Milimo ya Batumwi 19
19
Paulo mbwaakashimikila muEfeso
1Paciindi ico Apolosi ndyaakalinga kuKolinto, Paulo wakeenda mucishi ca Galatiya aFuligiya akushika muEfeso. Uko, wakacana bashomi bamwi 2akubeepusha ayi, “Sa mwakatambula Mushimu Usalashi ndimwakashoma?” Balo bakamukumbula ayi, “Tau, tatuna kunyumfwaawo ayi kuli aMushimu Usalashi.”
3Mpeeke Paulo wakabeepusha ayi, “Ino kubombekwa kwanu kwakasansululanshi?” Balo bakakumbula ayi, “Bweenka bwakalinga kwaamba Joni.” 4Paulo wakaamba ayi, “Joni wakabombeka baabo bakalinga kusanduka kuswa kushibiibi shabo akubalwiita ayi balyeelete kushoma muli wooyo wakalinga kwisa pesule lyakwe, nkokwaamba ayi muli Jesu.”#Mate 3:11; Maako 1:4, 7-8; Luka 3:4, 16; Joni 1:26-27
5Ono bashomi abo ndibakanyumfwa boobo, bakabombekwa muliina lya Mwaami Jesu. 6Lyalo Paulo wakabika maansaakwe pali mbabo, mpeeke Mushimu Usalashi wakesa paboonse, bakatalika kwaamba mumishobo yeensu akushimikila makani akwe Lesa. 7Basankwa abo pantu pomwi bakalinga mpashi likumi abobilo.
8Mumyeenshi yotatwe Paulo wakalinga kuya kucoonde ca baJuda mukubandika abantu cakutaloonda. Wakalinga kubasansulwita kwaamba ayi bashome nshaakalinga kwaamba shapaBweene bwakwe Lesa. 9Sombi bamwi bakacita minsuula akukaka kushoma nshaakalinga kubalwiita. Bakatalika kucobola Nshila ya Mwaami Jesu pameenso a bantu boonse. Paceebo ceeco, Paulo wakabashiya akuya abaabo bakashoma. Mpeeke bushiku abushiku wakalinga kubandika abantu muŋanda inene njaakalinga kusebensesha Tayilanasi pakwiisha. 10Paulo wakacita mbomunya ubo kwamyaaka yobilo. Aboobo bantu boonse bakalinga kwikala mucishi ca Esha, baJuda abaswamashi bakunsengwe, bakanyumfwa maswi aamba paMwaami Jesu.
Bana bakwe Sikifa mbobakeelesha kukusha bashikaswa
11Lesa wakalinga kucita shaankamiko shitana kubonekaawo kwiinda muli Paulo. 12Bantu bakalinga kucita na babwesa tutambala nabibo shisani shakasebenseshawo Paulo akutola kubalwashi, malwashi abo akalinga kumana, abalo bashikaswa bakalinga kuswa mubantu. 13Ono baJuda bamwi bakalinga kweendeenda kabaya bukusha bashikaswa, abalo bakeelesha kusebensesha liina lya Mwaami Jesu pakucita mulimo wabo. Bakalinga kwaamba ayi, “Ndamwaambila muliina lyakwe Jesu uyo ngwaashimikila Paulo ayi muswe!” 14Bakalinga kucita boobo, mbasankwa bali bosanwe abobilo, bana bakwe Sikifa mupailishi munene wa baJuda.
