmi siranapaqpas,
kanmi tiempo upallanapaq kantaqmi rimanapaqpas.
8Kanmi tiempo kuyanapaq kantaqmi cheqninapaqpas,
kanmi tiempo guerrapi kanapaq kantaqmi hawkayanapaqpas.
9¿Imatataq runa hurqokun afanakuspa llamkasqanmanta? 10Rikurqanitaqmi imaynatam Diosqa runakunaman imapas ruwaykuna qosqanta chaypi llamkaspa kanankupaq 11Diosqa tiempollanpim imatapas sumaqta ruwarqa, hinaspam runakunaman qorqa wiñaypaq kaqkunamanta yuyaymanananpaq. Chaywanpas runapa yuyaymanayninqa manam haypayta atinmanchu qallariyninmanta tukupayninkama Diospa ruwasqankunataqa.
12Runapa ruwayninqa kawsayninpi kusikuspa allin kaqkunata ruwayllam, 13mikukuspa tomakuspa llamkasqanpa rurunwan kusikuyllam. Yachanitaqmi chaykunaqa Diospa kuyakuynin kasqanta. 14Yachanim Diospa ruwasqankunaqa wiñaypaq kasqanta, manam chaymanqa imatapas yapachwanchu nitaq qechuchwanchu. Diosmi chaynata ruwarqa runakuna payta manchakunankupaq.
15Kunan kaqkunaqa
ñawpaqmantaraqmi karqaña,
manaraq kaqkunapas ñam karqaña.
Diosmi ñawpaq kaqkunata kaqmanta hatarichin.
Runapa ñakariyninmanta
16Kay pachapiqa rikurqanitaqmi kaykunatapas:
Allin ruwaypa rantinpi mana allin ruwayta,
allin ruwaypa rantinpi mana allin kaqkunallata.
17Chaymi sonqoypi nirqani:
Allin runatapas mana allin runatapas Diosmi juzganqa;
imapas tiempollanpim pasakun,
ima ruwaypas tiempoyuqllam, nispay.
18Runapa kawsayninmantapas kaynatam nirqani: Diosmi runakunata pruebachkan animalkunaman rikchakuq kasqankuta yachakunankupaq. 19Runakunapas animalkunapas chay destinoyuqllam, hina chayna wañuqkamallam, chay samayllawanmi kawsankupas. Runaqa manam animalmanta maschu. ¡Chaypas waspiy hina chinkaruqllam! 20Lliwmi huk hawaqllaman rinku, lliwpas allpamanta ruwasqallam, allpamantaqmi kutiykunqakupas. 21¿Pitaq runakunapa espiritun hanaq pachaman qespisqanta yachan, otaq animalpa espiritun allpa ukuman risqantapas? 22Chaywanmi yachaykurqani:
Runapa paqonqa allin llamkayninwan kusikuy kasqanta. Wañukuptinqa ¿pitaq qepa punchawkunaman imam pasakusqanta qawananpaq kutichimunman?
Currently Selected:
Eclesiastés 3: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012