Joni 13
13
Jesu mbwaakasansha bashikwiiya bakwe kushimpanta
1Kabutana kushikila bushiku bwa Pasika bwa kwiibaluka kusotokela, Jesu wakalinga kwishi ayi ciindi cashikila cakuswa mucishi ca panshi akuya kuli baIshi. Lakwe wakalinga kusuni bantu bakwe abo bakalinga mucishi alimwi wakabasunisha.
2Jesu abashikwiiya bakwe ndibakalinga kulya mulalilo, Mubiibi wakalinga wabika kale muyeeyo muli Judasi, mwanaakwe Simoni Isikalyoti, wakaaba Jesu kubalwani. 3Jesu wakalinga kwishi ayi wakapekwa shintu shoonse mumaansaakwe. Wakalinga kwishi alimwi ayi wakaswa kuli Lesa alimwi ulaakuboolela kuli nguwe. 4Lyalo Jesu wakanyamukaawo mpobakalinga kulita, wafuula cakufwala capeculu akulyaanga cisani cakulikunkumusha mubukome. 5Kuswawaawo wakabika maanshi mumbale yakusambilaamo, akutalika kusansha bashikwiiya bakwe kushimpanta akubakunkumuna acisani ceenka ico.
6Ndyaakashika pali Simoni Pita, lakwe wakeepusha Jesu ayi, “Nkambo, sa inga mwansaansha kushimpanta?” 7Jesu wakakumbula ayi, “Inga tooshibi ncentoocita bulya, sombi ulaakucishiba kunembo.”
8Pita wakaamba ayi, “Tamweelete kunsansha, sobwe!” Jesu wakamukumbula ayi, “Na mbule kukusansha, teshi unoocili shikwiiya wangu.”
9Lyalo Simoni Pita wakakumbula ayi, “Anu na mboboobo Nkambo, mutansanshibo kushimpanta, sombi akumaansa alimwi akumutwi koonse.” 10Jesu wakamwaambila ayi, “Muntu wasamba kale watuba. Taaku ceebo nceenga wayandila kusamba, sombibo kushimpanta kweenka. Noonse mwatuba kukushakobo womwi.” 11Mukwiinga Jesu wakalinga kwishi kale wooyo eshi akamwaabe, nceceeco ncaakaambila ayi, “Noonse, mwatuba kukushakobo womwi.”
12Jesu ndyaakamana kubasansha kushimpanta, wakafwala cakufwala cakwe capeculu akuboolela mpaakalinga kushiite. Lyalo wakeepusha ayi, “Sa mwacinyumfwisha ncindaswa mukumucitila? 13Mwebo ndyemunjita ayi, ‘Mufundishi,’ nabi ayi, ‘Nkambo,’ mulalulika mukwiinga ngondime. 14Ono nebo neMwaami alimwi amuFundishi wanu, ndamusansha kushimpanta. Amwebo anu mulyeelete kusanshanya kushimpanta. 15Ono ndacita citondesho kwaamba ayi amwebo mulyeelete kunoocitila bamwi bweenka mbondamucitila.#Luka 22:27 16Ntoomulwiita calushinisho ayi, taaku musebenshi wiinda mwaami wakwe alimwi taaku mutumwi wiinda wooyo wakamutuma.#Mate 10:24; Luka 6:40; Joni 15:20 17Ono bulya mbomweshiba shintu ishi, mulaakuba acoolwe na mukashiciite.
18“Nshintokwaambila noonse, sombi ndibeshi abo mbondakasala. Ishi shacitika kweelana aMalembo akwe Lesa akwaamba ayi, ‘Uyo ngondakalinga kulyaakwe mbale yomwi wakambukila.’#Kulu 41:9 19Ndamulwiitila limwi ici kacitana kucitika kwaamba ayi caakucitika mukashome kwaamba ayi, ‘Ndime wooyo ngoombete!’ 20Ntoomulwiita calushinisho ayi uyo woonse utambula womwi wa baabo mbondatuma, ulatambula ndime alimwi uyo woonse utambula ndime, ulatambula awooyo wakantuma.”#Mate 10:40; Maako 9:37; Luka 9:48; 10:16
Jesu mbwaakaamba shakwaabwa kwakwe
(Mate 26:20-25; Maako 14:17-21; Luka 22:21-23)
21Mpeeke Jesu ndyaakamana kwaamba boobo, wakapenshekwa abuumbi mumoyo akubaambila patuba ayi, “Ntoomulwiita calushinisho ayi womwi pakati kanu utoongaba.”
22Bashikwiiya bakwe bakatalika kulanganalangana, kabateshi na ngani ngwaakalinga kwaamba. 23Shikwiiya umwi mulikoto lyabo, uyo Jesu ngwaakalinga kusunishi, wakalinga kubambene akwe. 24Simoni Pita wakaningila shikwiiya uyo akumwaambila ayi, “Beepushe wooyo ngobatokwaamba.”
25Mpomunyaawo shikwiiya uyo wakalinga muliimfwa lyakwe Jesu wakeepusha ayi, “Nkambo, anu ngani ngomutokwaamba?” 26Jesu wakakumbula ayi, “Ngooyo ngweshi mpe shinkwa uyu ndamana kubwenga.” Lyalo ndyaakamana kubwenga wakapa Judasi mwanaakwe Simoni Isikalyoti. 27Ingayi Judasi atambulebo shinkwa uyo, Satana wakamwinjila. Mpeeke Jesu wakamwaambila ayi, “Ico ncootooyanda kucita, cicite kufwambaana.” 28Nakubi boobo taaku nabi womwi pabaabo mbaakalinga kulyaabo wakeshiba ncaakamwaambilila boobo. 29Ono ceebo cakwaamba ayi Judasi ngowakalinga kulama nkomwe ya maali, bashikwiiya bamwi bakayeeya ayi mpashi Jesu wamutuma mukuula shakulya shiyandika pabushiku bwa Pasika, nabi mukupa bakandu. 30Judasi ndyaakatambula shinkwa uyo wakaswita pansengwe. Ico ciindi lyakalinga kale mashiku.
Mulawo upya
31Judasi ndyaakaya, Jesu wakaamba ayi, “Ono MwanaaMuntu walemekwa alakwe Lesa walemekwa kwiinda muli nguwe. 32Ono na Lesa walemekwa kwiinda muMwanaakwe, nkokwaamba ayi alakwe Lesa mwiine ulaakulemeka Mwanaakwe alimwi utoocita boobo paciindi ceenka cino. 33Nobana bangu, ndanooli amwebo kwaciindi ciniini. Mulaakunangoola, sombi ntoomulwiita bweenka mbondakalwiita baJuda ayi, ‘Uko nkoontooya, mwebo inga tamuyiiko.’#Joni 7:34 34Ntoomupa mulawo upya wakwaamba ayi, ‘Amusunane.’ Bweenka mboomusuni nebo, amwebo mulyeelete kusunana.#Joni 15:12, 17; 1 Joni 3:23; 2 Joni 5 35Mukwiinga na kamusunene, bantu boonse balaakwishiba ayi muli bashikwiiya bangu.”
Jesu mbwaakaambila Pita ayi ulaakunkaka
(Mate 26:31-35; Maako 14:27-31; Luka 22:31-34)
36Simoni Pita wakeepusha Jesu ayi, “Nkambo, ino mutooya kuli?” Jesu wakakumbula ayi, “Uko nkoontooya tookoonshi kunkonkela bulya, sombi ulaakunkonkela kunembo.”
37Pita wakamwiipusha ayi, “Nkambo, ino nceebonshi nceenga shimukonkeleli bulya? Nebo ndilibambite kwaaba buumi bwangu ceebo ca ndimwe.” 38Jesu wakakumbula ayi, “Sa ncakwiila ulilibambite kwaaba buumi bwako ceebo ca ndime? Ntokwaambila calushinisho ayi kombwe kaatana kulila utokwaamba mankanda otatwe ayi toonshi.
Currently Selected:
Joni 13: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.