15Sombi bumwi bushiku shikaswa wakabaambila ayi, “Nebo Jesu ndimwishi alimwi ashicita Paulo shoonse ndishishi. Ino mwebo ndimwe baani?” 16Mpomunyaawo musankwa wakalinga kucite shikaswa wakabafukukila cankusu akubakoma boonse. Wakabacisa akubakwamwita shakufwala, mpeeke bakacica kuswa muŋanda. 17Ono baJuda abaswamashi bakunsengwe bakalinga kwikala muEfeso ndibakanyumfwa cikani ici, bakaloonda abuumbi. Lyalo bantu bakeendaawo kulumbaisha liina lya Mwaami Jesu. 18Kuswawaawo bashomi baanji bakalinga kwisa akulyaambilila pameenso a bantu shibiibi shoonse nshebakacita. 19Abalo baŋanga baanji bakaleta mabuku abo umo mwakalinga kulembetwe bwakucita akwaatenta bantu boonse kabeebela. Ndibakasenkanya mweelo wa mabuku akatentwa, bakacana ayi ngamakumi osanwe ashuulu sha maali a silifa eetwa ayi dilakima. 20Ceebo ca shintu shoonse ishi shakalinga kucitika, bantu baanji baanji bakalinga kunyumfwa maswi aamba paMwaami Jesu akusebensa cankusu.
Bantu ba muEfeso mbobakalengesha shimfulunganya
21Ndishakamana kucitika shoonse ishi, Paulo wakayeeya kuya kuJelusalemu, kwiinda kuMakedoniya akuAkeya. Wakaamba ayi, “Na nkaswe kuJelusalemu, ndyeelete kuya akuLoma.” 22Lyalo wakatuma Timoti aElasitasi kuMakedoniya, basankwa bobilo bakalinga kumucafwa milimo. Lakwe wakalinga kucishiite muEsha.
23Mpaciindi ceenka ici, ndikwakacitika mapensho anene abuumbi muEfeso ceebo ca Nshila ya Mwaami Jesu. 24Kwakalinga musankwa umwi shikusungulula silifa wiitwa ayi Demetiliyasi. Wakalinga kubumba shikoshanyo sha silifa sha muŋanda yakwe lesa mwanakashi wakupanga wiitwa ayi Atemisi. Ncito iyi yakalinga kuletela basebenshi mpindu inene abuumbi. 25Lyalo Demetiliyasi wakabunganya basebenshi bakwe alimwi abamwi bakalinga kucite ncito mbuli yeeyi akubaambila ayi, “Nobeensuma, mulishi kwaamba ayi bubile bwesu bulaswa muncito iyi njetucita. 26Mutoobona akulinyumfwila nobeene shintu shitoocita wooyu Paulo. Utokwaamba ayi balesa babumbwa abantu teshi balesa, sobwe. Aboobo walengesha ayi bantu baanji batalike kushoma musheesho nshaatokwaamba muno muEfeso alimwi amucishi coonse ca Esha. 27Nkokwaamba ayi mpashi bantu batootalika kwaamba shibiibi pancito yesu iyi. Teeshibo ncito yeenka, sombi ŋanda yakwe lesa wesu Atemisi taaku mbweshi ibeewo kubantu. Aboobo bulemu bwakwe lesa uyu butoonyonyooka, lesa uyo ngobalambila bantu ba muEsha acishi coonse!”
28Ono bantu abo ndibakanyumfwa makani aya, bakakalala akutalika koolobesha ayi, “Atemisi wa kuEfeso ngomunene!” 29Mpomunyaawo shimfulunganya shakakumanabo ndabala inene yoonse. Lyalo bantu bakacata Gayasi aAlisitakasi, basankwa ba kuMakedoniya bakalinga kweenda aPaulo akubakwelaanya kubatola kumusena kucitilwa shisekano. 30Paulo wakalinga kusuni kuya kulikoto lya bantu ayi akaambaabo, sombi bashomi bakamukasha. 31Bacinenenene ba mucishi ca Esha, abo bakalinga babye Paulo, abalo bakatumya maswi kuli nguwe akumusenga ayi atayiiko kumusena kucitilwa shisekano. 32Bantu boonse bakalinga kubungene kabayobelabo. Bamwi boolobesha cimwi abalo bamwi ciimbi ceebo baanji tebakalinga kwishi ancebakabunganina. 33Bamwi mulikoto lyabo bakaamba ayi Alekisanda ngowakalinga kwishi makani mukwiinga baJuda ngobakashindikila kunembo. Mpeeke wakoomusha bantu alyaansa kwaamba ayi abalwiite kabotu ayi taacite mulandu. 34Ono likoto ndilyakeshiba ayi ngumuJuda, boonse bakoolobesha pantu pomwi kabaamba maswi omwi omwi kwamaawala obilo ayi, “Atemisi wa kuEfeso ngomunene!”
35Kumamanino musankwa mulembi wa mundabala wakoomusha bantu akubaambila ayi, “Mwebo nobene Efesoma, boonse bantu balishi kwaamba ayi ndabala inene ya Efeso njeelama ŋanda yakwe Atemisi munene alimwi alibwe lisalalite lyakaloka kwiculu. 36Taaku muntu weenga waakaka makani aya, aboobo mulyeelete kuumuna, mutaciti shintu cakwiingana. 37Mwaleta Gayasi aAlisitakasi, nakubi kwaamba ayi taaku cintu ca muŋanda yakwe lesa wesu ncebeepa, nabi kumucobola. 38Ono na Demetiliyasi abaabo mbwaasebensaabo batooyanda kupa mulandu umwi muntu, nkuta aboomboloshi nkobali, inga baya mukwaamba makani uko, munshiku boomboloshi ndibasebensa. 39Sombi na kuli cimwi ncemusuni, libungano lya bantu ba mundabala lyakasuminishikwa amilawo, ndyelyeelete kulanga pacikani ico. 40Mukwiinga pasheeshi shacitika sunu, beendeleshi ba kuLoma inga batupa mulandu wakuleta shimfulunganya. Taaku pakuyubila mucikani ici. Aboobo taaku weenga wasansulula kabotu calengesha shimfulunganya.” 41Ndyaakamana kwaamba boobo, wakaambila bantu ayi bapalangane.
Currently Selected:
Milimo ya Batumwi 19: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
Milimo ya Batumwi 19
19
Paulo mbwaakashimikila muEfeso
1Paciindi ico Apolosi ndyaakalinga kuKolinto, Paulo wakeenda mucishi ca Galatiya aFuligiya akushika muEfeso. Uko, wakacana bashomi bamwi 2akubeepusha ayi, “Sa mwakatambula Mushimu Usalashi ndimwakashoma?” Balo bakamukumbula ayi, “Tau, tatuna kunyumfwaawo ayi kuli aMushimu Usalashi.”
3Mpeeke Paulo wakabeepusha ayi, “Ino kubombekwa kwanu kwakasansululanshi?” Balo bakakumbula ayi, “Bweenka bwakalinga kwaamba Joni.” 4Paulo wakaamba ayi, “Joni wakabombeka baabo bakalinga kusanduka kuswa kushibiibi shabo akubalwiita ayi balyeelete kushoma muli wooyo wakalinga kwisa pesule lyakwe, nkokwaamba ayi muli Jesu.”#Mate 3:11; Maako 1:4, 7-8; Luka 3:4, 16; Joni 1:26-27
5Ono bashomi abo ndibakanyumfwa boobo, bakabombekwa muliina lya Mwaami Jesu. 6Lyalo Paulo wakabika maansaakwe pali mbabo, mpeeke Mushimu Usalashi wakesa paboonse, bakatalika kwaamba mumishobo yeensu akushimikila makani akwe Lesa. 7Basankwa abo pantu pomwi bakalinga mpashi likumi abobilo.
