2 Samuel 2
2
Judá nacionpi Davidpa munaychakusqanmanta
1Chaykuna pasaruptinmi Tayta Diosta David tapurqa:
¿Yaqachu Judá lawpi hukkaqnin llaqtaman riyman? nispa.
Chaymi Tayta Dios nirqa:
Riy, nispa.
Huktawanmi David tapurqa:
¿Mayqan llaqtamantaq risaq? nispa.
Tayta Diosñataqmi nirqa:
Hebrón llaqtamanmi, nispa.
2 # 1 S 25.42-43. Chaymi Davidqa iskaynin warminkunawan: Jezreel llaqtayuq Ahinoamwan chaynataq Carmel llaqtayuq Nabalpa viudan Abigailwan, Hebrón llaqtaman qespirqaku. 3Puriqmasin runakunatapas aylluntintakamam pusarqa; paykunam Hebrón lawpi yacharqaku. 4#1 S 31.11-13.Chaymi Judá runakuna hamuruspanku Davidpa umanman aceiteta tallispa, Judapi munaychakunanpaq sapaqcharqaku.
Galaad lawpi Jabes llaqtayuqkuna Saulpa ayan pampasqankuta Davidman willaykuptinkum, 5runankunata David kacharqa Galaad law Jabes llaqtapi kaqkunaman kaynata nimunankupaq:
Reyninchik Saulta kuyapayarispa pampasqaykichikmantam qamkunaqa Tayta Diospa bendecisqan kankichik. 6Tayta Diosyá kunan kuyapayarisunkichik. Kay ruwasqaykichikmantaqa ñoqapas allintam ruwasqaykichik. 7Chaynaqa, kallpanchakuspayá qarinchakuychik, reynikichik Saúl wañuruchkaptinpas, Judá runakunam aceitewan tallispa rey kanaypaq sapaqchaykuwanku, nispa.
Israel nacionpi kikinkupura peleasqankumanta
8Saulpa tropankuna kamachiq Nerpa churin Abnermi, Saulpa churin Is-bosetta Mahanaim llaqtaman pusarqa. 9Paytam Galaadpi, Aserpi, Jezreelpi, Efraín ayllupi, Benjamín ayllupi hinaspa lliw Israel nacionpi munaychakunanpaq churarurqa. 10Is-bosetmi tawa chunka watayuq kachkaspan, Israel nacionpi munaychakuyta qallaykurqa, chaypim iskay wata munaychakurqa. Judá runakunam ichaqa Davidta reyninkupaq chaskirqaku. 11Davidmi qanchis wata soqta killan, Hebrón llaqtamanta Judá runakunata kamachirqa.
12Nerpa churin Abnermi, Mahanaim llaqtamanta Is-bosetpa soldadonkunapiwan Gabaón llaqtaman lloqsirqa. 13Sarviapa wawan Joabpas, Davidpa tropankunawanmi Hebrón llaqtamanta lloqsirqa. Iskaynin tropakunam Gabaón estanquepa waqtanpi tupanakururqaku, hinaspam chimpa-chimpa churakururqaku. 14Chaymi Joabta Abner nirqa:
Joven soldadonchikkuna lloqsispanku ñawpaqninchikpi peleachunku, nispa.
Joabñataqmi nirqa:
Allinmi, nispa.
15Hinaptinmi Benjamín ayllumanta Is-bosetpa rantinmanta chunka iskayniyuq jovenkuna lloqsirqaku, Davidpa ayllunmantapas chunka iskayniyuq jovenkunam lloqsirqaku. 16Chaymi sapakama enemigonwan umankumanta hapinakuruspanku espadankuwan waqtankupi tuksinakururqaku, chaynapim llapallanku wañururqaku. Chayraykum chay lugarta “#2.16 Hebreo simipi Helcat-hazurim ninanqa “espadawan tuksinakuna pampa” ninanmi.Helcat-hazurim”, nispa suticharqaku. Chay lugarqa Gabaonpim tarikun. 17Chay punchawmi llumpayta pelearurqaku, hinaptinmi Abnertawan Israel tropakunata Davidpa tropankuna vencerurqaku. 18Chaypim Sarviapa kimsa qari wawankuna kachkarqaku: Joab, Abisai hinaspa Asael. Asaelmi karqa purunpi luwichu hina kallpaq. 19Chaymi Abnerta Asael qatirqa alleqmanpas ichoqmanpas mana muyurispan. 20Abnerñataqmi qepanta qawarispan nirqa:
¿Manachu qamqa kanki Asael? nispa.
Chaymi Asael nirqa:
Arí, ñoqam kani, nispa.
21Hinaptinmi Abner nirqa:
Ama qatiwaychu, aswanqa alleq lawman otaq ichoq lawmanpas muyurispa hukkaqnin joven soldadota hapispayki llapa imankunatapas qechuspa apakuy, nispa.
Asaelmi ichaqa hinalla qatirqa. 22Chaymi Abnerqa yapamanta nirqa:
Ama qatiwaychu, yanqañataq wañurachikiman, hinaspaqa ¿ima uyaywantaq wawqeki Joabman rikuriyman? nispa.
23Asael mana asuriyta munaptinmi Abnerñataq lanzapa qepanwan wiksanpi tuksirurqa wasanta lloqsinankama, hinaptinmi Asaelqa chayllapi wañururqa. Haykam Asaelpa wañurusqanman chayaqkunañataqmi qawanankupaq chaypi sayaykuqku. 24Joabwan Abisaiñataqmi Abnerta qatirqaku. Inti seqaykuytam Amma orqoman chayarurqaku; chayqa tarikun Gía sutiyuq sitiopa chimpanpim, Gabaonmanta chunniqman rina ñanpim. 25Benjaminpa mirayninkunañataqmi Abnerwan huñunakuruspanku orqopa puntanpi huk tropa hinallaña churakururqaku. 26Chaymi Joabta qayaspan Abner nirqa:
¿Tukuy tiempochu wañuchinakuyllapi kasun? ¿Manachu yachanki kayqa llakiman apawasqanchikta? ¿Haykapikamataq runaykikunata mana kamachinkichu wawqenkuta amaña qatikachanankupaq? nispa.
27Hinaptinmi Joab nirqa:
Tayta Diosraykum jurayki, mana rimariykamuptikiqa achikyanankamam runaykuna sapakama wawqenkuta qatikachanmanku karqa, nispa.
28Chaymi trompetata Joab tocaykuptin lliw runankuna sayarurqaku, manañam Israel castamasinkunata qatikacharqakuñachu, nitaqmi mastaqa pelearqakuñachu. 29Abnerñataqmi runankunawan Arabá qechwanta tukuy tuta rispanku Jordán mayuta chimparuspa Bitrón lawninta Mahanaim llaqtaman chayarurqaku.
30Joabpas Abnerta qatikachasqanmanta kutiramuspanmi llapallan tropankunata huñururqa. Chaymi Davidpa tropankunata yuparuptinku Asaelwan chunka isqonniyuq soldadokuna faltarurqa. 31Davidpa tropankunam Abnerpa kamachisqan Benjamín tropankunamanta kimsa pachak soqta chunka runakunata wañurachirqaku. 32Asaelpa cuerpontañataqmi Belén llaqtapi, taytanpa sepulturanpi pamparurqaku. Joabñataqmi tropankunawan tukuy tuta rispan Hebrón llaqtapi achikyarurqaku.
Currently Selected:
2 Samuel 2: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012