Zaŋ 16
16
1I ɓadakwar tek a neney tabiya ha na, ma kuray ka da zləgam da suwet zlay. 2A da parzləmukurawa ba da 'ay me ɗuley mey hay, a fəna satsa na, har ana a slawa ha, ndaw ma da zəɗadakwar 'ar ana na, a da dzeley na, andza a kar kuley a Bay ma Bəla. 3A da kam andza ha na, hərway taya ka səradama kwa Baba kakay, kwa yah kakay. 4Ama i ma ɓadakwar neney ba ka vaw na, aza andza har ata ka da sawa ba na, kuray ka sərafama, ɓa i ka ɓadakwar ba ka vaw.
Meslərey ma Mesəfrey Kokwoɗ ana
I ka ɓadukurawa zla da mezley ana kakay zləna, hərway yah daha ka tsakay kwar mba. 5Ama ekəɗey na, i daway aha tek a ɗaw ka tsakay ma ndaw ma sləradiyawa na. Amana, kwa ndaw asləta da walaŋ a kwar, ma tsəhafaya ɗagay ‹Ka daw a may?› dakay na teŋgey? 6Ama, mavəday i ma ɓadakwar andza neney na, mevel a kwar me rəhey ta magwam. 7Neney i ma tsakwar ana na, mey ma dərka, ma daw ɗaw ana a da nafakwar na a kuray, akwa haɗaw i ka daway kakay na, Ndaw ma dzəŋgərey ana a sawa kakay. Dzadzak haɗaw i ka daw ba tey na, i da sləradukurawa. 8Ama, ŋga na, ka da sawa ba na, a da ɓadatara a bəla na ka zləgey ba, da tek andza ma meŋgəsey, ma dzerey ta sariya. 9Da meŋgəsey na: hərway taya ka pam 'ar ka yah kakay. 10Da dzerey na: hərwey i daw a 'ay Baba, arka ka da nəkadəmaya ha sakay; 11da guma ma sariya na: hərway bay ma bəla neney na, sariya ŋga na ma kaha tsoy. 12Tek a ɗaw hay daha haɗadzidzay ma tsakwar daha mba, ama ekəɗey na ka slafama ma ɓəsama tata tsaray kakay. 13Andza aza Mesəfrey ma dərka ka da sawa ba na, a da fuləkwadakwar a dərka na kərem ta vaw kwar adzay. Hərway a da tsey guma na ma bay 'ar ma vaw ŋga na kakay, ama a da tsey na, tek na ma tsənada na, a da ɓadakwar tek na ma da key ka mey ana hay tabiya ha. 14A da hasəkadaya bəzay, hərway a da ɓakwar na tek na ma sawa da yah ana. 15Tek ma Baba ɗaw tabiyaha na, na ŋga ɗaw; i da ləvakwar, tek aŋga ma ɓakwar tabiyaha a sawa da yah na hərwuiya.
Viya a da tərey wuiya
16Mendzey nekəɗey adiya na, ka da nəkadəmaya ha sakay. Arka mendzey nekəɗey sa na, ka da nəkadəmaya.» 17Sa ma gawla ŋga hay ma ləvam ka 'ar vaw ta na: «A wuɗey ma tsandakwar na guma waray? Mendzey nekəɗey na, ka da nəkadəmaya ha ka dey sakay, mendzey nekəɗey sa na, ka da nəkadəmaya, dakay satsa na, i daway ka tsakay ma Baba.» 18Taya ma ləvam: «Ɗagay nekəɗey ŋga na na, ka ləva na teŋgey? I tsənadakwa bəzay ma guma ŋga neney me wuɗey me tsey ana sakay.» 19Andza ŋga ma sərafa ba a wuɗam ma tsəhafama na, Yezu ma ləvatar: «Ka səpam ma səradama bəzay ma guma ɗaw a neney ka 'ar vaw kwar ana: mendzey nekəɗey na, ka da nəkadəmaya ha ka dey kwar sakay, mendzey nekəɗey sa na, ka da nəkadəmaya. 20Dərka dərka na, i ləvakwar: ka da zazaŋam, ka da tuwam, andza ndaw hay tabiyaha a kam aha wuiya na. Ama ma tuway kwar ana a da mbəɗey na wuiya ha. 21Andza ŋgwas ŋga da zləbeŋ na, banay ɗuhwa ha ka ŋga, hərway har aŋga ka slawa tsoy. Andza ka yərawa wawa na tsoy na, a sərafaka ka banay ŋga na sakay, ŋga da wuiya hərway ŋga ka yawa ndaw ba ka bəla. 22Kuray ekəɗey na, mevel a tsakwar andza ha tey, ama aza i da nəkadakwar dey mekelehe na, ka da kam wuiya, wuiya na na, ndaw ma təɓafakwar ba na dakay. 23Kəɗey ta pas ana ŋga na na, ka da tsəhafəmaya ha guma dasakay. Dərka dərkana, i ləvakwar: kendzey ka tsəham tek ka Baba ɗaw, ta mezəley ɗaw na, a da vəladakwar. 24Ha ekəɗey na, kuray ka tsəham tek ta mezəley ɗaw tsaray kakay. Tsəham na aza ka ndzafam, arka aza wuiya kwar a da key na kərem.
Yezu na ka zəga 'ar ma sleɗ ba
25I tsadakwar guma na hay tabiya ha na, ma dzəka ha ta dzəkey. Ama har ana ka da sawa ba na, i da tsakwar aha andza neney sakay, ama na i da ɓadakwar na ndar ndar tek na me nəkey dey ka Baba na na. 26Ta pas ana ŋga na na, ka da tsəham tek ta mezəley ɗaw, ama i ləvakwar i da ɗular mey a Baba hərway kwar sakay, 27zləna, Baba na ta 'ar aŋga a wuɗakwar, hərway ma mey na, kuray ka wuɗəmaya ba, ya, kuray ka təɓama ba ka mevel a kwar: i bawa na da Bay ma Bəla. 28I bawa na da Baba, arka i ma sawa ka bəla, ama ekəɗey na, i mbəkada bəla, i mey a 'ay Baba.» 29Gawla ŋga hay ma ləvamar: «Nəkafa, ekəɗey na, ka tsey guma na, ndar ndar ka dəba, kah ka mbəkada guma me dzəkey ta dzəkey ana ba. 30Ekəɗey na, la səradama kah na ka səradata tek hay tabiyaha, ka wuɗey ndaw ka tsəhafaka guma sazlay, a da key ekəɗey la pam 'ar ka bawa da Bay ma Bəla na hərwuiya.» 31Yezu ma mbəɗatar kava: «Ekəɗey na, ka pam 'ar ɗaw? 32Nəkafama har ana a slawa ha, ekəɗey na ka husa tsoy, kuray tabiyaha ka da zlaɗam 'ar, kwa way way a da zəgey tsəveɗ aŋga, ka da mbəkadəmaya makəraɗaw, amana, i makəraɗaw kakay, Baba, ŋga daha ta yah. 33I tsadakwar a neney na, ma ta yah na, kuray ka da ndzafam zozoy. Da mendzey ma bəla neney na, ka da ndzam da mevel, amana, səmam vaw, i ka zəga 'ar ma sleɗ ba ka bəla.»
Currently Selected:
Zaŋ 16: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun