Mark 1
1
Zaŋ-Batist a zəlata ndaw hay ma ka mbəɗadama mendzey ta
(Mt 3.1-6, 11-12; Lk 3.1-6, 15-18)
1Neney na, mezley ma Mey Hayna Wayna ma Yezu Kriste, Bəzey ma Bay ma Bəla. 2Ma winda ha da ɗeriwel ma ndaw sek Ezayi na, andza neney:
«Nəkafa, i sləraɓa maslaŋ a ɗaw, ka mey ɗek;
ma aza ka da ləmadaka tsəveɗ.
3Vəɗe ma ɗay ma tsənawa da palah:
‹Ləmadəmara buwal ma Bay’ərlam,
ləmadəmara tsəveɗ aŋga hay dender dender.›
4Zaŋ-Batist ma tsarawa da palah, ta me tələkey mey ta me medzuhəɓey, ma da ndzafada me sey yam ka meŋgəsey hay.» 5Ndaw ma dala ma Zudey ta ndaw ma Zeruzalem hay tabiyaha, ma dawam ka tsakay ŋga. Arka Zaŋ ma dzuhəɓadata a yam, da wayaŋ ma Zurdeŋ, taya tey na a ɓadama meŋgəsey ta hay. 6Zana ma Zaŋ ana me pey ka vaw na, ma mbez me zlegweme, ma dzuwa ha hərap da bəzay hwoɗ ta kanda ma həzlay. Tek aŋga me zəmey na, hwayok ta uwam me ley. 7Ŋga me tələkey mey, me ləvey: «Ndaw ma da sawa da dəba ɗaw ana na, a fənaya ta gədaŋ, yah ɗa ndaw aha me gweɗəkwey, ma da pəsəkey lendze ma tahərak aŋga kakay. 8Yah na i dzuhəɓadakwar na da yam, ama ŋga na, a da dzuhəɓadakwar na, a Mesəfrey Kokwoɗ ana.»
Me dzuhəɓey ma Yezu
(Mt 3.13-17; Lk 3.21-22)
9Arka da na ŋga na na, Yezu ma sawa da Nazaret a Galiley. Zaŋ ma dzuhəɓada, da wayaŋ ma Zurdeŋ. 10Andza Yezu ma bawa da yam na, ŋga ma nəkada ndasl ma 'ərlam ma ndzesləɗey, Mesəfrey andza hwaɗəgwam aha, ma harɗawa ka 'ar aŋga. 11Vəɗe ma ɗay ma tsənawa da 'ərlam: «Kah na Bəzey ma mey 'ərev aɗaw, i da walaka na, hərway kah, ka daya 'ar ba.»
Setene a həlafa suwet ka Yezu da palah
(Mt 4.1-11; Lk 4.1-13)
12Arka tsana, Mesəfrey Kokwoɗ ana ma dahəɗa Yezu a palah. 13Da meney kokurow faɗ da palah na, Setene ma pafa wuiya; ma ndza hiya na, andza tek ma ley hay. Madurlam hay a kamar meslərey.
Yezu a ɓey Mey Hayna Wayna da Galiley
(Mt 4.12-17; Lk 4.14-15)
14Andza ma zəgama Zaŋ ba a daŋgay na, Yezu ma daway a Galiley ma da ɓey Mey Wayna ma Bayma Bəla me ləvey: 15«Har ana ka ndesley tsay, Slala ma Bay'ərlam ka gurawa tsay. Mbəɗadama mendzey kwar, pam 'ar ka Mey Wayna.»
Yezu a zəley ndaw me həley kəlef hay faɗ ana
(Mt 4.18-22; Lk 5.1-3, 10-11)
16Andza Yezu a daw aha, ta mey ma bəlay ma Galiley na, ŋga ma nəkadata simoŋ ta Andre, malam ma simoŋ. A kwuiyam aha zəva ta hay a bəlay, hərway taya ndaw me həley kəlef hay. 17Yezu ma ləvatar: «Səmawa, səpəmaya bəzay, i da təradakwar, na ndaw me həley ndaw hay ahiya.» 18Taya ŋguɗek ma mbəkadama zəva ta hana hay, ma səpamar bəzay. 19Andza ŋga ma gurey nekəɗey na, ŋga ma nəkadata Zak bəzey ma Zebede ta malam aŋga Zaŋ. Taya da kombiwal ata, a ləmadəmata ha zəva ta hay. 20Arka tsana ŋga ma zəlata. Taya na, ma mbəkadama baba ta Zebedey, ta ndaw ma mber aŋga hay a kombiwal, ma səpamar bəzay.
