Esila 1
1
Mwaami Sailasi mbwaakacafwa baJuda kuboolela kuJelusalemu
1Mumwaaka wakutaanguna wa bwaami bwakwe Sailasi mucishi ca Pesha, mukulengesha maswi a Mwaami Lesa ayo akaamba Jelemiya kucitika cancinencine, Mwaami Lesa wakaambila Sailasi ayi aambilishe mulawo uyo alimwi akuulemba ayi ubelengwe mubwaami bwakwe boonse.#Jele 25:11; 29:10 2Wakalemba ayi,
“Uku nkokwaamba kwangu nebo neSailasi mwaami wa bene Pesha. Mwaami Lesa, Lesa wa kwiculu, wampa nkusu shakulela cishi ca panshi coonse alimwi ashakuyaka Ŋanda yakwe muJelusalemu mucishi ca Juda.#Isa 44:28 3Lesa abe amwebo noonse nomuli mumaansaakwe. Mulyeelete kuya kuJelusalemu mukuyaka Ŋanda ya Mwaami Lesa, Lesa wa bene Isilaeli, Lesa ulambilwa muJelusalemu. 4Na bantu bakwe bamwi bali mushishi sha busha kabasuni kucafwikwa ayi baboolele kumishaabo, beshikamukobonyinaabo balyeelete kubacafwa. Balyeelete kubapa silifa, golodi, shakulya, shifubwa alimwi ashipo sha kuŊanda yakwe Lesa muJelusalemu.”
5Aboobo bamanene ba shipani sha mumukowa wakwe Juda awakwe Benjameni, bapailishi abene Lefi alimwi abaabo boonse Lesa mbaakalengesha myoyo kupya, bakalibambila kuya mukuyaka Ŋanda ya Mwaami Lesa muJelusalemu. 6Beshikamukobonyinaabo boonse bakabacafwako akubapa shintu shiinji, nkokwaamba ayi mbale sha silifa, golodi, shakulya, shifubwa, shamakwebo shimwi pantu pomwi ashipo sha kuŊanda yakwe Lesa.
7Mpeeke mwaami Sailasi wakababoshesha mbale ankomeshi isho mwaami Nebukadinesa nshaakakusha muŊanda ya Mwaami Lesa muJelusalemu akushibika muŋanda ya balesa bakwe. 8Sailasi mwaami wa bene Pesha wakatuma Mitiledati shikulama buboni ayi ashileete. Lyalo wakashibala akushipa Sheshibasa mweendeleshi wa cishi ca Juda. 9Shintu isho shakalinga
Mbale shifongomene sha golodi | 30 |
Mbale shifongomene sha silifa | 1,000 |
Mbale shifongomene shimwi | 29 |
10Mbale shifongomene shiniini sha golodi | 30 |
Mbale shifongomene shiniini sha silifa | 410 |
Shisebensesho shimwi | 1,000. |
11Shintu isho sha golodi alimwi asha silifa pantu pomwi shakalinga 5,400. Sheshibasa wakatolelela shintu isho shoonse ciindi abo bakalinga mucishi ca busha ndibakaswa muBabiloni akuya kuJelusalemu.
Currently Selected:
Esila 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.