Kulonga 1
1
Bene Isilaeli mbobakapenshekwa mucishi ca Ijipiti
1Meena a bana bakwe Jakobo basankwa alimwi abamumaandaabo abo mbwaakayaabo mucishi ca Ijipiti ngaaya. 2Lubeni, Simyoni, Lefi, Juda, 3Isaka, Sebuluni, Benjameni, 4Dani, Nafutali, Gadi alimwi aAsha.#Mata 46:8-27 5Baana bamulunyungu lwakwe Jakobo boonse pantu pomwi bakalinga makumi osanwe aobilo, sombi Josefu mwanaakwe wakalinga kale mucishi ca Ijipiti. 6Muya nshiku, Josefu alimwi abamakwabo boonse, kubikaawo abamulishalane lyabo boonse bakamana kufwa. 7Sombi bamulunyungu lwabo abo beetwa ayi bene Isilaeli bakashala baana baanji. Mpeeke bakafula abuumbi alimwi akuba ankusu, lyalo bakakumanabo cishi coonse.#Mili 7:17
8Kuswawaawo mwaami uyo watakalinga kwishi nabi comwi pali Josefu, wakatalika kulela mucishi ca Ijipiti.#Mili 7:18 9Wakaambila bantu ba mucishi cakwe ayi, “Bene Isilaeli aba mbaanji abuumbi alimwi mbayumu kwiinda ndiswe. 10Paceebo ceeci tulyeelete kubacenjelela ceebo inga baakwiindaawo kufula. Ono na kwabuka nkondo, inga baakucafwa balwani besu akulwana aswebo, lyalo bakaloboke amucishi cesu.”#Mili 7:19 11Aboobo bene Ijipiti bakasala beshikubasebensesha kwaamba ayi babapeenshe kwiinda mukusebensa ncito shiyumu. Bene Isilaeli bakayaka mandabala anene obilo aPitomu alimwi aLamesesi kwaamba ayi munoolaminwa shakulya sha mwaami Falawo. 12Ono nabi bene Ijipiti bakalinga kubapensha abuumbi, bene Isilaeli bakalinga kuya cifulilakobo akumwaikabo mucishi coonse. Aboobo bene Ijipiti bakatalika kuloonda bene Isilaeli. 13Paceebo ceeci bakatalika kubasebensesha calunkutwe. 14Bakayumya ceendo ca buumi bwabo kwiinda mukubasebensesha ncito iyumu abuumbi ya buyaki, alimwi aya mumyuunda yabo, cakutabanyumfwilawo nkumbu.
15Lyalo mwaami wa mucishi ca Ijipiti wakaambila Shifula alimwi aPuwa, banakashi bobilo abo bakalinga kutumbusha bene Ebulu ayi, 16“Pakunootumbusha banakashi bene Ebulu, na kwashalwa mwaana musankwa mulyeelete kumucaya, sombi na ngumwanakashi, nkumulekabo ayi akule.” 17Sombi beshikutumbusha abo bakalinga kuloonda Lesa. Aboobo tabakwe kukonkela maswi akaamba mwaami wa Ijipiti, sombi bakalinga kuleka baana basankwa ayi bakule. 18Paceebo ceeci mwaami Falawo wakeeta beshikutumbusha akubeepusha ayi, “Ino mutoocitilanshi bobulya? Mutoolekelanshi baana basankwa ayi bakule?” 19Balo bakakumbula ayi, “Bene Ebulu banakashi tabakoshenye abanakashi bene Ijipiti. Balo balafwambaana kutumbuka womwi pali ndiswe kaatana kushika.”
20Mpeeke Lesa wakanyumfwila nkumbu beshikutumbusha aba. Lyalo bene Isilaeli bakafulilaako akuba ankusu shiinji. 21Ono mukwiinga banakashi abo bakalinga kuloonda Lesa, wakabapa baana baanji.
22Kuswawaawo mwaami Falawo wakapa bantu ba mucishi cakwe boonse mulawo wakwaamba ayi, “Mwaana musankwa washalwa woonse wa bene Ebulu mulyeelete kuya mukumuwaala muMulonga wa Nailo. Sombi baana banakashi nkubalekabo ayi bakule.”#Mili 7:19
Currently Selected:
Kulonga 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.