Yezu a tsey guma ŋga na ta mazlaɓ aha
(Lk 4.31-37)
21Taya ma husam a Kafarnawom, arka ta pas ma mesley tsana, Yezu me fuləkwey a 'ay me ɗuley mey, ma tatəkadata ndaw hay. 22Guma ŋga na ma tatəkadatara na na, a rəzlata. Hərway me tetəkey ŋga na na, ma ndaw ta mazlaɓ aha, zləna, andza ma ndaw me sesəkey Mewey hay tikay. 23Arka tsana, da ’ay ma ɗuley mey ta na na, ndaw ana daha ta mesəfrey ma zləɓa na da 'ar; me wudey: 24«Ka wuɗafandar mey, Yezu ma Nazaret, ka sawa na, ma da zəɗadandar ɗaw? I sərada ha kah na, Ndaw Kokwoɗ ana ma Bay ma Bəla.» 25Yezu ma war ’ar ta me bebətsey aha: «Ndzey tete, bawa ba da vaw ma ndaw a neney.» 26Mesəfrey ana hana na ma zləɓa na, ma gwagutsada ndaw ana hana ma gədaŋ, ma bawa ta me wudey aha, ta magala ha. 27Taya tabiyaha ma rəzla hiya, ha taya ma tsəham ka 'ar vaw ta na hay: «Neney na mey? Nəkafama neney na, me tetəkey na wayna, ta mazlaɓ aha na tok. A watar 'ar a mesəfrey ma zləɓa na hay na, a tsənamar sləmay.» 28Arka tsana, ma hikadama da dala ma Galiley tobiya ha.
Yezu ma ndalada mesey ma Simoŋ ta ndaw dzedzey mekele hiya haɗadzidzay
(Mt 8.14-15; Lk 4.38-39)
29Andza ma bawa ta ba da 'ay me ɗuley mey tsana, taya ma dam andza Zak ta Zaŋ, a 'ay ma ndza Simoŋ ta Andrey. 30Azlakwa tok na, mesey ma Simoŋ ana, ma na ha, 'ar a wuzləɗar. Arka tsana, ma tsamar ka ŋgwas ana a Yezu. 31Ŋga ma gurafa, ma zəga da har, ma lətsada, 'ar ma wuzləɗey ma ndalafa. Ŋga ma zlar ma tatar tek me zəmey.
A ndalam ndaw hay a dəba me mesley
(Mt 4.24; 8.16-17; Lk 4.40-41)
32Ma hakwaɗ, ma pas me kəley ba na, ma sadəmatərawa ndaw dzedzey ana hay, ta ndaw ta fakalaw da 'ar ana hay tabiyaha. 33Ndaw ma wuraw ana hay tobiya ha ma kusa hiya ka mey ma mbaw. 34Ŋga ma ndaladata dzedzey hay haɗadzidzay ma sam banay ta dzedzey hay gəle gəle. Ŋga me ɓəley fakalaw hay haɗadzidzay da vaw ma ndaw hay. A mbəkatar tsəveɗ a fakalaw ana hay, ka tsam guma zlay, zləna, hərway taya na, a səradama Yezu ana.
Gawla ma Yezu hay ma səpama Yezu, ma ndzafama
(Mt 4.23; Lk 4.42-44)
35Ma zlemedew ana, ma dey zew zew na, Yezu me lətsey, ma daw təŋga a slam palah aha, da huɗa na ŋga me ɗuley mey. 36simoŋ ta sa ma mandala ŋga sana hay, ma səpama. 37Arka ma ndzafama, ma ləvamar: «Ndaw hay tabiyaha a səpəmaka ha.» 38Arka ŋga ma ləvatar: «Nakwa ka mey a wuraw mekele hiya, ma aza i ka tələkada mey ta Mey Wayna, hərway i bawa na hərwuiya.» 39Arka ŋga ma hala dala ma Galiley tabiyaha; a tələkey mey da 'ay me ɗuley mey ta hay, a herey fakalaw da 'ar ma ndaw hay.
Me bəzləmey ma ndaw malawa ha
(Mt 8.1-4; Lk 5.12-16)
40Ndaw malawa na daha ma gurafa, ma kar amboh, me gərdey ta me ləvey aha: «Kendzey ka wuɗey na, ka slafa ma bazləmafaya malawa ɗaw eɗey seŋgey.» 41A kar da vaw, Yezu, ma ndəɗada har, ma ləmar, ma ləvar: «Ayaw i wuɗey, tərey ma bazləma ha na.» 42Deŋe, ka slam ana hana tsana, malawa na ma ndalafa, ŋga ma bazləma ha tsay. 43Ma tsar mevel a Yezu na, ma ləvar ka daw a mbaw tsa. 44Yezu ma ləvar: «Daway, ka da ɓadara a ndaw zlay, amana, daw da ɓadara vaw a baba me key kuley, vəlada tek ma bəzləmey vaw ɗek ana andza ma Moyiz me ləvey ana, aza ka da təratar seydewe ta ha» 45Ama andza ma daw təŋga na, ŋga ma təɗafa ma tələkada mey, ta magala ha, ma pada mey ta mey ana, ha ma təka Yezu a slafa me fuləkwey ndar ndar a wuraw, sakay. Ama a ndzey na da’ar bəla, da slam palah ahiya. Arka ndaw hay a səmawa ka tsakay ŋga, ta sləna, ta sləna.
Currently Selected:
Mark 1: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun