Luk 1
1
Medzeley 'ar ma Luk ka Mey Hayna Wayna
1-2Sa ma ndaw hay ka nəkadəmərawa ba ta dey ta zla da mezley ana, tek ana ma ndasləmawa da walaŋ a lakwa na. Arka a dəba na na, taya ma həladəmərawa vaw ma tələkadəmərawa mey ta Guma ŋga. Arka taya ma təkəradəmandar tek ana hay tabiyaha tey, arka ndaw hay haɗadzidzay da walaŋ a la, ma dzadama me windey bəzay ma guma na. 3Yah ekəɗey tey na, i ka tsəha bəzay ma guma na ba haya hayaha ka tek ana ma kawa tabiyaha na zla da bəziya. Yah tey na i me dzeley tiyatsa na, ma winda guma na ka membere ka membere. I ka neney na hərway ɗek, ŋgalaka ɗaw Teofil. 4Kəɗey tok na, kah ka sərafa kah ka ndzafawa me tetəkey na hayna hay ba dərka na.
A ɓadama ma da yawa ma Zaŋ-Batist
5Da har ma Erod bay ɗuhwa na da Zudey na, baba me key kuley ana daha a zəlamar Zakari, da walaŋ ma ndaw ma Abiya hay. Ŋgwas aŋga na na, a zəlamar Elizabet ndaw ma gedzek ma Aroŋ. 6Tsetsuwe taya na, dzerey ahiya ka slam dey ma Bay ma Bəla. A səpama mey ma mewey ma Bay’ərlam hay na təɗe təɗe, kwa ma ŋgəla bəzay kava dakay. 7Ama tok na, wawa ta dakay. Hərway ŋgwas aŋga Elizabet ana na dəlay aha. Yaw satsa na, tsetsuwe taya maraw ahiya ka dəba. 8Har ma Zakari ka slawa ba me key kuley ka slam dey ma Bay ma bəla, hərway har a ta, ta ndaw aŋga hay ka slawa ba. 9Andza ma ta zlekete na, ma da zəgey ndaw me key kuley na, a suɓam ndaw ta suɓey. A da suɓam tok na, nga, ma da bəzləmey tek me zey hayna da hwaɗ ma ’ay ma Bay’ərlam. 10Tabiya ha səkway ma kusaha da bəla a ɗulam aha mey, da har me bəzləmey tek me zey hayna. 11Arka madurlam ma Bay’ərlam ma ɓar vaw a Zakari, ma lətsa ha ta har zəmay ma ŋgwa me key kuley ana hana, ma darzam tek me zey hayna kava na. 12Andza Zakari ma nəkada na, ma rəzla, zluwer ma kar da mey ŋga dakay. 13Ama madurlam ma ləvar: «Ka wesey zlay Zakari, hərway me ɗuley mey ɗek ana na, Bay'ərlam ka təɓa ba. Ŋgwas eɗek Elizabet a da yəkawa bəzey mawal aha, ka da pafa mezəley ŋga na na, Zaŋ. 14A da mbafaka bəza kakay, ma da yawa ŋga na na, a da datar 'ar a ndaw hay haɗadzidzay. 15Hərway a da tərey ndaw ɗuhwa ha ka slam dey ma Bay’ərlam. A da sey aha zom kakay. Mendzey ma tek ma mbəsla na hay tabiyaha na, a da sey aha kakay. A da rəhey ta Mesəfrey Kokwoɗ ana zla da hwoɗ ma maya ŋga. 16A da madatərawa bəzey ma Israyel hay haɗadzidzay ka slam dey ma Bay’ərlam Bay ma Bəla ta. 17A da kəley ka mey ka slam dey ma Bay ma Bəla ta gədaŋ ma slafa ma mesəfrey ma Elyi, a da madatərawa mevel ma baba ma bəza hay ka vaw ta wawa ta hay, a da kəsadata ndaw ma bəra na hay, ma aza ka dzalam 'ar andza ndaw dzerey ana hay tey; ma aza ma tetəkey səkway na ɓa ma ləma ha ba ka vaw ana a Bay’ərlam.» 18Zakari ma ləvar a madurlam ana: «I da sərada ka mey? Zləna ehe tsoy i maraw aha, ŋgwas a ɗaw bu na maraw aha satsa.» 19Madurlam ma ləvar: «Yah na Gabriyel, i ma lətsa ha kəreh ka slam dey ma Bay ma Bəla a sləradiyawa na, ma da tsaka, ma da ɓadəkaɓa mey a neney hayna wayna. 20Ana ekəɗey tok na ka da tsey aha guma sakay kasl ka pas ma tek ana ka key ba ɗagay, kavəday kah ka paya 'ar a guma ɗaw ma da ndesley da har ana kakay» 21Səkway a huta ha Zakari, ma rəzla ha, hərway ma ma ndzawa ŋga na da slam ma kuley ana. 22Andza ma bawa ŋga da 'ay na, a slafa ma tsatar guma sakay. Arka ndaw hay na ma səradama tek ka ɓərawa vaw ba da slam me key kuley. A walakatar ta har, a tsey guma sakay. 23Andza ŋga ma ndəvadərawa mber aŋga ba na, ŋga ma daway təŋga a mbaw. 24Mendzey nekəɗey a dəba na na, bəzey ma təɗar a vaw a ŋgwas aŋga; Elizabet me key kiya zlam ma kəzla vaw aha da 'ay; ŋga me ləvey: 25«Nəkafama ka tek ma Bay’ərlam ma kiyawa na tey. Ka har aŋga ma nəkafiyawa dey, ma da təkafaya hwaray ba ka slam dey ma ndaw hay.»
A ɓadama ma da yawa ma Yezu
26Ma kiya ma mukwa na na, Bay ma Bəla ma slərey madurlam aŋga Gabriyel a wuraw ma Galiley, a zəlamar Nazaret, 27’ay dem ana daha dahalay aha mədəlay ma gawla na daha a zəlamar Zozef, ndaw ma gedzek ma David. Dem ana hana tey na, a zəlamar Mariya. 28Madurlam me fuləkwey ka tsakay ŋga, ma ləvar: «Kah eɗey Bay ma Bəla ma kafəkawa dey ana na, ndzey da wuiya! Bay’ərlam ŋga ta kah.» 29Guma neney na a rəzla bəza kakay, ha ŋga me tsəhey ka 'ar vaw ŋga na: «Guma neney ma tsəmaya na na, ka ləva na teŋgey?» 30Madurlam ma ləvar: «Ka wesey zlay Mariya, hərway kah ka ndzefey hahaya ba da har ma Bay ma Bəla. 31Nəkafa, bəzey a da təɗaka a vaw, ka da yərawa mawal aha, ka da pafa mezəley ŋga na na, Yezu. 32A da key ndaw ɗuhwa ha, a da zəlama na Bəzey ma Ndaw Tsaŋ da mekekəle ŋga na. Bay’ərlam Bay ma Bəla a da vəladara koriwal ma bay ma baba ŋga David. 33A da key bay ma səkway ma Zakob ma kozaha. Bay ŋga na ma da key ana na, a da ndəvey aha tikay.» 34Mariya ma ləvar a madurlam: «Tek ana a da safiyawa tabiyaha na teŋgey, hərway i ka dzəmam ta ndaw kakay sana?» 35Madurlam ma mbəɗar kava: «Mesəfrey Kokwoɗ ana a da safəkawa, gədaŋ ma Ndaw tsaŋ da mekekəle ŋga na, a da sahətaka ta mezek aŋga. Hərway bəzey ana kah ma da yawa na na, a da key kokwoɗ aha, a da zəlama na, Bəzey ma Bay ma Bəla. 36Nəkafa, dey baba ɗek Elizabet maraw aha tekeɗe na, wawa da hwoɗ kiya mukwa, ŋga ŋga na ma ləvafama dəlay aha na; 37hərway tek ta ger aha ka Bay ma Bəla na, daha tikay.» 38Mariya me ləvey tok: «Yah na bəzey meslərey ma Bay’ərlam. Ka kadaya andza ŋgeɗek me ləvey ana!» Arka madurlam ma daway təŋga.
