1 Tesalonicenses 2
2
Tesalónica llaqtapi Pablopa llamkasqanmanta
1Wawqe-panillaykuna, yachasqaykichikpi hinapas watukamusqaykuqa manam yanqapaqchu karqa. 2#Hch 16.19-24.#Hch 17.1-9.Yachankichiktaqmi Filipos llaqtapi kamisqa, ñakarichisqa kachkaptiykupas Diosninchik kallpanchawasqankutapas, chaymi mana manchakuspayku Diosmanta allin noticiata willarqaykiku, willarqaykikum achkallaña runakuna contraykupi sayarichkaptinkupas.
3Ñoqaykuqa cheqap kaqtam willarqaykiku manam pantachinaykupaqchu aswanqa qamkunapa allinnikichikpaqmi. 4Chaynapim Diosqa allinpaq chaskiwaspanku allin noticiata willakunaykupaq churawarqaku, chaymi willakuchkaniku. Manam runakunapa munasqan ruwaytachu munachkaniku, aswanqa Diospa munasqantam, paymi sonqoyku pruebaqqa.
5Yachasqaykichikpi hinapas qamkunataqa manam sumaqllataña rimaspachu alabarqaykiku, nitaqmi qollqeta kuyaspaykuchu rimapayarqaykikupas, Diospas chaytaqa yachanmi. 6Manataqmi maskarqanikupas runakunapa alabasqan kaytachu nitaq qamkunapa otaq wakin runakunapa alabasqan kaytachu.
7Munaspaykuqa kamachikikumanmi karqa Cristopa apostolnin kasqaykurayku. Ichaqa qamkunawanmi llampu sonqolla karqaniku. Ñoqaykuqa wawankuna uywachkaq mama hinam karqaniku.
8Qamkunataqa llumpaytam kuyarqaykiku, manam ñoqaykuqa Diosmanta allin noticia willayllatachu munarqaniku, aswanqa kikiykupa vidayku qoytapas munarqanikum. Chaynataqa munarqaniku llumpayta kuyasqaykuraykum.
9Wawqe-paniykuna, qamkunaqa yuyachkankichikmi mantienekunaykupaq tuta punchaw mana pisipaspa llamkasqaykutapas, chaynapi allin noticia willakuyniykupi mana qamkunata gastachinaykupaq.
10Qamkunapas chaynataq Diospas yachanmi, iñiqkunapa qayllanpiqa allin kaqkunata ruwaspa, Diosllapaqña pipapas mana ima nisqan kawsasqaykuta. 11Yachankichiktaqmi sapakamata rimapayaspa kallpanchasqaykutapas, imaynam huk tayta churinkunawan ruwasqanta hina, 12kunarqaykikutaqmi Diospa churinkuna hina allinta kawsanaykichikpaqpas. Diosmi munaychakuyninpi hatunchasqa kanaykichikpaq qayasurqankichik.
13Chayraykum ñoqaykupas Diosman tukuy tiempo graciasta qoniku. Ñoqayku willaptiykum Diospa palabranta chaskirqankichik, ichaqa manam runapa rimasqanta hinallachu aswanqa Diospa cheqap palabranta hinam, chay palabraqa qamkuna ukupim allinta ruruchkan.
14 #
Hch 17.5. Wawqe-paniykuna, qamkunaqa Cristo Jesuspi iñiq Judeapi kaq Diospa iglesianpa ejemplontam qatichkankichik, paykunatam judiokuna ñakarichirqaku, chaynam qamkunatapas llaqtamasikichikkuna ñakarichisurqankichik.
15 # Hch 9.23, 29; 13.45, 50; 14.2, 5, 19; 17.5, 13; 18.12. Kay judiokunam Señor Jesusta hinaspa profetakunata wañurachirqaku, ñoqaykutapas qarqoruwarqakum, paykunaqa manam Diospa munasqanman hinachu kawsanku, lliw runakunapa contranpim kachkanku, 16paykunaqa mana judío kaqkuna salvakunankupaq allin noticia willanaykutam harkakuwanku. Chaynata ruwaspankum aswan mastaraq huchankuta llimparichichkanku, ichaqa ñam paykunapaq wiñay castigo chayaramunña.
Pablopa yapatawan watukuy munasqanmanta
17Wawqe-panillaykuna, ñoqaykuqa pisi tiempollapaqmi qamkunamanta karunchasqa kachkaniku, sonqoykupim ichaqa tukuy tiempo kachkankichik. Llumpaytam munachkaniku huktawan qamkuna qawaykuyta. 18Chayraykum qamkuna watukuyta munarqaniku. Ñoqa Pablom achka kutita qamkunaman hamuyta munarqani, ichaqa Satanasmi harkakuwarqaku. 19Señorninchik Jesucristo kutimuptinqa ¿imapitaq hapipakusaqku, kusikusaqku hinaspa alabakusaqku? aswanqa qamkunallam kusikuyniykuqa kankichik, manam hukkunachu. 20Arí, qamkunam kusikunaykupas hinaspa hatunchakunaykupas kankichik.
Currently Selected:
1 Tesalonicenses 2: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012