2 Samuel 7
7
Rey Davidman Dios prometesqanmanta
(1 Cr 17.1-27)
1Muyuriqninpi enemigonkunamanta Tayta Dios hawkayayta qoykuptinmi, rey Davidqa palacionpiña yachaspan 2profeta Natanta nirqa:
Qawasqaykipi hinam ñoqaqa cedromanta palaciopi yachachkani, Diospa Arcanñataqmi carpallapi kachkan, nispa.
3Chaymi profeta Natán nirqa:
Sonqoykipa nisqanman hinayá ruway, Tayta Diosmi qanwan kachkan nispa.
4Chay tutam Natanta Tayta Dios nirqa: 5Rispayki serviqniy Davidman kaynata nimuy: ¿Qamchu yachanay wasita ruwapuwanki?
6Egipto nacionmanta Israelpa mirayninkunata hurqomusqay punchawmantam kunankama templopiqa mana yacharqanichu, aswanqa carpallapi yachastinmi purirqani. 7Llapa Israelpa mirayninkunawan tukuy tiempo purichkaspaypas, manam llaqtayta kamachinankupaq churasqay juezkunataqa mayqantapas nirqanichu cedromanta templota ruwapuwaychik nispaqa.
8Chaynaqa, ñoqa Tukuy Atiyniyuq Tayta Diospa nisqaytayá serviqniy Davidman kaynata nimuy: “Oveja michisqaykimantam Israel llaqtaypi kamachikuq kanaykipaq hurqomurqayki. 9Lliw purisqaykipi yanapaspaymi llapallan contraykipi hatarimuq enemigoykikunatapas tukururqani, kay pachapi atiyniyuqkunata hinam ancha reqsisqata ruwasqayki.
10Israel runaykunapaqpas huk sitiotam akllaruniña, chaypim paykunata churasaq manaña pipapas kuyuchisqan kanankupaq; chaypiqa manañam pipas nitaq mana allin runakunapas ñakarichinqañachu, 11imaynam Israel llaqtaypi juezkuna churasqay punchawkunapi hinaqa. Ñoqam llapallan enemigoykikunamanta hawkayayta qosqayki, miraynikimantapas reykunam hatarinqa. 12Machuyaruspa ñawpaq taytaykikuna hina wañukuptikim, qanmanta miramuqta kamachikunanpaq churasaq, hinaspam munaychakuyninta takyachisaq. 13Paymi wasiytaqa ruwapuwanqa, ñoqañataqmi munaychakuyninta wiñaypaq takyachisaq.
14 # 2 Co 6.18; Heb 1.5; Ap 21.7. Ñoqam paypaq taytan kasaq, payñataqmi churiy kanqa. Mana allinta ruwaptinqa, imaynam huk tayta churinta azotechkaq hinam payta azotesaq.
15Ichaqa manam Saulmanta hinachu kuyapayakuyniyta churikimanta qechusaq. Saultaqa wischururqani rantinpi qamtaña churanaypaqmi. 16Miraynikipas chaynataq munaychakuynikipas wiñaypaqmi takyanqa. Kamachikuynikipas wiñaypaqmi takyanqa”, nispa.
17Chaymi profeta Natán visionninpi tukuy ima qawasqanta chaynataq uyarisqanta Davidman willaykurqa. 18Hinaptinmi rey Davidqa Diospa qayllanman yaykuykuspan kaynata nirqa:
Dios Taytalláy ¿pitaq ñoqallayqa kani chaynataq aylluykunapas kaykama chayachimuwanaykipaqqa? 19Chaypas asllapaqraq rikchakapusuptikim kay serviqnikipa mirayninkuna imaynam kananmantapas rimapayaykuwankiraq. Señor Diosnilláy, ruwasqaykita hinaqa manam ima runapas ruwanchu.
20Dios Taytalláy ¿imatawanraqtaq nikiman? Kay serviqnikitaqa qanmi reqsiwanki. 21Prometewasqaykiman hinaspa munasqaykiman hinam tukuy kay admirakuypaq kaqkunata ruwarunki, chaykunatam kay serviqnikiman reqsiykachiwanki.
22Dios Taytalláy ¡mayna hatunmi qamqa kanki! Qam hinaqa manam pipas kanchu. Uyarisqaykupi hinapas qanmanta sapaq Diosqa manam kanchu. 23Israel llaqtayki hinaqa manam kay pachapi huk nacionqa kanchu. Diosnilláy, paykunataqa qanmi libramurqanki runaykikunaña kanankupaq, admirakuypaq kaqkunata ruwaspaykim paykunataqa ancha reqsisqata ruwarqanki. Egiptomanta hurqomuspaykim qayllankumanta achka nacionkunata chaynataq idolonkunatapas wischururqanki. 24Qanmi Israelta wiñaypaq llaqtayki kananpaq takyachirqanki, qanmi paykunapa Diosnin kanki.
25Señorlláy, Dios Taytalláy, kunanyá kay serviqnikimantawan mirayninmanta rimasqaykita wiñaypaq takyachiy. Nisqaykiman hinayá ruway. 26Sutikiyá wiñaypaq hatunchasqa kachun, hinaptinyá nichunku: “Israelpa Diosninqa Tukuy Atiyniyuq Tayta Diosmi” nispanku. Kay serviqniki Davidpa mirayninkunapas yanapakuynikiwanyá takyachunku.
27Israelpa yupaychasqan Tukuy Atiyniyuq Dios Taytalláy, qanmi kay serviqnikita mirayniyuqta ruwawanaykipaq niwarqanki. Chayraykum kay serviqnikiqa mañakamunaypaq kallpanchakullani.
28Dios Taytalláy, qamqa Diosmi kanki, rimasqaykipas cheqapmi. Qanmi serviqnikiman tukuy kaykunata prometewarqanki. 29Kunanyá kay serviqnikipa mirayninta bendeciykuy qampa qayllaykipi wiñaypaq takyananpaq. Dios Taytalláy qanmi prometewarqanki, bendicionnikiwanmi kay serviqnikipa mirayninkuna wiñaypaq bendecisqa kanqaku, nispa.
Currently Selected:
2 Samuel 7: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012