Jona 1
1
Jona mbwaatakwe kunyumfwila Mwaami Lesa
1Bushiku bumwi Mwaami Lesa wakaambila Jona mwanaakwe Amitayi ayi,#2 Baami 14:25 2“Nyamuka uye kundabala inene iindaawo ya Ninife, akushimikila cakucenjesha bantu ba mumo, ceebo bubi bwabo ndabubona ayi bwafula.”
3Sombi Jona wakanyamuka ayi alobokele kuTashishi kuswa pameenso a Mwaami Lesa. Lyalo wakakunkuluka kuya kuJopa, uko nkwaakacana bwaato bunene bwakalinga kuya nkuko. Aboobo wakalipila akutanta kuya kuTashishi pantu pomwi abeshikweensha bwaato ubo, kwaamba ayi aswe pameenso a Mwaami Lesa.
4Mpeeke Mwaami Lesa wakatuma cipuupu cinene palweenge. Lyalo kwakaba maaba ayoosha cakwaamba ayi bwaato bwakalinga kusuni kupasuka. 5Beshikweensha bwaato bakaloonda abuumbi akutalika kusenga lucafwo womwi awomwi kuswa kuli lesa wakwe. Ono kwaamba ayi boobye bwaato ubo, bakawaala shintu mulweenge. Sombi Jona wakalinga mucipinda cimwi ca panshi, kaali mutulo.
6Mpomunyaawo munene wa beshikweensha bwaato wakamucana umo akumwaambila ayi, “Ulilete webo? Buka usenge lucafwo kuli lesa wako! Mpashi inga watunyumfwila nkumbu ayi tutafwi.” 7Kuswawaawo beshikweensha bwaato bakalyaamboosha ayi, “Atuume cisolo ayi tubone waleta mapensho aya.” Mpeeke bakacita bweenkoobo, lyalo cakawita Jona. 8Aboobo bakamwiipusha ayi, “Ino ngani waleta mapensho aya? Ulasebensa ncitonshi? Ino ulaswa kucishinshi? Ulaswa kuli? Alimwi uli mushobonshi?”
9Jona wakakumbula ayi, “Ndi muEbulu. Ndalambila Mwaami Lesa, uli ngoLesa wa kwiculu uyo wakalenga inshi alweenge.” 10Mpeeke Jona wakabalwiita ayi utooloboka Mwaami Lesa.
Lyalo beshikweensha bwaato bakaloonda abuumbi ndibakanyumfwa cikani ici akumwiipusha ayi, “Ino wacitanshi?” 11Maaba akalinga kuya ciindaawo. Aboobo bakamwiipusha ayi, “Ino inga twakucita buyani kwaamba ayi maaba amane?”
12Mpeeke Jona wakabakumbula ayi, “Amumbweese mungwaale mulweenge, lyalo kutooboolabo tontolo. Ndishi ayi ndime ndalengesha ayi mapensho aya amucitikile.”
13Nakubi boobo, beshikweensha bakeelesha abuumbi ayi batape akuboola kwitala. Sombi bakaalilwa, ceebo maaba akalinga kuya cikomenenaako. 14Mpomunyaawo bakapaila kuMwaami Lesa ayi, “NoBaami baLesa, twaseenga mutatuleeki ayi tufwe mukwiinga twacaya muntu uyu utacite mulandu. Ceebo noBaami baLesa ndimwe mwalengesha ayi shoonse ishi shicitike.” 15Lyalo bakabwesa Jona akumuwaala mulweenge, Kuswawaawo kwakaboolabo tontolo. 16Paceebo ceeci beshikweensha bwaato bakaloonda akulemeka Mwaami Lesa, aboobo bakabenga mulambu kuli nguwe akumulasha cakulumbila ayi balaakunoomusebensela.
17Mwaami Lesa wakatuma nswi inene abuumbi ayi imine Jona, alimwi wakekala munswi iyo kwanshiku shotatwe.#Mate 12:40
Currently Selected:
Jona 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.