8Mumyeenshi yotatwe Paulo wakalinga kuya kucoonde ca baJuda mukubandika abantu cakutaloonda. Wakalinga kubasansulwita kwaamba ayi bashome nshaakalinga kwaamba shapaBweene bwakwe Lesa. 9Sombi bamwi bakacita minsuula akukaka kushoma nshaakalinga kubalwiita. Bakatalika kucobola Nshila ya Mwaami Jesu pameenso a bantu boonse. Paceebo ceeco, Paulo wakabashiya akuya abaabo bakashoma. Mpeeke bushiku abushiku wakalinga kubandika abantu muŋanda inene njaakalinga kusebensesha Tayilanasi pakwiisha. 10Paulo wakacita mbomunya ubo kwamyaaka yobilo. Aboobo bantu boonse bakalinga kwikala mucishi ca Esha, baJuda abaswamashi bakunsengwe, bakanyumfwa maswi aamba paMwaami Jesu.
Bana bakwe Sikifa mbobakeelesha kukusha bashikaswa
11Lesa wakalinga kucita shaankamiko shitana kubonekaawo kwiinda muli Paulo. 12Bantu bakalinga kucita na babwesa tutambala nabibo shisani shakasebenseshawo Paulo akutola kubalwashi, malwashi abo akalinga kumana, abalo bashikaswa bakalinga kuswa mubantu. 13Ono baJuda bamwi bakalinga kweendeenda kabaya bukusha bashikaswa, abalo bakeelesha kusebensesha liina lya Mwaami Jesu pakucita mulimo wabo. Bakalinga kwaamba ayi, “Ndamwaambila muliina lyakwe Jesu uyo ngwaashimikila Paulo ayi muswe!” 14Bakalinga kucita boobo, mbasankwa bali bosanwe abobilo, bana bakwe Sikifa mupailishi munene wa baJuda.
15Sombi bumwi bushiku shikaswa wakabaambila ayi, “Nebo Jesu ndimwishi alimwi ashicita Paulo shoonse ndishishi. Ino mwebo ndimwe baani?” 16Mpomunyaawo musankwa wakalinga kucite shikaswa wakabafukukila cankusu akubakoma boonse. Wakabacisa akubakwamwita shakufwala, mpeeke bakacica kuswa muŋanda. 17Ono baJuda abaswamashi bakunsengwe bakalinga kwikala muEfeso ndibakanyumfwa cikani ici, bakaloonda abuumbi. Lyalo bantu bakeendaawo kulumbaisha liina lya Mwaami Jesu. 18Kuswawaawo bashomi baanji bakalinga kwisa akulyaambilila pameenso a bantu shibiibi shoonse nshebakacita. 19Abalo baŋanga baanji bakaleta mabuku abo umo mwakalinga kulembetwe bwakucita akwaatenta bantu boonse kabeebela. Ndibakasenkanya mweelo wa mabuku akatentwa, bakacana ayi ngamakumi osanwe ashuulu sha maali a silifa eetwa ayi dilakima. 20Ceebo ca shintu shoonse ishi shakalinga kucitika, bantu baanji baanji bakalinga kunyumfwa maswi aamba paMwaami Jesu akusebensa cankusu.
Bantu ba muEfeso mbobakalengesha shimfulunganya
21Ndishakamana kucitika shoonse ishi, Paulo wakayeeya kuya kuJelusalemu, kwiinda kuMakedoniya akuAkeya. Wakaamba ayi, “Na nkaswe kuJelusalemu, ndyeelete kuya akuLoma.” 22Lyalo wakatuma Timoti aElasitasi kuMakedoniya, basankwa bobilo bakalinga kumucafwa milimo. Lakwe wakalinga kucishiite muEsha.
23Mpaciindi ceenka ici, ndikwakacitika mapensho anene abuumbi muEfeso ceebo ca Nshila ya Mwaami Jesu. 24Kwakalinga musankwa umwi shikusungulula silifa wiitwa ayi Demetiliyasi. Wakalinga kubumba shikoshanyo sha silifa sha muŋanda yakwe lesa mwanakashi wakupanga wiitwa ayi Atemisi. Ncito iyi yakalinga kuletela basebenshi mpindu inene abuumbi. 25Lyalo Demetiliyasi wakabunganya basebenshi bakwe alimwi abamwi bakalinga kucite ncito mbuli yeeyi akubaambila ayi, “Nobeensuma, mulishi kwaamba ayi bubile bwesu bulaswa muncito iyi njetucita. 26Mutoobona akulinyumfwila nobeene shintu shitoocita wooyu Paulo. Utokwaamba ayi balesa babumbwa abantu teshi balesa, sobwe. Aboobo walengesha ayi bantu baanji batalike kushoma musheesho nshaatokwaamba muno muEfeso alimwi amucishi coonse ca Esha. 27Nkokwaamba ayi mpashi bantu batootalika kwaamba shibiibi pancito yesu iyi. Teeshibo ncito yeenka, sombi ŋanda yakwe lesa wesu Atemisi taaku mbweshi ibeewo kubantu. Aboobo bulemu bwakwe lesa uyu butoonyonyooka, lesa uyo ngobalambila bantu ba muEsha acishi coonse!”
28Ono bantu abo ndibakanyumfwa makani aya, bakakalala akutalika koolobesha ayi, “Atemisi wa kuEfeso ngomunene!” 29Mpomunyaawo shimfulunganya shakakumanabo ndabala inene yoonse. Lyalo bantu bakacata Gayasi aAlisitakasi, basankwa ba kuMakedoniya bakalinga kweenda aPaulo akubakwelaanya kubatola kumusena kucitilwa shisekano. 30Paulo wakalinga kusuni kuya kulikoto lya bantu ayi akaambaabo, sombi bashomi bakamukasha. 31Bacinenenene ba mucishi ca Esha, abo bakalinga babye Paulo, abalo bakatumya maswi kuli nguwe akumusenga ayi atayiiko kumusena kucitilwa shisekano. 32Bantu boonse bakalinga kubungene kabayobelabo. Bamwi boolobesha cimwi abalo bamwi ciimbi ceebo baanji tebakalinga kwishi ancebakabunganina. 33Bamwi mulikoto lyabo bakaamba ayi Alekisanda ngowakalinga kwishi makani mukwiinga baJuda ngobakashindikila kunembo. Mpeeke wakoomusha bantu alyaansa kwaamba ayi abalwiite kabotu ayi taacite mulandu. 34Ono likoto ndilyakeshiba ayi ngumuJuda, boonse bakoolobesha pantu pomwi kabaamba maswi omwi omwi kwamaawala obilo ayi, “Atemisi wa kuEfeso ngomunene!”
35Kumamanino musankwa mulembi wa mundabala wakoomusha bantu akubaambila ayi, “Mwebo nobene Efesoma, boonse bantu balishi kwaamba ayi ndabala inene ya Efeso njeelama ŋanda yakwe Atemisi munene alimwi alibwe lisalalite lyakaloka kwiculu. 36Taaku muntu weenga waakaka makani aya, aboobo mulyeelete kuumuna, mutaciti shintu cakwiingana. 37Mwaleta Gayasi aAlisitakasi, nakubi kwaamba ayi taaku cintu ca muŋanda yakwe lesa wesu ncebeepa, nabi kumucobola. 38Ono na Demetiliyasi abaabo mbwaasebensaabo batooyanda kupa mulandu umwi muntu, nkuta aboomboloshi nkobali, inga baya mukwaamba makani uko, munshiku boomboloshi ndibasebensa. 39Sombi na kuli cimwi ncemusuni, libungano lya bantu ba mundabala lyakasuminishikwa amilawo, ndyelyeelete kulanga pacikani ico. 40Mukwiinga pasheeshi shacitika sunu, beendeleshi ba kuLoma inga batupa mulandu wakuleta shimfulunganya. Taaku pakuyubila mucikani ici. Aboobo taaku weenga wasansulula kabotu calengesha shimfulunganya.” 41Ndyaakamana kwaamba boobo, wakaambila bantu ayi bapalangane.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.