Mariya a daw a da tsərawa guma a Elizabet
39Da na ŋga na na, Mariya me həley vaw, ma daway tsam tsam a wuraw ana daha mamba ha da Zuda. 40Ŋga me fuləkwey a 'ay ma Zakari, ma tsar guma a Elizabet. 41Andza Elizabet ma tsənada vəɗe ma ɗay ma Mariya na, wawa ŋga me ɓəley da hwoɗ, Mesəfrey Kokwoɗ ana ma rəhada vaw ŋga. 42Elizabet me wudey ta magala ha me ləvey: «Kah pəsa mey aha ba da walaŋ ma ŋgwas hay tabiyaha. Bəzey a neney da hwaɗ eɗek ana na, ma pəsa mey aha satsa. 43Yah ana na way tey, ha maya ma Bay’ərlam a ɗaw ma sawa 'ay ɗaw ana na? 44Andza i ma tsənada guma ɗek ma tsiyawa na, bəzey ɗaw me gərvey da hwoɗ ta wuiya. 45ŋga da wuiya, ŋga aŋga ma pawa ’ar ka guma na ma tsədəmərawa da mezəley ma Bay’ərlam ana na, a da ndesley» 46Arka Mariya me ləvey:
«Mezek a ɗaw a səmbəra Bay’ərlam.
47Mesəfrey ɗaw ma rəha ha ta wuiya
hərway ma Bay ma Bəla, me buwey ɗaw.
48Hərway ma mey na, ka nəkafərawa dey ba ka dem ma ndaw mbarga neney tedehe na.
Ayaw, zla ekəɗey ha səlekw na, ndaw hay a da taləkadama mey yah na wuiya ha.
49Hərway ma mey na, Ndaw ma slafa tabiyaha na ka kawa tek hayna hay ba ɗuhwa hiya hərway ɗaw.
Mezəley ŋga na na Kokwoɗ.
50Haya ŋga na na, a ndəvey tikay. A zewey ka bəzey ma hwoɗ ka bəzey ma hwoɗ ka ndaw ma wasadama na hay.
51Ŋga ka mbəɗafərawa ba kava ta gədaŋ ma har aŋga tabiya ha.
A zlaɗadata 'ar ba ta ndaw ma dzalam ’ar ma rəsam vaw ana hay.
52Ma kuyadata bay ɗuhwa na hay ba da koriwal ma bay ta,
arka ma tsakafadata ndaw tedehe na hay ka slam hayna hay.
53Ndaw may hay na ma rəhadata ta zleley.
Arka ndaw zleley ana hay tey na, ma harata har pekem pekem.
54Ŋga ka sawa ba, ma da dzəna Israyel gawla ma 'ay ŋga.
Hərway a sərafa ka haya ŋga ma katərawa na,
55andza na ŋga ma ləvatərawa a baba lakwa hay ana,
ta har ma Abraham ta bəzey ma hwoɗ aŋga hay ma kozaha.»
56Mariya ma ndzəmawa ka vaw ta Elizabet a key kiya makar, a dəba na na, ma mey təŋga a mbaw.
