Jowelo 1
1
1Aya ngamaswi akaswa kuMwaami Lesa ayo akesa kuli Jowelo mwanaakwe Petuwelo.
Cisoshi mbocakesa mukulya shishango
2Amunyumfwe nobamaloba,
amukutike mwebo nomwikala mucishi ca Juda.
Sa camushobo wooyu cakacitikawo kale
mubuumi bwanu nabi mubuumi bwa bamashali banu bakulukulu?
3Amulwiite bana banu makani aya,
bana banu bakalwiite baana babo,
abalo baana babo bakalwiiteko lishalane litoosa.
4Shishango shakacaala kucisoshi cimwi,
nsoshi shinene shakesa mukushilya.
Shishango shakacaala kunsoshi shinene,
twana twa nsoshi twakesa mukushilya.
Shishango shakacaala kutwana twa nsoshi,
Nsoshi shimwibo shakesa mukushilya.
5Amubuke mulile mwebo nobacakolwa!
Amulile mwebo nobeshikunwa waini
mukwiinga minyansa yakupangisha waini upya,
yanyonyoolwa cakumaninina.
6Cisoshi calwana cishi cesu anga ndikoto lya bashilumamba.
Ncakwiila anga mbashilumamba bacite nkusu alimwi baanji cakutabelengeka.
Meeno a ncico alikoletebo anga nga nkalamu.#Ciyu 9:8
7Canyonyoola shisamu shesu sha minyansa
akulya shisamu shesu sha nkuyu.
Shalya mapapu oonse a shisamu shesu sha minyansa
kushikila misampi yoonse yacaalabo tuu.
8Nobantu amulile anga ngumulindu wafwala masaka
mukulila musankwa wakamumamikila uyo wafwa.
9Shipo sha fulaulo asha cakunwa
teshi shinoobonekawo muŊanda yakwe Lesa.
Bapailishi boonse batoolila
ncakwiila batoolila boonse basebensela pameenso a Mwaami Lesa.
10Myuunda yacaalabo tuu.
Bulongo butoolila myuunda
ceebo shili anga ngamaila shanyonyooka.
Shisamu sha minyansa asha nkuyu shafwa.
Ashalo shisamu sha maolifi shoonse shayuma.
11Mwebo nobalimi amuungumane.
Ee, amuungumane mwebo nomulima minyansa.
Amuungumane ceebo witi alimwi abale,
ee, ceebo shishango shoonse shanyonyoolwa mumyuunda.
12Ncakwiila shisamu sha minyansa asha nkuyu shamana kuyuma,
kubikaawo ashisamu sha mapomegilaneti, tupukupuku ashisamu sha maapo,
nkokwaamba ayi shisamu shoonse sha myuunda shamana kufwa.
Ee, kusangalala kwa bantu kwalobelela.
13Amufwale masaka akutalika kulila,
mwebo nobapailishi nomusebensela kushipaililo!
Amuceshe kulila kamufwete masaka
mwebo nomusebensela pameenso a Mwaami Lesa wangu
ceebo shipo shafulaulo asha cakunwa
teshi shinoobonekawo muŊanda yakwe.
14Amwaambilishe ayi mbushiku bwakulikasha kulya
akwiita bantu ayi babungane pantu pomwi.
Amwiite bamaloba
abantu boonse bekala mucishi ca Juda
kwaamba ayi baye kuŊanda yakwe Lesa, Lesa wanu
kuya mukulila kuli nguwe.
15Ncakwiila bushiku buyoosha butoosa.
Ee, bushiku bwa Mwaami Lesa buli pafwaafwi.
Ubo mbobushiku Mwaami Lesa Shinkusu shoonse
bweshi akalete lunyonyooko.#Isa 13:6
16Amubone shakulya shanyonyoolwa kutulangilisha ameenso esu.
Kusangalala akukondwa shamana muŊanda yakwe Lesa?
17Shili anga ngamaila shamana kufwa mubulongo buyumu.
Taaku shili anga ngamaila shakubika kubutala.
Paceebo ceeco matala oonse atoonyonyookabo.
18Ŋombe shitoolila kunsala
ceebo mumafulo a nshisho taamu bwiisu.
Ashalo mbelele shapenga abuumbi.
19NoBaami baLesa, ndamulilila!
Lumwi lwatenta mafulo anga ngumulilo ukali.
Ashalo shisamu shapya abuumbi kulumwi.
20Ncakwiila abanyama bamuluundu batoomulilila
mukwiinga tulonga toonse twamana kuyuma.
Aalo mafulo amana kupya kulumwi.
Currently Selected:
Jowelo 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.