Ma yawa ma Zaŋ Batist
57Har ma Elizabet me yey ka slawa ba, ŋga ma yawa bəzey mawal aha. 58Andza ndaw mambaw hay ta ndaw ma 'ay ŋga na hay ma tsənadama Bay’ərlam ka rəhada ba ta haya ŋga na, taya ma kam wuiya dzaya. 59Arka meney tsakar, ta pas me sley kuɗey ma wawa na na, a wuɗam ma pafama mezəley ŋga na na, Zakari andza ma baba ŋga na. 60Arka maya ŋga na me ləvey: «A'ay, a da zəlama na, Zaŋ.» 61Arka ndaw hay ma ləvamar: «Ndaw ka bəzay kwar mezəley ŋga na, andza ha dakay seŋgey.» 62Ma wamar ta har a baba na, ma ka səradama a wuɗey ka zəlama na teŋgey? 63Ŋga me tsəhey tek me windey kava, ma winda guma ɗey: «Mezəley ŋga na na, Zaŋ.» A rəzlata ndaw hay tabiyaha. 64Ka slam ana deŋe tsana, mey ŋga me wurey, 'erneh aŋga me pəsəkey, a tsey guma ka dəba. Ma səmbəra Bay ma Bəla. 65Arka zluwer ma katar a maslawagay ŋga hay tabiyaha. Da mamba ma Zudey tabiyaha a tsam na, sey ka tek ana ŋga na ma kawa na hay tabiya ha. 66Ndaw ma tsənadama na hay tabiya ha ma padama guma na a mevel ata, ma ləvam: «Aza wawa na, a da tərey na teŋgey?» Dərka na har ma Bay’ərlam ŋga ka ŋga.
Walay ma Zakari
67Zakari, baba ma wawa na, ma rəha vaw aha ta Mesəfrey Kokwoɗ ana, ŋga ma zlar me tsey guma andza ma ndaw sek andza neney:
68«Hayna ma sambəra Bay’ərlam, Bay ma Bəla ma Israyel,
kavəday ŋga ka sawa ba, ma da nəkəraɓa səkway ŋga, ma ndaslada me buwey ŋga.
69Ka vəlandukurawa ndaw me buwey ba gədaŋ aha,
da gedzek ma David, gawla ma 'ay ŋga.
70Na ma tsərawa zlezle ta huɗa mey ma ndaw sek aŋga kokwoɗ ana hay ana:
71a buwandakwar da har ma ndaw dugwan a lakwa hay,
ta ndaw ma ŋgəladəmandakwar dey kakay ana hay.
72Ŋga ka ɓadatərawa haya ŋga ba a baba lakwa hay.
Ŋga ma sərafa ka me dzəmey vaw ŋga kokwoɗ ana. 73Hərway ŋga ka ɓadərawa ba a baba lakwa: Abraham. ada vəladandakwar.
74Ka da buwamdukurawa ba da har ma ndaw dugwan hay na,
ma da kar kuley na, mandzara me wesey,
75da ma ɗamara ’ar ta dzerey,
ka slam dey ŋga, da mendzey lakwa tabiyaha ka pas ka pas.
76Kah tey ŋgey wawa neney ketewɗey ana, a da zələmaka na: ndaw sek ma Bay'ərlam tsaŋ da mekekəle ŋga na,
hərway ka da kəley ka slam dey ma Bay’ərlam, ma da ləmadara tsəveɗ aŋga hay.
77Ma vəlar a səkway ŋga, ma sərada me buwey
ta me sey yam ka meŋgəsey hay.
78Nəkafama neney tek hayna gədaŋ ma Bay ma Bəla lakwa na:
kuse ma tek aŋga hayna na na, wurzla ma sləlawa ma sawa da 'ərlam ma da tsandukuraɓa guma.
79Ma ɓatar vaw a ndaw ma ndza hiya da ləvaŋ ana hay, ta ndaw ma ndza hiya da mezek ma memətsey ana hay,
ma da kəsadandakwar ka tsəveɗ ma zozoy.»
Ma gəlawa Zaŋ Baptist
80Arka wawa na tey na me gəley, me dzeley 'ar aŋga me səkey kava adiya, ma daw me ndzey da palah, ha ta pas aŋga ma ɓar vaw a səkway ma Israyel.
Currently Selected:
Luk 1: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun